INCWADI EVELA EmKhandlwini ONqophisako

Bafowethu Nabodade Abathandekako:

“Sihlala simthokoza njalo uZimu ngani noke; siyanikhumbula nemithandazweni yethu. Sikhumbula njalo phambi koZimethu nonguBaba, umsebenzenu weenthelo zokukholwa, ukutjhabatjheka kwenu okuvezwa lithando kanye nokubekezela kwenu ngebanga lethemba eninalo eKosinethu uJesu Krestu.” (1 Thes. 1:2, 3) Qala bona amezwi la ayiveza kuhle kangangani indlela esizizwa ngayo ngani! Sithokoza uJehova ngani nangomsebenzenu omuhle eniwenzako. Kubayini sitjho njalo?

Emnyakeni ogandungileko, benimajadu nenza ‘umsebenzi [wokwethembeka]’ ‘nokutjhabatjheka kwenu okuvezwa lithando’ malungana nemisebenzi yomBuso. Abanengi benu baqale iindlela abangandisa ngazo ikonzwabo. Abanye bathuthele kezinye iindawo, ngitjho nakezinye iinarha, ukuyokhonza lapho kunetlhogeko ekulu khona yabatjhumayeli bomBuso. Abanye bandise ikonzwabo ngokutjhumayela tjhatjhalazi. Abanengi bakhuthazwe kungenela ubuphayona besigiyani hlangana nesikhathi sesiKhumbuzo, hlangana nenyanga yokukhambela kombonisi wesigodi, namkha hlangana nejima elikhethekileko ngo-Arhostosi 2014. Nanyana ubujamo benu buhlukile, siyabona ukuthi nimsebenzela ngomphefumulo woke uJehova, begodu siyanibuka ngalokho. (Kol. 3:23, 24) Kwamambala ‘umsebenzenu [wokwethembeka]’ usizathu sokumthokoza uJehova!

Sithokoze kwamambala ‘nokutjhabatjhabeka kwenu kwethando’ malungana nomsebenzi wokwakha izakhiwo ezihlukahlukeneko ezingokwezulwini ephasini mazombe. Sizitlhoga ngokurhabako izakhiwezi, njengombana inani labantu bakaJehova liragela phambili ngokwanda. (Isa. 60:22) Akhucabange ngananzi iimbalo, emnyakeni ogadungileko lo inani eliphakemeko labarhuweleli abayi-8 201 545, kukulapho inani leemfundo zeBhayibheli eziyi-9 499 933 inyanga ngayinye. Ngebanga lokwandokhu, amagatja amanengi atlhoga ukukhuliswa nokulungiswa. Iye, lokhu kutjho nokuthi sitlhoga amaWolo womBuso amanengi! Ngesikhathi esifanako, kusatlhogeka ama-ofisi wokutjhugulula eengcenyeni ezinengi zephasi ukwenzela bona abatjhugululi bakghone ukuhlala begodu basebenze endaweni ekukhulunywa kiyo ilimi labo.

Singabe godu sizibuze, ‘Khuyini engingakwenza bona ngisekele ukwakhiwa kwezakhiwezi?’ Abanye bethu bangakghona nokusiza ngokuzithandela emsebenzini wokwakha. Ngaphezu kwalokho, ukuthi sinamakghono wokwakha nofana asinawo, soke sinelungelo lokunikela ngezinto zethu eziligugu emisebenzini eqakathekileko le. (IzA. 3:9, 10) Ngesikhathi sokwakhiwa kwethaberinakeli, ama-Israyeli atjhukumiseleka bona anikele kangangobana kwabe kwenziwa nesaziso sokuthi angasaletha eminye iminikelo. (Eks. 36:5-7) Asinakho ukuzaza ngokuthi imiTlolo esibonelo le isithinta ihliziyo begodu iyasikhuthaza. ‘Ukutjhabatjhabeka kwenu kwethando’ eendaweni eziqakathekilekwezi zekonzo ecwengileko kungelinye ibanga lokobana simthokoze uJehova!

Sinesizathu esikhethekileko sokuthaba njengombana sibona ukukghodlhelela okuqinileko kwabazalwana bethu. Ngokwesibonelo, cabanga ngabazalwana bethu abathandekako be-South Korea. Ukusukela ngo-1950, abazalwana abatjha enarheni le bebasolo baphoselwa ngemajele bafumana iingwebo ezingafaniko ngebanga lokungafuni ukuphula isivumelwano sabo sobuKrestu ngokungathathi ihlangothi. Iinzukulwana zabafowethu zikghodlhelele ipatho le, ngaphandle kokuzaza. Isibonelo sabo sokukghodlhelela siqinisa ikholo lethu!

E-Eritrea, abazalwana bethu abathathu bavalelwe ngejele isikhathi esingaphezu kweminyaka eyi-20. Abanye, okufaka hlangana abodadwethu nabantwababo, nabo bakhe bavalelwa ngejele isikhathi esingaphasi kweminyaka eyi-20. Minengi imizamo eyenziweko bona batjhatjhululwe, kodwana akukakabi nepumelelo bekube nje. Abafowethu abakalahli itewu. Basolo bagcina ubuqotho babo ngaphasi kobujamo obugandelelako. Asibakhohlwa abazalwana bethu abathembekilekwaba emithandazwenethu.—Rom. 1:8, 9.

Kuliqiniso, abanye benu abakabotjhelwa ikholo labo. Nanyana kunjalo, inengi lenu liqalene neentjhijilo zokukhula ngeminyaka, imiraro yepilo, ukuphikiswa balingani abangakholwako namkha iinhlobo, kunye nezinye iintjhijilo zomuntu mathupha ezaziwa nguwe kwaphela. Nanyana kunjalo, niragela phambili nikhonza uJehova ngokwethembeka! (Jak. 1:12) Siyanibuka. Ukukghodlhelela kwenu ngokuthembeka nakho ngesinye isizathu esisenza sithokoze uJehova.

Iye, ukuthembeka kwenu, ukutjhabatjheka kwenu kwethando, nokukghodlhelela kwenu kusinikela iinzathu ezihle bona ‘simthokoze uJehova ngombana ulungile!’ (Rhu. 106:1, NW) Kwamambala sinithanda noke, begodu sithandazela bona uJehova aniqinise, anisekele, begodu anibusise ukwenzela bona nimkhonze isiphelani.