Indaba 66
UJezebheli—INdlovukazi Engakalungi
NGEMVA kokuhlongakala kweKosi uJerobhowami, ikosi enye nenye egade ibusa etlhagwini yeentjhaba eziyi-10 zombuso wama-Israyeli gade ingakalungi. Kodwana iKosi u-Ahabi gade kuyikosi engakalungi ukuwadlula woke. Uyazi bonyana kubayini? Ibanga lokuthoma elikhulu gade kumkakhe, iNdlovukazi engakalungi uJezebheli.
UJezebheli bekangasuye umfazi wom-Israyeli. Gade kuyindodakazi yekosi yeSidoni. Bekakhulekela uzimu wamala uBhali wenza no-Ahabi namanye ama-Israyeli bakhulekele uBhali. UJezebheli gade amhloyile uJehova wabulala nabanengi babaphorofidi bakhe. Abanye gade kufuneka bazifihle erholweni bonyana bangabulawa. Nengabe uJezebheli bekunento ayifunako, bekangabulala umuntu bona ayifumane intweleyo.
Langelinye iKosi u-Ahabi gade idane khulu. Ngalokho uJezebheli wayibuza: ‘Udaniswe yini namhlanjesi?’
U-Ahabi waphendula wathi: ‘Ngidaniswe ngilokho uNabhothi akutjho kimi. Bengifuna ukuthenga isimakhe yamadiribe. Kodwana wangitjela bona angeze ngayifumana.’
UJezebheli wathi kuye: ‘Ungatshwenyeki, ngizokufumanela yona.’
Ngalokho uJezebheli watlola iincwadi waziyisa kwamanye wamadoda aziinduna edorobheni lalapho kuhlala khona uNabhothi. UJezebheli wawatjela wathi: ‘Fumanani amadoda angakalungi bona athi uNabhothi uthuke uZimu nekosi u-Ahabi. Ngemva kwalokho khiphani uNabhothi edorobheni nimkhande ngamatje bekafe.’
Msinyana ngemva kokobana uJezebheli azwile bona uNabhothi ufile, wathi ku-Ahabi: ‘Nje-ke khamba uyokuthatha isimakhe yamadiribe.’ Awuvumi na bonyana uJezebheli bekufuneka bona afumane isigwebo ngokwenza intwembi kangaka?
Ngalokho ekukhambeni kwesikhathi uJehova wathumela uJehu bonyana ayomjezisa. Lokha uJezebheli nakezwako bona uJehu uyeza, wazimonyonga wazenza waba muhle. Kodwana lokha uJehu nekafikako abona uJezebheli efesidereni, wabiza amadoda angendlini yekosi wathi kiwo: ‘Mphoseleni phasi!’ Amadoda la amlalela, njengombana ubona esithombenesi. Amphosela phasi wafa. Lesi kwaba siphelo seNdlovukazi engakalungi uJezebheli.
1 Amakhosi 16:29-33; 18:1-4; 21:1-16; 2 Amakhosi 9:30-37.