INcwadi Evela EsiHlopheni EsiBusako

Banakwethu Nabodade Esiziinsebenzi Esikunye Nazo:

Qala bona kulithabo kangangani ukunitlolela ekuthomeni komnyaka oqakathekileko lo! Ngekupheleni kwaka-2014, kuzabe sekudlule iminyaka elikhulu yoke iKosethu ethandekako uJesu Krestu yathoma ukubusa hlangana namanabayo.—Rhu. 110:1, 2.

Ekuthomeni komnyaka wekonzo lo, emhlanganweni waqobe mnyaka we-Watch Tower Bible and Tract Society of Pennsylvania, i-New World Bible Translation Committee yatjhaphulula itjhugululo etjha yeBhayibheli ebuyekeziweko yesiNgisi esezingeni eliphameko bona ifumaneke ebantwini. UJehova wasebenzisa amadodanakhe azeswe ngomoya bona asilungiselele i-New World Translation yokuthoma. (Rom. 8:15, 16) Iqinisweli lilodwa lenza itjhugululweli libe ngelikhetheke khulu, awuvumi na?

Sekuminyaka eemnengi iKomidi yokuTlola yesiHlopha esiBusako yenza ukutjhugululwa kweBhayibheli kwaba yinto eza qangi. Namhlanje, i-New World Translation ifumaneka ngokwengcenye namkha iphelele ngamalimi ali-121. Sikukhuthaza bona utjengise uJehova ukuthi uyithabela kangangani iBhayibheli onayo. Ifunde begodu uzindle ngayo qobe langa. Ngokwenza njalo, uzokutjhidela kumTloli wayo, uJehova uZimu.—Jak. 4:8.

Siyathinteka nesizwa ngeenlingo abanakwethu nabodade abaligugu abaqalana nazo. Kuyazwisiseka bona ngezinye iinkhathi bangakufumana kubudisi ukuthaba nabanakwabo. Ngokwesibonelo, omunye umndeni we-Asia mva nje ukuphila kwawo kwahlangahlangana lokha umma wakhona nakarholophala kungakalindeleki. Ziphelelwe mamano, izazi zezokwelapha akhange zikghone ukumlapha. Qala bona kudanisa kangangani! Okwanje indodakwakhe imtlhogomela ubusuku nemini. Indodanabo namadodakazawo amabili abeka isibonelo esihle njengemaKrestu ngokunikela ababelethi babo ithando nesekelo. Umndeni omuhle lo kuhlanganise nani noke eniqalana neenlingo ezihlukahlukaneko ngokuphumeleleko ningezwa ithabo elifumaneka ngokukhuthazelela ukulingwa kwekholo lenu. (Jak. 1:2-4) UJehova uqinisekisa abazesiweko bakhe nezinye izimvu bona sizokuthaba bonyana saragela phambili sikhuthazelela iinlingo, ngombana sizokubusiswa ngesipho sokuphila okungapheliko!—Jak. 1:12.

Ngomnyaka ogadungileko egade bakhona esiKhumbuzweni bazi-19 241 252. Qala bona kukhuthaza kangangani ukubona inengi lidumisa uJehova noJesu Krestu ngokuba khona emhlanganweni oqakatheke kunayo yoke emnyakeni ebantwini bakaZimu! Ngesikhathi sesiKhumbuzo, idumo elikhulu laya kuJehova njengombana iingidi zangenela ubuphayona besigiyani ngoMatjhi nango-Apreli. Qala bona lokho kukhuthaza kangangani! Kghani bewungakathabi ukuzwa bona labo abangenele ubuphayona besigiyani ngesikhathi sokuvakatjhelwa mbonisi wesifunda bangathabela ukuba khona emhlanganweni azowuraga, ngitjho nanyana ukukhambela kwakhe kungasi ngeenyanga zakaMatjhi no-Apreli? Abantu abangokomoya bayakuzwisisa ukuqakatheka kokuhlala bamajadu emsebenzini wokutjhumayela nemisebenzini yebandla. Ukuba majadu kusisiza sidzimelele besingasikinyeki, sivimbele iinlingo zakaDeveli bona zibogabogise ikholo lethu begodu zisiphambukise.—1 Kor. 15:58.

Qala bona kuqabula kangangani ukubona bonyana ngomnyaka ogadungileko wekonzo, abazi-277 344 babonisa ukuzinikela kwabo ngokubhajadiswa emanzini begodu okwanje basendleleni eya ekuphileni kuhlanganise nabanakwabo bephasini loke! (Mat. 7:13, 14) Abantu abatjhaba batlhoga isekelo lethu bona ‘baqine ekukholweni.’ (Kol. 2:7) Ragelani phambili nikhuthazana bona nibambelele bekube sekupheleni. (Mat. 24:13) “Nikhuthaze abaneenhliziyo ezibuthakathaka, nisize ababogabogako, yibani nesineke ngabo boke.” (1 Thes. 5:14) Emaswaphelani, kwanga ngamunye wethu ‘angathandaza njalo angalisi,’ athi: “UmBuso wakho awufike.”—1 Thes. 5:17; Mat. 6:10.

Kwanga ningayithabela ukuyifunda iNcwadi Yonyaka le, begodu nazi bona sithanda ngamunye wenu nina noke bathandi bakaJehova!