Khuyini Ongayenza Bona Uphile Ephasini Elitjha?

Iinhloko ezidlulileko zitjengise ukuthi ingasikade uZimu uzokuphelisa abantu abambi nayo yoke imiraro abayibangeleko. Singaqiniseka ukuthi koke lokhu kuzokwenzeka. Kubayini? Ngombana iliZwi lakaZimu, iBhayibheli, lithembisile:

“Iphasi liyadlula.”—1 JWANISI 2:17.

Singaqiniseka ukuthi kuzokuba nabantu abazokusinda ngebanga lesinye isithembiso esisevesini leBhayibheli elingaphezulu:

“Loyo owenza intando kaZimu uhlala bekube phakade.”

Nje-ke, nangabe sifuna ukusinda kufuze senze intando kaZimu. Bona sifumane ukuthi intando kaZimu iyini, kufuze sithome ngokumazi.

SINGASINDA EKUPHELENI KWEPHASI ‘NGOKWAZI’ UZIMU

UJesu wathi: “Lokhu kutjho ukuphila okungapheliko, bona bakwazi wena, okunguwe wedwa uZimu weqiniso.” (Jwanisi 17:3) Bona sisinde ekupheleni begodu siphile ngokungapheliko, kufuze ‘sazi’ uZimu. Lokhu kutjho ukukholelwa okungaphezu kokuthi uZimu ukhona namkha ukwazi izinto ezithileko ngaye. Kufuze sibe bangani bakhe. Nasifuna ubungani buqine, kufuze sizinikele isikhathi sokuba nabangani bethu. Nokuba mngani kaJehova akukahluki. Cabanga ngamaqiniso aqakathekileko esiwafunda eBhayibhelini asisiza sibe begodu sihlale sibangani bakaZimu.

FUNDA ILIZWI LAKAZIMU, IBHAYIBHELI QOBE LANGA

Kufuze sidle qobe bona siphile. Kodwana uJesu wathi: “Umuntu akaphili ngesikwa sodwa, kodwana nangawo woke amezwi aphuma emlonyeni kaJehova.”—Matewu 4:4.

Namhlanjesi, sifumana amezwi kaJehova eBhayibhelini. Njengombana ufunda incwadi ecwengekileko le, uzokufunda amaqiniso aqakathekileko ngokuthi khuyini uZimu ayenzako kade, ayenzako nje nazoyenza esikhathini esizako.

THANDAZA KUZIMU BONA AKUSIZE

Khuyini ongayenza nangabe ufuna ukulalela iinqophiso zakaZimu kodwana ukufumana kubudisi ukulisa ukwenza izinto athi zimbi? Nangabe kunjalo, ukwazi uZimu kungakusiza ngendlela ekhethekileko.

Cabanga ngomma esizombiza ngokuthi ngu-Sakura, obekaziphatha kumbi ngokomseme. Nakathoma ukufunda iBhayibheli, wafunda ngomyalo kaZimu othi, “kubalekeleni ukwenza izenzo zomseme ezisisono.” (1 Korinte 6:18) U-Sakura wathandaza kuZimu abawa amandla begodu wakghona ukulisa umukghwa omumbi lo. Kodwana kusafuze alwisane neenlingo. “Nangifikelwa micabango yokuziphatha kumbi” uthi, “Ngikhuluma ngokuthembeka noJehova ngomthandazo ngazi ukuthi angekhe ngayilwa ngedwa ipi le. Amandla womthandazo angitjhideze khulu kuJehova.” Njengo-Sakura, iingidi zifunda ngoZimu. Ubanikela amandla abawatlhogako bona benze amatjhuguluko ekuphileni kwabo begodu baphile ngendlela emthabisako.—Filipi 4:13.

Nawuragela phambili nokwazi uZimu ngcono, kulapho ‘uzokwaziwa nguZimu’ njengomngani oligugu. (Galatiya 4:9; IRhubo 25:14) Uzokusinda ungene ephasini lakaZimu elitjha. Kodwana iphasi elitjha lizokuba njani? Isihloko esilandelako sizokuhlathulula.