Hlawulela Ukubamba Isikhathi
1. Ngisiphi isibonelo uJehova asibekela sona malungana nokubamba isikhathi?
1 UJehova uhlala asibamba isikhathi. Ngokwesibonelo, unikela iinceku zakhe ‘isizo ngesikhathi esifaneleko.’ (Heb. 4:16) Godu usilungiselela ukudla okungokomoya “ngesikhathi esifaneleko.” (Mat. 24:45) Ngalokho, singaqiniseka bona ilanga lakhe letukuthelo elizako ‘angeze liriyade.’ (Rhab. 2:3) Qala bona sizuza kangangani ngokubamba isikhathi kwakaJehova! (Rhu. 70:6; [70:5 NW]) Nanyana kunjalo, njengombana simajadu begodu singakapheleli ukubamba isikhathi kungaba sitjhijilo esikhulu. Kubayini kufuze sihlawulele ukubamba isikhathi?
2. Kubayini ukubamba isikhathi kudumisa uJehova?
2 Ukubamba isikhathi sekuyinto engakajayeleki emihleni yokuphela le lapho abantu abanengi bangabazithandako begodu abangakwazi ukuzibamba. (2 Thim. 3:1-3) Ngalokho amaKrestu nekafika ngesikhathi emsebenzini, nekayokuhlangana nothileko, nemihlanganweni, abanye bayatjheja, begodu lokhu kudumisa uJehova. (1 Pit. 2:12) Kghani ngokuvamileko sifika ngesikhathi emsebenzini wokuziphilisa, kodwana kufumaneke bona kanengi siba lada eentweni ezingokomoya? Ukufika ngesikhathi emihlanganweni yobuKrestu, kuhlanganise nokuhlanganyela engomeni yokuvula nomthandazo, kutjengisa isifiso sokulingisa uBabethu wezulwini ohlelekileko.—1 Kor. 14:33, 40.
3. Kubayini ukubamba isikhathi kutjengisa ukucabangela abanye?
3 Godu ukubamba isikhathi kutjengisa ukucabangela abanye. (Flp. 2:3, 4) Ngokwesibonelo, nesifika ngesikhathi emihlanganweni yobuKrestu, kuhlanganise neyekonzo yesimini, abakhulekeli esikunye nabo abaphazamiseki ngokungatlhogekiko. Ngakalinye ihlangothi, nesijayele ukuba lada, kwenza abanye bacabange bona siqala isikhathi sethu njengesiqakatheke khulu kunesabo. Ukubamba isikhathi kutjengisa ukuthembeka, ukukhuthala—okuziimfanelo ezithatjelwa khulu ngilabo esiphila nabo.
4. Nasivame ukuba lada, singalungisa njani?
4 Nengabe ngokuvamileko uba lada, cabangisisa bona kubayini. Zihlophise ngokwenza ihlelo elisebenzako elizokusiza bona uqede imisebenzi ngesikhathi esifaneleko. (UmTj. 3:1; Flp. 1:10) Bawa uJehova akusize. (1 Jwa. 5:14) Ukubamba isikhathi ngenye indlela esingatjengisa ngayo ukuthokozela imiyalo eembili emkhulu yomThetho—wokuthanda uZimu nokuthanda umakhelwana.—Mat. 22:37-39.