Isiporofido 5. Ukutjhatjalaliswa Kwephasi
‘[UZimu] uzokubhubhisa labo ababhubhisa iphasi.’—ISAMBULO 11:18.
● UMnumzana Pirri usebenza njengombutheleli wewayini lomuthi wepato eKpor, eNigeria. Umsebenzakhe watjhatjalaliswa kukghuthuka okukhulu kwe-oli eNiger Delta. Uthi, “Ibulala iimfesi zethu, yonakalisa isikhumba sethu, isonela neemlambo. Angisanawo umsebenzi wokuziphilisa.”
NGIKUPHI OKUTJENGISWA MAQINISO? Ngokuya ngezinye izazi, amathani aziingidi ezi-6.5 weenzibi alahlelwa elwandle qobe mnyaka. Kulinganiselwa bona amaphesenti ama-50 weenzibezo ziimplastiki ezizokuhlala amakhulu weemnyaka ngaphambi kobana zitjhabalale. Ngaphandle kokusilaphaza iphasi, abantu baqeda iinsetjenziswa ezingokwemvelo zephasi ngezinga elikhulu. Ukuhlola kutjengisa bona kutlhogeka umnyaka neenyanga ezihlanu bona iphasi livuselele okusetjenziswa babantu ngomnyaka. Iphephandaba le-Australia i-Sydney Morning Herald libika bona, “Nengabe abantu bayanda nokusetjenziwa kwezinto ngokweqileko kuragela phambili, kuzokutlhogeka isilinganiso samaPhasi amabili ngo-2035.”
NGIKUPHI UKUPHIKISA OKUJAYELEKILEKO? Abantu bahlakaniphile. Singakghona ukufumana ipengu yemiraro le, siphuluse iphasi.
UKUPHIKISOKHO KULIQINISO? Abantu abanengi abasebenza budisi babodwa kuhlanganise neenqhema balemukise ngeemraro yezebhoduluko. Nanyana kunjalo, iphasi liragela phambili lisilaphazeka ngezinga elikhulu.
UCABANGANI? Kuyatlhogeka bona uZimu angenele aphuluse iphasi ekutjhatjalalisweni—njengombana athembisile?
Ukungezelela eemporofidweni ezihlanu ezisand’ ukucatjangelwa, iBhayibhili godu labikezela ngezinto ezihle ezizokwenzeka eenkhathini zokuphela. Cabangela isibonelo esisodwa esiporofidweni sesithandathu.
[Umkhangiso osekhasini 8]
“Ngizizwa ngasuthi ngisuke ekubeni nesiquntu separadeyisi ukuya ekubeni nezala lezinto eziyingozi.”—U-ERIN TAMBER, ISAKHAMUZI SE-GULF COAST, E-UNITED STATES, MALUNGANA NEEMPHUMELA YOKUPHALAKA KWE-OLI OKWENZEKA E-THE GULF OF MEXICO NGO-2010.
[Ibhoksi elisekhasini 8]
NguZimu Okufuze Abekwe Umlandu?
Njengombana iBhayibhili labikezela ngobujamo obumbi esibubonako namhlanje, lokho kutjho bona nguZimu okufuze abekwe umlandu ngabo? Usibangela ukutlhaga? Ungafumana iimpendulo ezanelisako zeembuzo leyo esahlukweni-11 sencwadi ethi Khuyini Kwamambala Okufundiswa YiBhayibhili? egadangiswe boFakazi BakaJehova.
[Umthombo wesithombe ekhasini 8]
U.S. Coast Guard photo