“UnguZimu . . . WabaPhilako”

Inga-kghani ukufa kunamandla kunoZimu? Akusinjalo! Ukufa—nofana elinye “inaba”—kungaba njani namandla ukudlula “uZimu Umninimandla woke”? (1 Korinte 15:26; Eksodosi 6:3) UZimu unamandla wokususa ukufa ngevuko, begodu uthembisa bonyana uzokwenza lokho ephasini lakhe elitjha.a Isithembisweso siliqiniso kangangani? INdodana kaZimu uJesu, isitjela lokhu ngamezwi azokuzalisa iinhliziyo zethu ngethemba.—Funda uMatewu 22:31, 32.

Nekakhuluma nabaSadusi, egade bangakholelwa evukweni, uJesu wathi: “Malungana nevuko labahlongakeleko, akhenge nifunde na lokho okwakhulunywa nguZimu kini, athi, ‘nginguZimu ka-Abrahama noZimu ka-Isaka noZimu kaJakobho’? UnguZimu, ingasi wabahlongakeleko, kodwana wabaphilako.” La uJesu bekaqalise ekulumweni uZimu aba nayo noMosisi emthini ovuthako eminyakeni yabo-1514 B.C.E. (Eksodosi 3:1-6) Ngokuya ngoJesu, amezwi uJehova awatjela uMosisi athi—“NginguZimu ka-Abrahama noZimu ka-Isaka noZimu kaJakobho”—atjengisa bona isithembiso sevuko sizokuzaliseka kwamambala. Njani?

Kokuthoma cabangela umongo. Lokha uJehova nekakhuluma noMosisi, ihloko yembeleko u-Abrahama, u-Isaka noJakobho besele kukade bahlongakala—u-Abrahama besele kuminyaka ema-329, u-Isaka ema-224, uJakobho eli-197. Nanyana kunjalo, uJehova wathi “ngingu”—ingasi “bengingu”—Zimabo. UJehova wakhuluma ngeenhloko zembeleko eentathwezi njengokungathi zisaphila. Kubayini?

UJesu wahlathulula: “[UJehova] unguZimu, ingasi wabahlongakeleko, kodwana wabaphilako.” Akhe ucabange kancani ngomlayezo wamezwi layo. Nengabe belingekho ivuko, ngalokho u-Abrahama, u-Isaka, noJakobho bebazokuhlala unomphela ekufeni. Nengabe bekunjalo, uJehova bekazokuba nguZimu wabahlongakeleko. Lokho, bekuzokutjho bona ukufa kunamandla kunoJehova—kube ngasuthi akanamandla wokutjhaphulula iinceku zakhe ezithembekileko ekufeni.

Ngalokho-ke, singaphetha ngokuthini ngo-Abrahama, u-Isaka, uJakobho, nangazo zoke iinceku zakaJehova ezahlongakalako? UJesu watjho umlayezo onamandla lo: ‘Phambi kwakhe boke bayaphila.’ (Luka 20:38) Kwamambala, ihloso kaJehova yokuvusa iinceku zakhe ezithembekileko ezahlongakalako iqiniseke kangangobana ucabanga ngazo njengeziphilako. (Roma 4:16, 17) UJehova ubulunge boke abanjalo emkhumbulwenakhe opheleleko bekube sikhathi sokubabuyisela ekuphileni.

Inga-kghani ithemba lokuhlangana nabathandekako bakho abahlongakalako liyaphila? Nengabe kunjalo, khumbula bona uJehova unamandla ukudlula ukufa. Ayikho into engamvimbela bona azalise isithembiso sakhe sokuvusa abahlongakeleko. Kubayni ungafundi okungeziweko ngesithembiso sevuko noZimu ozosizalisa? Ukwenza njalo kuzokutjhideza hlanu kwakaJehova, “uZimu . . . wabaphilako.”