IMIBUZO YEBHAYIBHELI IYAPHENDULWA

Kghani Kwamambala IBhayibheli LiliZwi LakaZimu?

Ungalindela bona iliZwi lakaZimu lihluke, kunjalo ngeBhayibheli. Kugadangiswe amabhiliyoni wamakhophi walo ngamakhulu wamalimi. Ukuhlakanipha okuseBhayibhelini kunamandla wokutjhugulula abantu babe ngcono.​—Funda yo-1 Thesalonika 2:​13; 2 Thimothi 3:16.

Siyazi bona iBhayibheli livela kuZimu ngombana libikezela ngokunembileko ngengomuso. Akekho umuntu ongakwenza lokho. Ngokwesibonelo, cabanga ngencwadi ka-Isaya. Kwafunyanwa ikhophi yalo ngerholweni eseduze neLwandle eliFileko eyenziwa emakhulwini weminyaka ngaphambi kokubelethwa kwakaJesu. Ithi umuzi weBhabhiloni ngeze usaba nabantu abahlala kiwo. Lokho kwenzeka eminyakeni eminengi ngemva kwekonzo kaJesu yephasini.​—Funda u-Isaya 13:19, 20; 2 Pitrosi 1:20, 21.

Latlolwa Njani IBhayibheli?

IBhayibheli latlolwa hlangana nesikhathi esiminyaka eyi-1 600. Abatloli beBhayibheli abama-40 batlola ngesihloko sinye ngaphandle kokuphikisana. Kwenzeka njani lokho? Bebaqondiswa nguZimu.​—Funda ye-2 Samyela 23:2.

Ngezinye iinkhathi uZimu wakhuluma nabatloli beBhayibheli asebenzisa iingilozi, imibono, nofana amabhudango. Ngokujayelekileko uZimu wafaka imibono yakhe emikhumbulweni yomtloli begodu amvumele bona akhethe amezwi angawasebenzisa bona atlole umlayezo kaZimu.​—Funda IsAmbulo 1:1; 21:3-5.