IMIBUZO YEBHAYIBHELI IYAPHENDULWA
Liyini ILanga LokwaHlulela?
Kubayini ilanga lokwahlulela lizokuba sikhathi esithabisako?
Ngeenkhathi zeBhayibheli, uZimu wasebenzisa abahluleli bona bavikele abantu bakhe ekungabini nobulungiswa. (AbaKhokheli 2:18) IBhayibheli lihlathulula iLanga elizako lokwaHlulela njengesikhathi esithabisako, lokha uJehova umahluleli wephasini loke, azokusindisa abantu ekungabini nobulungiswa.—Funda IRhubo 96:12, 13; Isaya 26:9.
UZimu ukhethe uJesu bona anikele abaphilako nabafileko ubulungiswa. (IzEnzo 10:42; 17:31) Abantu abanengi bahlongakele bangamazi uZimu. Hlangana neLanga lokwaHlulela, uJesu uzokuvusela abantu abanjalo ekuphileni, ukwenzela bona bazi bebathande uZimu weqiniso.—Funda IzEnzo 24:15.
Kubayini ILanga LokwaHlulela Lizokuthatha Iminyaka Eyikulungwana?
Hlangana neminyaka eyikulungwana, abafileko bazokuvuswa. (IsAmbulo 20:4, 12) Bazokutlhoga isikhathi ukuthi bafunde ngeendlela zakaZimu nokumlalela. Ngokungafaniko neembono yabantu evamileko, iBhayibheli litjengisa ukuthi abantu bazokwahlulelwa ngokwalokho abazokwenza ngemva kokuvuswa kwabo.—Funda kwebeRoma 6:7.
IBhayibheli godu likhuluma ngelanga lokwahlulela elizokwenzeka msinyana ngaphambi kokuthoma kweminyaka eyikulungwana. Ilangelo libizwa nangokuthi siphelo, njengombana kucocwe ngalo esihlokweni sangaphandle somagazini lo. Ngelangelo, uZimu uzokususa boke abangamhloniphiko, abantu abambi. (2 Pitrosi 3:7) Yeke, kufuze sizimisele ukutjengisa ithando lethu ngoZimu.—Funda 2 Pitrosi 3:9, 13.