UPitrosi No-Ananiyasi BaKhuluma AManga—Ngisiphi Isifundo Esingasifunda?

Njengombana wazi, amanga yinto oyikhuluma wazi kuhle bona awukhulumi iqiniso. Wakhe wawakhuluma amanga?—a Ngitjho nabantu abakhulu abathanda uZimu bakhe bawakhuluma. Kungenzeka wakhe wezwa ngomuntu okukhulunywa ngaye eBhayibhilini owakhe wakhuluma amanga. Ibizo lakhe nguPitrosi, omunye wabapostoli bakaJesu abayi-12. Akhe sizwe bona kubayini akhuluma amanga.

Ngemva kobana uJesu abotjhwe, usiwa ekhaya lompristi omkhulu. Kungamarimarima. UPitrosi ungena ngesirhodlweni emzini wompristi angabonwa. Asemkhanyweni womlilo, isisebenzi somntazana sompristi omkhulu esangenisa uPitrosi sambona. Sathi: “Nawe gade unoJesu weGalile.” UPitrosi athukiwe wathi awa angimazi.

IBhayibhili ithi ngemva kwesikhathi ‘wabonwa ngomunye godu umntazana.’ Wathi: “Umrhali lo gade anoJesu.” Godu uPitrosi wala. Ngemva kwesikhatjhana, abanye nabo baya kuPitrosi bathi: “Ngambala ungomunye wabo.”

UPitrosi uthukiwe. Ngalokho, uphika kwesithathu godu uthi: “Angimazi umuntu lo!” Umkukurumbu uyalila. UJesu uqala uPitrosi, uPitrosi ukhumbula bona ema-awareni ambalwa ngaphambili uJesu wamtjela bona: “Ngaphambi kobana umkukurumbu ulile, uzabe sele ungilandule kathathu.” UPitrosi ukhihla isililo. Uzwa ubuhlungu!

Into enje ingenzeka kuwe?—Kungenzeka usesikolweni uzwa abafundi bakhuluma ngaboFakazi bakaJehova. Omunye uthi: “Abayivumi ingoma yesizwe.” Omunye uyangezelela: “Abayilweli inarhabo.” Nomunye godu uthi, “Abasiwo amaKrestu weqiniso ngombana abamgidingi uKresmusi.” Bese omunye ujikela kuwe akubuze, “Nawe ungomunye waboFakazi bakaJehova, angitjho?” Ungathini?—

Ngaphambi kobana into enje yenzeke, kufuze uhlale ukulungele ukunikela ipendulo ehle. UPitrosi bekangakakulungeli. Nekufika ukugandeleleka, wakhuluma amanga! Nokho, wezwa ubuhlungu khulu ngento ayenzako, kodwana uZimu wamlibalela.

U-Ananiyasi, omunye umfundi kaJesu wekhulu lokuthoma, naye wakhuluma amanga. Kodwana uZimu akhenge abalibalele banomkakhe uSafira. Wavumelana nendodakwakhe bona bakhulume amanga. Akhe sibone bona kubayini uZimu angakhenge alibalele u-Ananiyasi noSafira.

Ngemva kwamalanga alitjhumi uJesu atjhiye abapostoli wabuyela kuZimu ezulwini, abantu abazi-3 000 babhabhadiswa eJerusalema. Abanengi bebabuya eenarheni ezikude ukuzokugidinga uMnyanya wePentekoste, begodu ngemva kobana babe bafundi bakaJesu, bafuna ukuhlala isikhatjhana bona bafunde okungeziweko ngekholo labo elitjha. Ngalokho abanye babafundi bakaJesu basebenzisa imalabo bona babatlhogomele.

U-Ananiyasi nomkakhe bathengisa indawo bona bafumane imali yokusiza abaqeda ukubhabhadiswa. U-Ananiyasi nekaletha imali ebapostolini, wathi ngiyo yoke imali ayifumeneko. Kodwana akusinjalo! Wazibekela enye imali! UZimu wenza bona uPitrosi azi ngentwele, ngalokho uPitrosi watjela u-Ananiyasi wathi: “Awukakhulumi amanga ebantwini kodwana kuZimu!” Ngesikhatheso u-Ananiyasi waduleka phasi wafa! Pheze ngemva kwama-awara amathathu, kungena umkakhe. Angazi bona kwenzekeni endodenakhe, naye wakhuluma amanga, waduleka phasi wafa.

Qala bona sifundo esinamandla kangangani lesi: Ukukhuluma iqiniso kuqakathekile! Kwamambala, soke kufuze sifunde kilokhu! Nokho, soke siyayenza imitjhapho, khulukhulu nesisesebancani. Akukuthabisi na ukwazi bona uJehova uyakuthanda begodu uzakulibalela njengoPitrosi?— Kodwana khumbula, kufuze sikhulume iqiniso. Nengabe senza umtjhapho omkhulu wokukhuluma amanga, kufuze sibawe, sirabhele uZimu bona asilibalele. Kungenzeka ngikho lokho uPitrosi akwenzako, begodu walitjalelwa. Nesilinga ngamandla bona singasawakhuluma amanga, nathi uZimu uzosilibalela!