Khuyini Esenza Bona SiTjhumayele?
1. Ngikuphi ukuhlobana okukhona hlangana kwethando nekonzwethu?
1 Ukutjhumayela iindaba ezimnandi zomBuso kaZimu kumsebenzi oqakatheke khulu esingawenza namhlanjesi. Liqiniso, ngomsebenzi lo, sitjengisa ukulalela imiyalo emibili emkhulu, ithando ngoJehova nangabomakhelwana bethu. (Mar. 12:29-31) Ithando limamandla asitjhukumisela bona sibe ziinkhonzi ezitjhisekako.—1 Jw. 5:3.
2. Ukutjhumayela kulitjengisa njani ithando lethu ngoJehova?
2 IThando NgoJehova: Ithando ngoMnganethu omkhulu uJehova lisenza bona sikhulume ngaye. Sekuminyaka epheze ibe zi-6 000 asolo anyefulwa nguSathana. (2 Ko. 4:3, 4) Ngalokho, abantu bakholelwa bona uZimu uhlunguphaza izoni esirhogweni somlilo, unguZiquntathu orarako nokobana akanandaba nabantu. Abanengi baphetha ngokobana akekho. Qala bona sifuna kangangani bonyana abantu bazi iqiniso ngoBabethu wezulwini! Imizamwethu yokusebenza budisi bona sibe bofakazi kwenza uZimu athabe begodu kudanisa uSathana.—IzA. 27:11; Heb. 13:15, 16.
3. Kungayiphi indlela ikonzwethu itjengisa ithando ngabomakhelwana?
3 IThando Ngabomakhelwana: Isikhathi ngasinye nesitjhumayela kothileko, sitjengisa bona siyamthanda. Abantu batlhoga khulu ukuzwa iindaba ezimnandi hlangana neenkhathezi ezibudisi. Inengi labo linjengabantu beNiniva bangesikhathi sakaJona “abangazi bonyana emuva kukuphi naphambili kukuphi.” (Jon. 4:11) Ikonzwethu ifundisa abantu indlela ehle yokuphila nethabisako. (Isa. 48:17-19) Ibanikela ithemba. (Rom. 15:4) Nebalalelako begodu benze ngokuvumelana nalokho abakufundako, “bazokusindiswa.”—Rom. 10:13, 14.
4. Yini uJehova angeze ayilibala?
4 Abantwana abalalelako abatjengisi ithando kubabelethi babo ngeenkhathi ezihleliweko kwaphela. Bazimisele ukubathanda ngeenkhathi zoke. Ngokufanako, ithando lamambala ngoZimu nangabomakhelwana lizosenza bona sifune amathuba wokufakaza ngaso soke isikhathi, ingasi ngeenkhathi ezihleliweko zokufakaza. Sizokutjhumayela ngaphandle kokulisa. (IzE. 5:42) UJehova angeze alilibala ithando elinjalo.—Heb. 6:10.