Izinja Zami Zanikelwa Amabhisikidi
UNICK, ohlala e-Oregon, e-U.S.A uthi: “Ngetwasahlobo ka-2014, ngathoma ukukhamba nezinja zami ezincani ezimbili edorobheni lemphakathini wangekhethu.” AboFakazi bebajayele ukuba phakathi nedorobho, bajame eqadi kweenkarana zabo zeencwadi. Bebambethe kuhle begodu bamomotheka kamnandi, balotjhisa woke umuntu odlulako.
“AboFakazi bebanomusa, ingasi ebantwini kwaphela kodwana nezinjeni zami. Ngelinye ilanga u-Elaine, obekajame hlanu kwekarana, wanikela izinja zami ezimbili amabhisikidi. Ngemva kwalokho, akhenge ngiphumule zizinja zami zidosa intambo zifuna ukuya ekhoneni lamabhisikidi.’
“Kwadlula iinyanga izinja ziwathabela amabhisikidi begodu nami bengikuthabela ukucoca naboFakazi. Kodwana bengingafuni ukutjhaphuluka khulu. Besele ngidlulile eminyakeni ema-70, begodu bengingaqiniseki ukuthi khuyini abofakazi ebebayikholelwa. Ngebanga lokudaniswa masonto wamaPhrotestani, ngakubona kukuhle ukuthi ngizifundele ngedwa iBhayibheli.
“Kungesikhathesi lapho ngabona abanye aboFakazi eendaweni ezihlukahlukeneko zedorobho bajame hlanu kweenkarana. Nabo bebanomusa. Bebazimisele ukuphendula imibuzwami basebenzisa iBhayibheli, lokho kwenza bona ngibathembe ngokungeziweko.
“Ngelinye ilanga, u-Elaine wangibuza, ‘Kghani uyakholelwa ukuthi iinlwana zisisipho esivela kuZimu?’ Ngamphendula ngathi, ‘Iye, ngiyakukholelwa lokho!’ Ngemva kwalokho wangifundela umtlolo ka-Isaya 11:6-9. Kulapho la ngavuleka khona amehlo nanyana bengizaza ukwamukela iincwadi zabo.
“Emalangeni alandelako, ngathabela iingcoco ezifitjhani nezikhuthazako no-Elaine nendodakwakhe uBrent. Bathi ngifunde ukusuka kuMatewu ukuya ku-IzEnzo bona ngizwisise ukuthi kutjho ukuthini ukuba mKrestu. Yeke, ngenza njalo. Kungasikade ngemva kwalokho, ngavuma bona uBrent no-Elaine bangifundele iBhayibheli. Ngesikhatheso bekusehlobo lango-2016.
“Bengikuthabela ukufunda nabo iBhayibheli nokuya esifundweni eWolweni lomBuso. Bengizizwa ngibusisekile begodu ngithabile ngokufunda ngalokho okufundiswa liBhayibheli. Esikhathini esingaphezudlwana komnyaka, ngabhajadiswa, ngaba nguFakazi obhajadisiweko. Nje sele ngineminyaka ema-79 begodu ngiyazi bona ngilifumene iqiniso. UJehova ungibusise ngokuthi angifake emndeninakhe weenceku ezimlotjha ngokuzimisela.”