UMosi Wakhetha Ukulotjha UJehova

EGibhide, umndeni kaJakopo bewaziwa ngokuthi ma-Israyeli. Ngemva kobana uJakopo noJosefa bahlongakale, uFaro omutjha wathoma ukubusa. Bekasaba bona ama-Israyeli azokuba namandla ukudlula amaGibhide. Ngalokho wabangela bona ama-Israyeli abe ziingqila. Wawaforomisa iintina ngekani, wawakatelela nokuthi asebenze budisi emasini. Kodwana bekuthi amaGibhide nakawatlhorisa, ama-Israyeli ande ngesibalo. Ngebanga lokuthi uFaro bekangakuthandi lokhu, wakhupha umlayo wokobana kubulawe abasana abamasana wakwa-Israyeli. Ucabanga ukuthi kwawathusa kangangani lokho ama-Israyeli?

Umfazi womIsrayeli ibizo lakhe elinguJokobedi bekanesana elihle lomsana. Bona alivikele, walifaka ngemantjini, wayolifihla emlanjeni iNayili hlangana nemihlanga. Udadwabo lomntwana, uMiriyamu, wahlala eduze nomlambo loyo, afuna ukubona ukuthi kuzokwenzekani.

Indodakazi kaFaro yeza izokuhlamba emlanjeni, nayithi mehlo suka naku umantji. Ngaphakathi bekunomntwana alila, yeke yamrhawukela. UMiriyamu wabuza: ‘Ngingakufumanela umma ongakumunyisela umntwana?’ Indodakazi kaFaro nayivumako, uMiriyamu weza nommakhe, uJokobedi. Indodakazi kaFaro yathi kuye: ‘Thatha umntwana lo ungimunyisele yena, ngizokubhadala.’

Kwathi umntwana nakakhulakhulako, uJokobedi wambuyisela endodakazini kaFaro, owamthiya ibizo elithi Mosi begodu wamkhulisa njengendodanakhe. UMosi wakhula amntwana wekosini begodu bekafumana nanyana yini ayifunako. Kodwana uMosi azange amlibale uJehova. Bekazi ukuthi kuhlekuhle yena umIsrayeli ingasi umGibhide. Ngikho-ke akhetha ukulotjha uJehova.

Nakaneminyaka ema-40, uMosi wakhetha ukusiza abantu bekhabo. Kwathi nakabona umGibhide abetha isigqila esimIsrayeli, uMosi wabetha umGibhide loyo kabuhlungu wambulala. Wafihla isidumbeso ngehlabathi. Kuthe bona uFaro asifumane, walinga ukubulala uMosi. Kodwana uMosi wabalekela enarheni yakwaMidiyani. UJehova wamtlhogomela nakalapho.