Isifundo 3
Ngubani UJesu Krestu?
Kubayini uJesu abizwa bonyana yiNdodana kaZimu “elizibulo”? (1)
Kubayini abizwa bonyana “uLizwi”? (1)
Kubayini uJesu eza ephasini njengomuntu? (2-4)
Kubayini enza iimangaliso? (5)
Kuyini uJesu azoyenza kwingomuso elitjhidelako? (6)
1. UJesu gade ahlala emazulwini njengomuntu womoya ngaphambi kobana eze ephasini. Uyindalo kaZimu yokuthoma, ubizwa nangokuthi uyiNdodana kaZimu “elizibulo.” (KwebeKholose 1:15; ISambulo 3:14) Uwukuphela kweNdodana uZimu ayibumba ngokwakhe. UJehova wasebenzisa uJesu ngaphambi kokuba abemumuntu “njengesisebenzi esinekgono” ekubumbeni zoke ezinye izinto emazulwini nephasini. (Iziyema 8:22-31, (NW); KwebeKholose 1:16, 17) UZimu wamberegisa njengomkhulumeli Wakhe oyihloko. Ngikho uJesu abizwa “uLizwi.”—Jwanisi 1:1-3; ISambulo 19:13.
2. UZimu wathumela iNdodana Yakhe ephasini ngokudlulisela ukuphila kwayo esibelethweni sikaMariya. UJesu khenge abe noyise omumuntu. Kungakho angakhenge afuze isono nokungapheleli. UZimu wathumela uJesu ephasini ngamabanga amathathu: (1) Ukusifundisa iqiniso Ngaye (Jwanisi 18:37), (2) ukugcina ukuthembeka, nokusitjhiyela isibonelo okufanele sisilandele (1 KaPitrosi 2:21), (3) nokusitjhaphulula esonweni nekufeni ngokudela ipilo yakhe. Kubayini lokhu gade kutlhogeka?—Matewu 20:28.
3. Ngokungalaleli umthetho kaZimu, indoda yokuthoma, u-Adamu, yenza lokho iBhayibhili ekubiza bonyana “isono.” Ngalokho uZimu wamgwebela ukufa. (Genesisi 3:17-19) Gade angasafanelani neemfanelo zikaZimu, njengombana abangasese mumuntu opheleleko. Kancani kancani waluphala bewafa. U-Adamu wadlulisela isono ebantwaneni bakhe boke. Kungakho nathi siluphala, sigula, besihlongakala. Singasindiswa njani ke isintu?—KwebeRoma 3:23; 5:12.
4. UJesu gade amumuntu opheleleko ofana no-Adamu. Naphezu kobudisi uJesu aqalana nabo, ngokuphambene no-Adamu, wathembeka ngokupheleleko kuZimu. Ukubhadela isono esenziwa ngu-Adamu uJesu wanikela ngepilo yakhe epheleleko. Ngilokho iBhayibhili eliqalise kikho nelithi ‘ukuphuluswa.’ Abantwana baka Adamu bangatjhaphululwa ekuhlongakaleni. Boke ababa nokholo kuJesu bangalibalelwa izono zabo bakereye ubuphilo obungapheliko.—1 kuThimothi 2:5, 6; Jwanisi 3:16; KwebeRoma 5:18, 19.
5. Nagade asephasini uJesu wapholisa abagulako, wasuthisa abalambileko, wathulisa amawuruwuru. Wavusa nabahlongakeleko. Kubayini enza iimangaliswezi? (1) Wafikelwa sirhawu ngabantu abatlhagako, wafuna ukubarhelebha. (2) Iimangaliswezi zatjengisa bonyana uyiNdodana kaZimu. (3) Zatjengisa bonyana kuyini azokwenzela isintu esilalelako nasele abusa njengeKosi ephasini.—Matewu 14:14; Markosi 2:10-12; Jwanisi 5:28, 29.
6. UJesu wahlongakala bewavuswa nguZimu njengesidalwa somoya, wabuyela ezulwini. (1 KaPitrosi 3:18) Kusukela lokho, uZimu wamenza iKosi. Msinyana uJesu uzokususa ubumbi nokutlhaga ephasinapha.—AmaRhalani 37:9-11; Iziyema 2:21, 22.
[Iinthombe ekhasini 7]
Ikonzo kaJesu ihlanganisa ukufundisa, ukwenza iimangaliso, nokudela ipilo yakhe ngebangalethu