Khumbulani Labo Abahlala Emakhaya Atlhogomela Abalupheleko Nabarholopheleko

1. Kubayini kunetlhogeko yokuhlanganyela iindaba ezimnandi nalabo abahlala emakhayeni wokutlhogomela abalupheleko nabarholopheleko?

¹ Abantu abanengi baqalene nobuhlungu bokukhula ngeminyaka. (UmTj. 12:1-7) Abanye abalupheleko bahlala emakhaya wokutlhogomela abalupheleko nabarholopheleko, begodu akusilula ukubathola nasitjhumayela umuzi nomuzi. Lokhu kwenzeka neendaweni lapho ababelethi abalupheleko kanengi bakhamba bayokuhlala nabantwababo namkha neenhlobo zabo. Nanyana kungenzeka abanawo amandla kuhle namkha umkhumbulwabo uyabogaboga, abalupheleko nabanye abahlala emakhaya wokutlhogomela abalupheleko nabarholopheleko bangakwazi ukufunda nokuthanda uJehova. Singakghona njani ukuhlanganyela nabo iindaba ezimnandi ‘zethemba elibusisiweko’?—Tit. 2:13.

2. Singalithola njani irhelo lamakhaya wokutlhogomela abalupheleko nabarholopheleko?

² Esingakwenza: Kanengi irhelo leendawo zabalupheleko nabarholopheleko zingatholakala ngokuzifuna encwadini yeenomboro zomtato. Qala isigaba esinjengokuthi “nursing home,” “group homes,” “ne-residential-care facilities.” Umbonisi wekonzo angadosa phambili ekuhleleni bona kuba nabarhuweleli abafanelekako bavakatjhele indawo enye nenye. Nanihlela kuhle nithembela nakuJehova, kuzokwenzeka bona nithome isifundo seBhayibheli sesiqhema.—IzA. 21:5; 1 Jwa. 5:14, 15.

3, 4. (a) Kufuze sikhulume nobani nasifuna ukuthomisa isifundo sesiqhema? (b) Singalihlathula njani ihlelo lesifundo?

³ Indlela isifundo esizokwethulwa ngayo kuzokuya ngendawo enikiyo. Eendaweni ezikulu ezinabantu abanengi neensebenzi ezinengi, kungcono nikhulume nothileko osebenza emnyango wokwamukela iinkhambi nibawe ukukhuluma nomnqophisi wendawo. Emakhayeni aneenqhema ezincani zabalupheleko—izindlu ezinabahlali abancani begodu nabatjheji ababili namkha abathathu—mhlamunye kungaba ngcono ukuhlela isikhathi esingcono sokukhuluma ngokunqophileko nomphathi wendawo.

⁴ Kunanyana ngibuphi ubujamo, bahlathululeleni bona nivolontiya ngesikhathi senu bona nizokukhuthaza abantu abathabela ukufunda nokucoca ngeendaba eziseBhayibhelini. Babuzeni ukuthi bakhona abahlali abangakuthabela ukuhlanganyela engcocweni yesiqhema yeBhayibheli ethatha imizuzu engaba ma-30 ngeveke. Ningasebenzisa iincwadi ezihlukahlukeneko ukwenza lokhu, kodwana abanengi bathole bona Incwadami Yeendaba ZeBhayibhili nethi Umuntu Omkhulu Kunabo Bonke Owake Waphila zisebenza kuhle. Kungaba kuhle ukutjengisa umnqophisi wendawo iincwadi eniziphetheko. Ilanga, isikhathi, nendawo yomhlangano ingahlelwa naye begodu ingapalagwa e-almanageni yendawo yokutlhogomela abalupheleko nabarholopheleko. Ungakhohlwa ukuziveza njengomunye waboFakazi bakaJehova. Ngesikhathi esifanako, qinisekisa umnqophisi bona awukazeli ukuzokuraga ikonzo yesondo, kodwana uzele ukuzokuthuthukisa ifundo yeBhayibheli.

