UmBuso Ozokuhlala Unomphela

Ngobunye ubusuku, iKosi uNebukadinetsari yabhudanga into engakajayeleki. Ibhudangwelo layitshwenya kangangobana yabhalelwa kulala ebusuku. IKosi yabiza abosomlingo bayo boke, yathi kibo: ‘Ngihlathululelani ibhudangweli.’ Bathi: ‘Sitjela ukuthi ubhudangeni.’ UNebukadinetsari wathi: ‘Awa! Nina phengulani ningitjele ukuthi ngibhudangeni, nakungasi njalo ngizonibulala.’ Abosomlingo bathi: ‘Sitjela ukuthi ubhudangeni bese thina sihlathulule.’ Wathi: ‘Ngibona ngathi noke nje nilinga ukungikhohlisa.’ Nina ngitjelani ukuthi ngibhudangeni! Baphendula ikosi ngokuthi: ‘Akunamuntu ophilako ongenza into enjalo. Into osibawa yona le angekhe yakghonakala.’

UNebukadinetsari wanyenya khulu, kangangobana walayela bona woke amadoda ahlakaniphileko enarhenakhe abulawe. Lokho bekufaka hlangana uDanyela, uTjhedreke, uMitjhaka no-Abhedinigo. UDanyela wabawa bonyana ikosi kheyimuphe isikhatjhanyana. Wathandaza nabangani bakhe, babawa uJehova abasize. UJehova wayithini indaba le?

UJehova wavezela uDanyela umbono webhudango lakaNebukadinetsari ukuthi belitjho ukuthini. Elangeni elilandelako, uDanyela waya encekwini yekosi wafese wathi: ‘Ningabulali namunye emadodeni ahlakaniphileko. Ngingalihlathulula ibhudango lekosi.’ Inceku yathatha uDanyela yamusa kuNebukadinetsari. UDanyela wathi ekosini: ‘UZimu ukwambulele ifihlakalo yengomuso. Ibhudango lakho libunjesi: Ubone isithombesibunjwa esikhulu kwamanikelela, esinehloko yegolide, isifuba nemikhono yesiliva, amathumbu nenyonga yekhopha, imilenze kungeyesimbi bese iinyawo zaso kuyisimbi evangene nomdaka. Kwaqephuka ilitje entabeni, lafese laphohloza iinyawo zesithombesibunjweso, sagayeka saba ziintshurhu ezaphetjhulwa mumoya. Ilitje lona laphenduka idwala elikhulu lazala loke iphasi.’

UDanyela wabuye wathi: ‘Ibhudango lakho litjho naku: Umbuswakho uyihloko yegolide. Isiliva mbuso ozokulandela ngemva kwakho. Bese kube nomunye ofana nekoporo, lowo-ke uzokubusa iphasi loke. Olandela loyo uzokuqina njengesimbi. Emaswapheleni kuzokuba nemibuso ephadlhuke phakathi, ezinye iingcenye zawo zizokuqina njengesimbi, ezinye zithambe njengomdaka. Ilitjela elaphenduka intaba, litjho umBuso kaZimu. UmBuso loyo uzokutshidlha yoke imibuso le, wona uhlale unomphela.’

UNebukadinetsari wakhothama phambi kwakaDanyela, wahloma ihloko phasi. Wathi: ‘NguZimakho okwambulele ibhudangweli. Akekho ofana naye.’ Kunokuthi abulale uDanyela, wamenza isikhulu sawo woke amadoda ahlakaniphileko kunye nababusi beemfunda zeBhabhiloni. Uyayibona na indlela uJehova aphendula ngayo umthandazo kaDanyela?