Ungahlanganyela Ekonzweni NgaboSondarha?
1. Singafundani ezenzweni zakaPowula nabangani bakhe eFilipi?
1 BekuyiSabatha, ilanga amaJuda amanengi eFilipi egade aphumula ngalo. UPowula nabangani bakhe bebavakatjhele umuzi loyo phakathi nelinye ikhambo labo leenthunywa zevangeli. Akekho obekangabasola ngokuthatha isikhathi esifanelekwesi sokuphumula ekonzwenabo mhlokho. Nokho, bebazi bona amaJuda bekahlangana ngaphandle komuzi bona athandaze, ngalokho-ke basebenzisa ithubelo bonyana bawatjhumayeze. Kungenzeka bona uPowula nabangani bakhe bathaba khulu uLidiya nekalalelako nomzakhe woke ubhabhadiswa. (IZe. 16:13-15) Njengombana abanengi namhlanje baphumula ngoSondarha, kubayini singasebenzisi ingcenye yelangeli ukubatjhumayeza?
2. Ngibuphi ubudisi abantu bakaJehova ababuhlulako bona sikghone ukutjhumayela ngoSondarha ngaphandle kokutshwenywa?
2 Ipi Yokutjhumayela NgoSondarha: Phakathi no-1927, abantu bakaJehova bakhuthazwa bona basebenzise ingcenye yakaSondarha omunye nomunye ekonzweni. Lokhu kwaphumela ekuphikisweni. Abanengi e-United States babotjhwa ngokuphula umthetho weSabatha, ukuthikazisa ukuthula nokuthengisa ngaphandle kwemvumo. Kodwana abantu bakaJehova akhenge balise ukutjhumayela. Ngabo-1930, bahlela “ijima lesiqhema,” lapho abarhuweleli abasemabandleni aseduze bahlangana bona bahlanganise isimu. Ngesikhathi abarhuweleli ebebabotjhwe ngaso, abasemagunyeni abazange bakwazi ukuvimbela abanengi babo. Uyakuthabela kwamambala lokho abazalwanaba abakwenzako bona sikghone ukutjhumayela ngoSondarha ngaphandle kokutshwenywa?
3. Yini eyenza uSondarha abe lilanga elihle lokuhlanganyela ekonzweni?
3 Ilanga Elihle Lokutjhumayela: Abantu abanengi abasebenzi ngoSondarha. Kanengi basuke baphumulile. Abanengi abasondako bangathanda ukukhuluma ngoZimu ngelangeli. Nengabe umhlanganwethu ungoSondarha, sesimbethe ngendlela esimbatha ngayo ekonzweni, ngalokho-ke kubayini singahleli ukuya ekonzweni yesimini ngaphambi namtjhana ngemva komhlangano? Nekutlhogekako, yenza ukudla okuncani ongakhamba nakho.
4. Ngiliphi ithabo esingaba nalo nengabe sihlanganyela ingcenye yakaSondarha ekonzweni?
4 Nengabe sisebenzisa ingcenye yakaSondarha ekonzweni, sisesenaso isikhathi sokwenza okhunye esifuna ukukwenza. Ukuphumula kwethu kuzokuba nokwaneliseka okuvela ekuhlanganyeleni ekonzweni ecwengileko. (Iziy. 19:23) Kungenzeka sifumane nethabo lokuthola umuntu ofana noLidiya!