Ifanelo Eqakatheke Kinazo Zoke Yomfundisi Omuhle
1. Ngiyiphi ifanelo eqakatheke kinazo zoke yomfundisi omuhle?
1 Yini eyenza umuntu abe mfundisi weBhayibhili omuhle? Yifundo yephasi? Okuhlangabezanwe nakho? Namtjhana makghono wemvelo? Eqinisweni, yifanelo efanako naleyo ekuzaliseka koMthetho, elitshwayo labafundi bakaJesu, begodu evelele nethandeka khulu eemfanelweni zakaJehova eziyihloko. (Jwa. 13:35; Gal. 5:14; 1 Jwa. 4:8) Lithando. Abafundisi abahle batjengisa ithando.
2. Kubayini kuqakathekile bona sithande abantu?
2 Thanda Abantu: UMfundisi Omkhulu, uJesu, watjengisa ithando ngabantu, begodu lokho kwabatjhukumisela bona bamlalele. (Luka 5:12, 13; Jwa. 13:1; 15:13) Nesitshwenyeka ngabantu, sizokusebenzisa nanyana ngiliphi ithuba elivelako bona sifakaze kibo. Iinqabo ezinjengokutjhutjhiswa nokungatjhejwa ngeze zisiqede amandla. Sizokutjengisa ikareko yomuntu mathupha yamambala kilabo esibatjhumayezako, begodu sizokwenza indlela esitjhumayela ngayo ihlangabezane neentlhogo zabo. Sizozimisela ukusebenzisa isikhathi sethu ingasi kwaphela nesinomfundi weBhayibhili ngamunye kodwana nalapho silungiselela isifundo ngasinye ngaphambi kobana sisirage.
3. Ithando ngamaqiniso weBhayibhili lizosisiza njani ekonzweni?
3 Thanda Amaqiniso WeBhayibhili: Godu uJesu bekawathanda amaqiniso weBhayibhili awaqala njengamagugu. (Mat. 13:52) Nesilithanda iqiniso, sizokukhuluma ngetjiseko, begodu lokhu kungathabisa abalaleli bethu. Ithando elinjalo lizosisiza sidzimelele ekwazisweni okuqathekileko esikudlulisako kunokutshwenyeka ngokulinganiselwa kwethu, ngalokho ngeze saba nevalo khulu nesisekonzweni.
4. Singalihlawulela njani ithando?
4 Hlawulela Ithando: Singakuhlawulela njani ukuthanda abantu? Ngokucabanga ngethando uJehova neNdodanakhe abalitjengisileko nobujamo obungokomoya obutlhuwisako babantu abasesiminethu. (Mar. 6:34; 1 Jwa. 4:10, 11) Ithando lethu ngamaqiniso weBhayibhili lizokudepha nesiba nesifundo somuntu mathupha saqobe begodu sicabangisisa ngokudephileko. Ithando liyingcenye yesithelo somoya. (Gal. 5:22) Ngalokho singarabhela uJehova bona asiphe umoyakhe ocwengileko simbawe nokobana asisize sikhule ethandweni. (Luka 11:13; 1 Jwa. 5:14) Kungakhathaliseki bona sifunde kangangani, sinokuhlangabezanwe nakho okungangani eqinisweni, namatjhana amakghono wemvelo, singaba bafundisi beBhayibhili abaphumelelako ngokuba nethando.