Ukufuna Iimpendulo

“Pheze woke umuntu unombonwakhe ngokobana [uJesu] ungubani. Kungakhathaliseki bona sinekholo elingangani namtjhana ukungaqiniseki okungangani, soke siyazibuza bona, ‘Ingubani indoda le?’”—UMTLOLI USTAN GUTHRIE.

ABANTU banerhuluphelo ngoJesu. Iincwadi ezikhuluma ngaye zikhamba phambili ekuthengiseni. Amabhayisikobho akhuluma ngaye adume kwamambala. Nanyana kunjalo, kuneembuzo eemnengi ngoJesu. Abantu baneembono engafaniko ngokobana bekangubani uJesu kwamambala.

Eemnyakeni embalwa edlulileko, ababikiindaba ababili bamema abantu ku-Internet bona baphendule umbuzo othi “Bekangubani uJesu?” Iimpendulo bezihlanganisa okulandelako:

● “Kubonakala kwanga bekangurabi (umfundisi) owenza ukuphila kwakhe kwaba sibonelo sesirhawu.”

● “Bekamumuntu ovamileko owaphila ukuphila okungakavami.”

● “Abukho ubufakazi bokobana uJesu wakhe waphila.”

● “UJesu yiNdodana kaZimu eyabelethwako, yafa, yavuka ekufeni bona isisindise ezonweni zethu. UYaphila namhlanjesi, begodu Uzokubuya ephasini godu.”

● “Ngikholelwa bona uJesu Krestu yiNdodana kaZimu ekukuphela kwayo, umumuntu opheleleko begodu unguzimu opheleleko, kokubili ngesikhathi esisodwa.”

● “Indaba kaJesu yinolwana yabantwana abakhulileko.”

Kwamambala, iimbono ehluke kangaka angekhe kwenzeka bona yoke ibe liqiniso. Ukhona na umthombo welwazi onokuthenjelwa ongasinikela iimpendulo zeembuzwethu ngoJesu? Abagadangisi bakamagazini lo bakholelwa bona iBhayibhili iliLizwi lakaZimu nokobana ngilo kwaphela elisitjela loke iqiniso ngoJesu.a—2 KuThimothi 3:16.

Esihlokweni esilandelako, sizokucoca ngeempendulo zeminye iimbuzo yeBhayibhili evamileko ngoJesu. Yena ngokwakhe wathi indlela eya ekusindisweni ivulekele woke ‘okholwa nguye.’ (Jwanisi 3:16) Sikumema bona uhlole iimpendulo bese uzenzele isiqunto ngokwakho bonyana uyakutlhoga ukufunda okungeziweko ngoJesu nendlela ongatjengisa ngayo ikholo kuye.

[Umtlolo waphasi]