Ukuraga Iimfundo ZeBhayibheli Eziphumelelako
1. Ngiwuphi umthwalo abarhuweleli abaraga iimfundo zeBhayibheli abanawo?
1 Akakho namunye ongakhonza uZimu ngaphandle kokuthi uJehova “amdosile.” (Jwa. 6:44) Nanyana kunjalo, abarhuweleli kufuze badlale indimabo basize abantu batjhidele kuYisabo wezulwini. (Jak. 4:8) Lokhu-ke kutlhoga ukulungiselela. Ukumane ufunde isigaba ngasinye bese ubuza umbuzo otlolwe phasi akukaneli bona kungasiza abafundi bafumane umlayezo bebathuthuke.
2. Khuyini engafezwa kuraga isifundo ngendlela ephumelelako?
2 Nabazakuraga iimfundo eziphumelelako, abarhuweleli kufuze basize abafundi babo bona (1) bazwisise lokho okufundiswa liBhayibheli, (2) bamukele lokho okufundiswa liBhayibheli, (3) benze nalokho okufundiswa liBhayibheli. (Jwa. 3:16; 17:3; Jak. 2:26) Kungathatha iinyanga ukufundisa umfundi ukwenza amagadango la. Yeke, igadango ngalinye litjho ituthuko ngobuhlobo bakhe noJehova nekuzinikeleni kuye.
3. Kubayini abafundisi abaphumelelako babuza imibuzo etlhoga umbono womfundi?
3 Khuyini Esengqondweni Yomfundi WeBhayibheli?: Nawuzakufumana ukuthi umfundi esifunda naye iBhayibheli uyazwisisa abe amukele lokho akufundako, kubalekele ukukhulumela butjhilweni, mkhuthaze kube nguye umfundi oveza amazizwakhe. (Jak. 1:19) Umfundi uyakuzwisisa na lokho iBhayibheli elikutjhoko endabeni enicoca ngayo? Angakghona na ukuhlathulula indaba leyo ngamezwakhe? Uzizwa njani ngalokho akufundileko? Kghani uyakukholelwa na ukuthi lokho okufundiswa liBhayibheli kuliqiniso? (1 Thes. 2:13) Uyakuzwisisa na ukuthi lokho akufundako kufuze kwenze umehluko endleleni aphila ngayo? (Kol. 3:10) Nasizakufumana iimpendulo zemibuzo enjalo, kufuze sibuze imibuzo etlhoga umbono womfundi ngokuhlakanipha, bese siyalalela.—Mat. 16:13-16.
4. Kufuze kwenziweni nengabe umfundi ukufumana kubudisi ukuzwisisa namkha ukusebenzisa lokho iBhayibheli ekufundisako?
4 Imikghwa nendlela umuntu acabanga ngayo kanengi kuba zizinto eziba neemirabho okungatlhoga isikhathi ukuzilisa. (2 Kor. 10:5) Kuthiwani-ke nengabe umfundi akakwemukeli namkha akakwenzi lokho afundiswa khona? Kutlhogeka isineke ukuvumela isikhathi esithileko bona sidlule, ukwenzela ukuthi iliZwi lakaZimu nomoya ocwengileko kusebenze ehliziyweni yomfundi. (1 Kor. 3:6, 7; Heb. 4:12) Nengabe umfundi ukufumana kubudisi ukuzwisisa nofana ukusebenzisa ifundiso yeBhayibheli, kunokumgandelela, kungcono ukudlulela kwenye indaba. Njengombana siragela phambili simfundisa iBhayibheli ngesineke nangethando, ngokukhamba kwesikhathi umfundi angakghwatheka enze amatjhuguluko atlhogekako.