5. Ngiziphi iimphakamiso ezizokwenza isifundo sibe mnandi besizuzise?

⁵ Ukuraga Isifundo SeBhayibheli: Indlela oraga ngayo isifundo kuzokuya ngobujamo bendawo, ngalokho vumelana nobujamo begodu wahlulele kuhle. Umnqophisi wesifundo kufuze eze namakhophi amanengi wencwadi ecatjangelwako begodu kufuze akhambe nawo ekupheleni kwesifundo. Kungaba kuhle ukuphathela abanye amakhophi wamagama amakhulu wendaba enizokucoca ngayo. Iingaba zingafundwa, nemibuzo ingabuzwa, neempendulo zinganikelwa ngendlela ejayelekileko esiyaziko. Abantu abafunako nabakghona ukufunda ungababawa bona bafunde iingaba namkha amavesi weBhayibheli. Hlangana nesifundo, ngeneka, uqiniseke, begodu ube nobungani. Ngemvumo yomnqophisi wendawo, ngezinye iinkhathi ungabatjengisa enye yamavidiyo wehlangano eqinisa ikholo eBhayibhelini namkha eveza amaphuzu amahle esifundweni esithileko esivela endabeni yeBhayibheli. Kungaba yinto ehle ukuvula nokuvala isifundo ngomthandazo omfitjhani. Abanye abarhuweleli bavuma neengoma zomBuso.

6. Ungakulungisa njani ukungavumelani?

⁶ Kuthiwani nangabe umhlali akavumelani nento efundwako namkha evezwe hlangana nesifundo? Sebenzisa ukuhlakanipha nawuphendulako. (Kol. 4:6) Mhlamunye ungacoca naye ngomtlolo weBhayibheli olihlathulula kuhle iphuzu elimtshwenyako. Nangabe kubonakala kubudisi, ngalokho kungaba ngcono ukuthokoza umbonwakhe be umbawe bona nicoce ngendabakhe ninodwa ngemva kwesifundo.

7. Khuyini ozoyenza nangabe umhlali unombuzo wakhe mathupha namkha utjengisa ikareko ekulu?

⁷ Ngasikhathi, umhlali angabuza umbuzo namkha aveze ikhanuko yokufunda okungeziweko. Omunye udade wasebenzisa indlela nasi: “Mbuzo omuhle khulu loyo. Kodwana njengombana lowo kumbuzo wakho mathupha, ngibawa khesilinde besiqede ukufunda. Ngalokho mina nawe sizokucoca ngendaba leyo.” Ngezinye iinkhathi kuyinto engenzeka ukuraga isifundo seBhayibheli somuntu mathupha nalabo abanekareko ngesinye isikhathi begodu nangenye indlela.

8. Kufuze zibalwe njani iimfundo zeenqhema nezinye iimfundo zeBhayibheli ezibakhona?

⁸ Kuhle bona aboFakazi abaraga isifundo sesiqhema besenze endaweni leyo ngaso soke isikhathi. Nanyana ngibaphi abarhuweleli abahlanganyelako bangasibika isikhathi. Nasele isifundo sithonyiwe, umrhuweleli oragako angabika ibuyelo elilodwa nesifundo seBhayibheli esisodwa qobe nyanga nakuragwa isifundo sesiqhema. Iimfundo zeBhayibheli ezithonywe nabahlali ezikghona ukuzwisisa nokufunda zingabalwa ngendlela ejayelekileko.

9, 10. Ngiziphi iimfanelo ezitlhogekako ekufuze labo abahlanganyela emsebenzini wokufundisa lo babe nazo? Hlathulula.

⁹ Sibulunge Siphila: Kungcono ukuba nelanga nesikhathi esihlelekileko sesifundo sesiqhema. Abahlali nabasebenzi bazokuthabela ukuthola isifundwesi qobe begodu sithome ngesikhathi siphele nangesikhathi. (Mat. 5:37) Ngalokho, ukuzibopha, ukuzimisela, nokuhleleka kuqakathekile. Okuhlangabezanwe nakho kutjengise bona kukuhlakanipha bona abarhuweleli ababili basebenze boke ekurageni isifundo sesiqhema. (UmTj. 4:9, 10) Eendaweni ezikulu, kungatlhogeka abarhuweleli abanengi.

¹⁰ Ukuba nobungani nokuba nekareko emntwini ngamunye kuqakathekile. (Flp. 2:4) Evakatjhweni lokuthoma, ziphe isikhathi sokuhlangana nabahlali abahlanganyelako esifundweni. Linga ukubakhumbula nokubamba amagamabo ngaphambi kobana kuthome isifundo. Nokho, abantu abalupheleko abathandi lokha umuntu nakababiza ngebizo labo lokuthoma. Ukubekezela nomusa kuzokwenza woke umuntu azizwe amukelekile begodu athabile.

