Ingcenye 12
Ukuhlakanipha Okuvela KuZimu Kusipha Ilemuko Ekuphileni
Incwadi yeZiyema libuthelelo leenluleko eziphefumulelweko—ezitlolwe nguSolomoni—lezo ezisipha ilemuko ekuphileni kwelanga nelanga
UJEHOVA Mbusi ohlakaniphileko na? Enye indlela enembileko yokuphendula umbuzo loyo kutjheja iinluleko asinikela zona. Ziyaberega na? Ukuziberegisa kwenza ukuphila kube bhedere begodu kube nehloso na? IKosi ehlakaniphileko uSolomoni yatlola amakhulu wezaga. Izagezi zihlanganisa koke ukuphila kwethu. Tjheja nanzi ezinye iimbonelo.
Ukuthembela kuZimu. Ukuthemba uJehova kusenza sibe nobuhlobo obuhle naye. USolomoni watlola wathi: “Thembela kuJehova ngayo yoke ihliziyo yakho, ungasami ngelwazi lakho. Mtjheje kizo zoke iindlela zakho, begodu yena uzakunqophisa iindlela zakho.” (Iziyema 3:5, 6) Ukuthembela kuZimu ngokufuna ukunqophiswa nguye begodu nokumlalela kwenza umuntu aphile ukuphila okunehloso. Ikambo leyo ithabisa ihliziyo kaZimu begodu imenze akwazi ukuphendula ipikiswano eyaphakanyiswa linaba lakhe elikhulu uSathana.—Izeyema 27:11.
Ukuberegisana ngokuhlakanipha nabanye. Isiluleko sakaZimu emadodeni, ebafazini begodu nebantwaneni siberega khulu namhlanjesi kunangesikhathi esidlulileko. UZimu ululeka amadoda: “Thaba ngomfazi wobutjha bakho,” okutjho bona indoda kufuneka ihlale ithembekile kumkayo. (Iziyema 5:18-20) Umfazi otjhadileko nonekghono okutlolwe ngaye encwadini yeZiyema uzifumanela ukubukwa nokubatjazwa yindodakhe nabantwabakhe. (Iziyema, isahluko 31) Abantwana balaywa bona balalele ababelethi babo. (Iziyema 6:20) Incwadi le, itjengisa nokobana ubungani nabanye buqakathekile, kanti ukuba yikomo edla yodwa kwenza umuntu abe marhamaru. (Iziyema 18:1) Kufuneka sikhethe abangani ngokuhlakanipha ngombana bangakwazi ukukwenzisa izinto ezimbi namtjhana ezihle.—Iziyema 13:20; 17:17.
Ukwenza izinto ezisizuzisako. Incwadi yeZiyema isirhelebha bona sibalekele ubudakwa. Isirhelebha nokobana sibe nehliziyo ehle ngombana ihliziyo embi iyagulisa, begodu incwadi le isirhelebha bona sikhuthale. (Iziyema 6:6; 14:30; 20:1) Iyelelisa bona ukethembela ekwahluleleni komuntu ingasi kwakaZimu kudosela engozini. (Iziyema 14:12) Isikhuthaza nokobana sivikele iinhliziyo zethu emikhokheni eyonakalisako, isikhumbuza bona “umthombo wokuphila uvela ehliziyweni.”—Iziyema 4:23.
Iingidi zabantu ephasini zifumene bona ukulalela iinlulekwezi kwenza sibe nokuphila okubhedere. Mabanga layo enza bona bamukele uJehova abe Mbusi wabo.
—Isekelwe encwadini yeZiyema.
◼ Yini esingayifunda encwadini yeZiyema?
◼ Ngiziphi iinluleko esizifumana encwadini yeZiyema endabeni yokuthembela kuZimu, ukuberegisana ngokuhlakanipha nabanye begodu nangokuzitlhogomela?
[Ibhoksi elisekhasini 15]
UMTJHUMAYELI
Singakufumana kuphi ukuphila okwanelisako nokunehloso? USolomoni gade asebujamweni obuhle bokufuna ipendulo. Arege khulu, ahlakaniphile begodu anegunya, wakwazi ukuzihlolela bonyana lokhu kungamlethela ithabo lamambala na. Waphikelela ekufuneni ithabo ngokurega, ngokutjhada nabafazi abanengi abahle, nezokuzithabisa eziphambili. Wahlanganyela ekwakheni izakhiwo ezikulu. Wafunda iincwadi ezitlolwe ziimfundiswa. Yini ayifumanako? “Yoke into ililize.” Nanyana kunjalo, ngemva kokufuna ipendulo wafikelela nanti iqiniso: “Isiphetho sendaba ngilesi, njengombana sekuzwakele koke: Yesaba uZimu wamambala begodu ubulunge imilayo yakhe. Ngombana lokhu kusibopho sawo woke umuntu.”—Umtjhumayeli 12:8, 13.
[Itjhadi ekhasini 15]
Genesisi
Eksodosi
Lefitikosi
Numeri
Duteronomi
Joshuwa
Abahluleli
Rude
1 Samuweli
2 Samuweli
1 Amakhosi
2 Amakhosi
1 Imilando
2 Imilando
Ezra
Nehemiya
Esta
Jobhi
AmaRhalani
Iziyema ●
Umtjhumayeli ●
Irhubo lamarhubo
Isaya
Jeremiya
Isililo
Ezekiyeli
Danyela
Hosiya
Juweli
Amosi
Obadiya
Jona
Mika
Nahumi
Habakuki
Zefaniya
Hagayi
Zakariya
Malaki
Matewu
Markosi