IMIBUZO YEBHAYIBHELI IYAPHENDULWA

Kghani uZimu ulalela yoke imithandazo?

UZimu ulalela abantu abavela kizo zoke iintjhaba. (IRhubo 145:18, 19) IliZwi lakhe iBhayibheli, lisikhuthaza bona sikhulume naye ngananyana yini esitshwenyako. (Filipi 4:6, 7) Nanyana kunjalo, eminye imithandazo ayimthabisi uZimu. Ngokwesibonelo, ukubuyelela imithandazo etjhiwo ngehloko akumthabisi.—Funda uMatewu 6:7.

Godu, uJehova akayithandi imithandazo yabantu abangawutjheji ngamabomu umthethwakhe. (IzAga 28:9) Ngokwesibonelo, ngeenkhathi zeBhayibheli, uZimu wabhala ukulalela ama-Israyeli ebekanomlandu wokubulala. Kuyakhanya bona kufuze sihlangabezane neemfuneko ezithileko bona uZimu asizwe.—Funda u-Isaya 1:15.

Khuyini okufuze siyenze bona uZimu asizwe?

Angeze satjhidela kuZimu ngomthandazo ngaphandle kwekholo. (Jakopo 1:5, 6) Kufuze sikholelwe bona ukhona begodu uyasikhathalela. Singaqinisa ikholo lethu ngokufunda iBhayibheli ngombana ikholo lamambala lisekelwe ebufakazini nesiqinisekweni esifumaneka eliZwini lakaZimu.—Funda amaHebheru 11:1, 6.

Kufuze sithandaze ngokuthembeka nangokuthobeka. Ngitjho neNdodana kaZimu, uJesu, bekathobekile nakathandazako. (Lukasi 22:41, 42) Ngalokho, kunokobana sitjele uZimu bona enzeni, kufuze silinge ukuzwisisa iimfuneko zakhe ngokufunda iBhayibheli. Ngemva kwalokho singathandaza ngokuvumelana nentando kaZimu.—Funda 1 Jwanisi 5:14.

Bona ufumane imininingwana engeziweko, qala isahluko 17 sencwadi le, Khuyini Kwamambala Okufundiswa YiBhayibhili?, egadangiswa boFakazi bakaJehova

Ungayidawnloda ku-www.jw.org/nr