ISIHLOKO SAQOBE NYANGA: “Tjhumayela ilizwi,” unamazizo wokurhaba.—2 Thim. 4:2.
Sebenzisa Amathuba Wokurhatjha Umlayezo WomBuso!
1. Ngisiphi isifundo esingasifunda esibonelweni sakaDavida?
1 IKosi uDavida bekangasuye umuntu ovumela ubujamo bumbambe izandla. Ngokwesibonelo, uDavida bekafuna ukwakhela uJehova indlu. Wathi nakavinjelwako ukukwenza lokho, uDavida wahlela iminqophwakhe kabutjha. Wasiza uSolomoni bona afumane izinto zokwakha ithempeli. (1 Kho. 8:17-19; 1 Kron. 29:3-9) Kunokobana adzimelele kilokho ahlulwa kukwenza, uDavida wadzimelela kilokho angakghona ukukwenza. Thina-ke singamlingisa njani uDavida, njengombana sifuna iindlela zokutjhumayela umlayezo womBuso?
2. Ngikuphi ukuzihlola esingakwenza?
2 Yenza Ongakghona Ukukwenza: Abanengi benze ukuphila kwabo kwabalula ukwenzela bona bakwazi ukuba maphayona wesigiyani namkha wesikhathi esizeleko. (Mat. 6:22) Ungakwazi na ukwenza njengabo? Njengombana uhlolisisa ubujamo bakho ngomthandazo, ungabona nawe ukuthi ‘uvulekelwe mnyango omkhulu wokusebenza.’ Nakunjalo-ke, lisebenzise ithube lo!—1 Kor. 16:8, 9.
3. Ngimaphi amathuba wokufakaza esingawasebenzisa ngitjho nanyana ubujamo bethu bungasivumeli bonyana siphayone?
3 Kuthiwani nengabe ubujamo bakho abukuvumeli bona uphayone? Ungathomi uthathelephasi amanye amathuba afumanekako. Ngokwesibonelo, nengabe usebenza nabantu abangakholwako, kubayini ungabambi ithuba elivelako ubatjhumayeze? Nengabe uqalene nemiraro yepilo angeze na walinga ukusebenzisa amathuba avelako ufakaze kilabo abakulaphako? Khumbula bona kunelungiselelo elenzelwe abangasakghoni ukwenza okunengi ngebanga lepilo ebogabogako namkha ukuluphala, bonyana babike imizuzu eli-15 ekonzweni yesimini. Newubhala umbiko wakho wenyanga wekonzo yesimini, qiniseka bona ufake nesikhathi otjhumayele ngaso ngokungakahlelwa, iincwadi ozikhambisileko, amaphetjhana, namaphetjhana weememo zomhlangano nezesiKhumbuzo. Uzakumangala nawubona indlela isikhathi esihlangana ngayo ngebanga lamathuba amancani ebewuwasebenzisa!
4. Khuyini ozimisele ukuyenza?
4 Nanyana ubujamo bethu bungaba njani, kodwana asibambeni nanyana ngiliphi ithuba elivelako sifakaze iindaba ezimnandi. Ngalokho-ke sizokufumana ukwaneliseka ngokwazi ukuthi senza koke esingakwenza ngebanga lomBuso.—Mar. 14:8; Luk. 21:2-4.