Kubayini AboFakazi BakaJehova Bangasisebenzisi Isiphambano Nebalotjha UZimu?

Inengi labantu lithatha isiphambano njengetshwayo lobuKrestu ephasini mazombe. NjengaboFakazi bakaJehova, siyavuma bona simaKrestu, kodwana asisisebenzisi isiphambano nesilotjha uZimu. Kubayini singasisebenzisi?

Okhunye okusenza singasisebenzisi kukuthi iBhayibheli liveza bona uJesu khenge afele esiphambanweni kodwana wafela esigodweni sinye esinganaso isigodo esisivundlileko. Ngaphezu kwalokho iBhayibheli liyelelisa amaKrestu bona ‘bakubalekele ukulotjha abosingazimu’ namkha iinthombe, okutjho bona akukafaneli sisebenzise isiphambano nesilotjha uZimu. —1 Korinte 10:14; 1 Jwanisi 5:21.

UJesu watjho into eqakathekileko nakathi: “Ngalokho boke abantu bazakwazi bona nibafundi bami, nanithandanako.” (Jwanisi 13:34, 35) UJesu bekatjengisa bona lithando lokuzidela—ingasi isiphambano—ebelizokuvela njengetshwayo labalandeli bakhe bamambala.