Indodana Yomuntu Izokwambulwa

Kungenzeka uJesu useseseSamariya namkha eGalile. AbaFarisi bambuza ngokufika komBuso, abawulindele ukuthi uzokufika ngomnyanya omkhulu nangendlela ebabazekako. Nokho uthi: “UmBuso kaZimu angekhe uze ngendlela yokuthi ubonakale kibo boke; nabantu angekhe bathi, ‘Qalani naku!’ namkha, ‘Nakuya!’ Ngombana umBuso kaZimu uphakathi kwenu.”—Lukasi 17:20, 21.

Abanye bangaphetha ngokuthi uJesu utjho ukuthi umBuso ulawula eenhliziyweni zeenceku zakaZimu. Kodwana lokho angekhe kwaba njalo, ngombana umBuso awusiseenhliziyweni zabaFarisi uJesu akhuluma nabo. Nokho, uphakathi kwabo ngombana iKosi ekhethiweko yomBuso kaZimu, uJesu, ulapho hlangana nabo.—Matewu 21:5.

Kungenzeka ukuthi ngemva kobana abaFarisi bakhambile, uJesu unikela abafundi bakhe imininingwana engeziweko ngokuza komBuso. Nakakhuluma ngokuba khona kwakhe emandleni womBuso, uthoma ngokuyelelisa, uthi: “Kuzokufika amalanga lapho nizokukhanuka ukubona elinye lamalanga weNdodana yomuntu, kodwana angekhe nilibone.” (Lukasi 17:22) UJesu utjengisa ukuthi ukubusa kweNdodana yomuntu emBusweni, yinto ezokwenzeka esikhathini esizako. Ngaphambi kokuthi isikhatheso sifike, kungenzeka abanye abafundi bakufune ngamehlo abomvu. Kodwana kuzokufuze baragele phambili balindile bekube sikhathi sakaZimu sokuthi iNdodana yomuntu ize.

UJesu uraga uthi: “Abantu bazokuthi kini, ‘Qalani nasiya!’ namkha ‘Qalani nasi!’ Ningayi namkha nigijime ngemva kwabo. Njengombana umbani upanyaza kelinye ihlangothi lezulu uya kwelinye ihlangothi lezulu, neNdodana yomuntu izokuba njalo ngelanga layo.” (Lukasi 17:23, 24) Yini ezokuvikela abafundi bakaJesu bona bangagijimi ngemva kwabomesiya bamanga? UJesu uthi ukuza kwakaMesiya wamambala, kuzokufana nombani opanyaza endaweni ebanzi. Ubufakazi bokuba khona kwakhe emandleni womBuso buzokubonakala kuhle kibo boke abatjhejako.

Ngemva kwalokho uJesu umadanisa izenzakalo zekadeni ukutjengisa ukuthi abantu bazokuba njani esikhathini esizakweso, uthi: “Njengombana kwenzeka emihleni kaNowa, kuzokuba njalo nangemihla yeNdodana yomuntu . . . Ngokufanako, njengombana kwenzeka emihleni kaLoti: bebadla, basela, bathenga, bathengisa, batjala, begodu bakha. Kodwana ngelanga uLoti aphuma ngalo eSodoma, kwana umlilo nesibabuli kuvela ezulwini kwabatjhabalalisa boke. Kuzokwenzeka okufanako ngelanga iNdodana yomuntu ezokwambulwa ngalo.”—Lukasi 17:26-30.

UJesu akatjho ukuthi abantu besikhathi sakaNowa nebesikhathi sakaLoti batjhatjalaliswa ngombana bebenza izinto ezijayelekileko njengokudla, ukusela, ukuthenga, ukuthengisa, ukutjala, nokwakha. UNowa noLoti nemindenabo bazenza ezinye zezintwezo. Kodwana abanye abantu bebenza izintwezi banganandaba nentando kaZimu begodu bebaseqisela amehlo isikhathi ebebaphila kiso. Kungebangelo uJesu akhuthaza abafundi bakhe bona batjheje intando kaZimu begodu bayenze ngokuzimisela okukhulu. Ngalokho ubatjengisa indlela yokusindiswa, okuyindlela yokuthi baragele phambili baphila uZimu nakatjhabalalisa abambi esikhathini esizako.

Abafundi kuzokufuze bagegede ukuphazanyiswa zizinto zephasi abaphila kilo, ‘izinto abazitjhiyileko.’ UJesu uthi: “Ngelangelo umuntu ophezu kwendlu kodwana ipahlakhe ingendlini, angahliki ayoyithatha, nomuntu osesimini, angabuyeli ezintweni azitjhiyileko. Khumbulani umkaLoti.” (Lukasi 17:31, 32) UmkaLoti waba yisika yetswayi.

Nakaraga nokuhlathulula ubujamo obuzobe bukhona ngesikhathi iNdodana yomuntu ibusa, uJesu utjela abafundi bakhe, uthi: “Ngobusukobo abantu ababili bazabe basembhedeni munye; omunye uzokuthathwa, omunye uzokutjhiywa.” (Lukasi 17:34) Abanye bazokusindiswa, kodwana abanye bazokulahlwa, balahlekelwe maphilwabo.

Abafundi bayabuza: “Kuphi, Kosi?” UJesu uyaphendula: “Lapho kunesidumbu khona, kulapho namadlanga azokubuthana khona.” (Lukasi 17:37) Nambala, abanye bazokufana namadlanga abona izinto zisesekude. Abafundi bazokubuthanela kuKrestu wamambala, iNdodana yomuntu. Ngesikhathi esizakweso, uJesu uzokunikela abafundi bakhe amaqiniso asindisa ukuphila kilabo abakholwako.