11. Abaraga isifundo sesiqhema bangayitjengisa njani ihlonipho ebasebenzini nemalungwini womndeni ahlala endaweni leyo?

¹¹ Kuqakathekile ukuba nomoya wehlonipho nomusa ebantwini abasebenza lapho nemalungwini ahlala endaweni leyo. Nasele isifundo sithonyiwe, kuqakathekile bona isikhathi singatjhentjhwa ngaphandle kobana kukhulunyisenwe nomnqophisi wendawo. Buza umnqophisi qobe bona isifundo sikhamba njani. Nangabe amalungu womndeni ayavakatjha hlangana nesifundo, thatha igadango lokubazi mantangi. Bahlathulele umnqopho wokuba nesifundo seBhayibheli. Baqinisekise ngekareko yakho elungwini labo lomndeni. Babawe bona bahlale balalele isifundo.

12, 13. Landisa okuhlangabezanwe nakho okutjengisa iinzuzo zokufakaza eendaweni ezitlhogomela abalupheleko nabarholopheleko.

¹² Iimphumela: Ababonisi abakhambako namabandla athumela umbiko omuhle khulu ngekonzo le. Kobunye ubujamo, abahlali abangaba ma-20 bahlanganyela engcocweni yokuthoma yesifundo. Lokho kwenza kwaba neemfundo zeBhayibheli nabahlali abasithandathu. Omunye wabo wabhajadiswa. Kwenye indawo isifundo sakhuthaza ugogo weminyaka ema-85 bona azihlanganise nebandla lendawo begodu azinikele ngokubhajadiswa. Lokha elinye ikhaya elitlhogomela abalupheleko nabarholopheleko lihlanganisa imisebenzi yalo—lifuna nokuqeda isifundo sesiqhema esiragwa boFakazi bakaJehova—abahlali banghonghoyila kumnqophisi wekhayelo! Ngemva kwalokho isifundo saragela phambili begodu kwagcina sekuhlanganyela abantu abahlangana nama-25 nama-30.

¹³ Ithando esilitjengisa emakhayeni wokutlhogomela abalupheleko nabarholopheleko litjhiya umbono omuhle khulu ingasi ebahlalini bendawo kwaphela. Ngokwesibonelo, kuyinto ejayelekileko bona abasebenzi bahlale bahlanganyele esifundweni. Itjiseko esiyitjengisako ekutjhejeni ikareko eendlini ezitlhogomela abalupheleko nabarholopheleko inikela nobufakazi obuhle emphakathini. (1 Pit. 2:12) Enye indoda ngemva kobana bayihlathululele ngomnqopho wesifundwesi, yathi: “Benibanjwe yini? Singathoma nini?” Omunye umnqophisi wathi: “Ngingathanda ukunyula isiqhema sesifundwesi kinanyana ngiyiphi indawo etlhogomela abalupheleko nabarholopheleko. AboFakazi bakaJehova banikela ngekonzo yasimahla le njengomsebenzi wabo wokutjhumayela emphakathini.” Enye indawo etlhogomela abalupheleko nabarholopholeko eHawaii yanikela aboFakazi bakaJehova unongorwana weKonzo yokuziThandela ohlathulula amavolontiya ngokuthi “baligugu khulu” kilabo abahlala endaweni ezitlhogomela abalupheleko nabarholopheleko.

14. Kubayini sinekareko yokusiza abahlala emakhaya wokutlhogomela abalupheleko nabarholopheleko?

¹⁴ Abantu abalupheleko bamenywa nguJehova bona bazomdumisa. (Rhu. 148:12, 13) Isimemweso sibandakanya nalabo abahlala eendlini zokutlhogomela abalupheleko nabarholopheleko. Inga-kghani zikhona izindlu ezitlhogomela abalupheleko nabarholopheleko esimini yangekhenu bona bazuze ekuzweni iindaba ezimnandi? Ngesizo labadala bendawo, nabanqophisi bendawezi, singakghona ukunikela ubufakazi obuhle kilabo abaseendawenezi. Nasikhumbula labo abakhulako ngeminyaka, silingisa uJehova.—Rhu. 71:9, 18.