Isifundo 9

Iinceku Zika Zimu Kufuneka Zihlanzeke

Kubayini kufuneka sihlanzeke ngazo zoke iindlela? (1)

Kutjho ukuthini ukuhlanzeka emoyeni? (2)

ukuhlanzeka kokuziphatha? (3) ukuhlanzeka emkhumbulweni? (4) ukuhlanzeka emzimbeni? (5)

Ngiziphi iinhlobo zekulumo embi okufuneka sizibalekele? (6)

1. UJehova uZimu uhlanzekile begodu ucwengekile. Ulindele abakhulekeli bakhe bonyana bahlanzeke​—⁠emoyeni, ekuziphatheni, emkhumbulweni, nemzimbeni. (1 KaPitrosi 1:16) Kufuna umzamo omkhulu nesizakuhlala sihlanzekile emehlweni kaZimu. Iphasi esihlala kilo alikahlanzeki. Begodu sisiphalazela ukulwa nemkhuba yethu yokwenza iintwezimbi. Kodwana singaphelelwa mamandla.

2. Ukuhlanzeka Emoyeni: Nesifuna ukukhonza uJehova, asizukubambelela eemfundisweni nemasikweni wekolo yamanga. Kufuneka siphume ekolweni yamanga begodu singayisekeli namtjhana ngayiphi indlela. (2 kwebeKorinte 6:​14-18; ISambulo 18:⁠4) Nesesifunde iqiniso ngoZimu, kufuneka sitjheje bonyana singalahlwa babantu abafundisa amanga.​—⁠2 KaJwanisi 10, 11.

3. Ukuhlanzeka Kokuziphatha: UJehova ufuna abakhulekeli bakhe baziphathe njengamaKrestu wamambala soke iskhathi. (1 KaPitrosi 2:12) Ubona yoke into esiyenzako, nesemsitheleni. (KumaHebheru 4:13) Kufuneka sibalekele ukuziphatha okumbi komseme nezinye izinto ezingakahlanzeki ezenziwa liphaseli.​—⁠1 kwebeKorinte 6:​9-11.

4. Ukuhlanzeka Emkhumbulweni: Nasizalisa imikhumbulo nemicabango yethu, ngezinto ezihlanzekileko, nekhambo lethu lizokuhlanzeka. (KwebeFilipi 4:⁠8) Kodwana nesihlala eentweni ezingakahlanzeki, kuzokuphumela ezenzweni ezimbi. (Matewu 15:​18-20) Kufuneka sibalekele loke ihlobo lokuzithabisa elingona imikhumbulo yethu. Singazalisa imikhumbulo nemicabango yethu ngezinto ezihlanzekileko ngokufunda iLizwi likaZimu.

5. Ukuhlanzeka Emzimbeni: Njengombana ajamele uZimu, amaKrestu kufuneka abulunge imizimba neembatho zawo zihlanzekile. Kufuneka sihlambe izandla zethu ngemva kokuberegisa indlu encani, nangaphambi kokuphatha ukudla. Nangabe awunandlu encani, newuphumileko kufuneka udibizese ngehlabathi. (Duteronomi 23:​12, 13) Ukuhlanzeka ngokomzimba kuya kusiza ekubeni nepilo ehle. Ikhaya lomKrestu kufuneka lihlanzeke kokubili ngaphandle nangaphakathi. Kufuneka libe mtlhala ebhodulukweni.

6. Ikulumo Ehlanzekileko: Iinceku zikaZimu kufuneka zikhulume iqiniso ngaso soke isikhathi. Abakhuluma amanga ngeze bangena eMbusweni kaZimu. (Kwebe-Efesu 4:25; ISambulo 21:⁠8) AmaKrestu awaliberegisi ilimu elimbi. Awalaleli amahlaya neentolwana ezinensila. Ngebanga lekulumo yabo ehlanzekileko, babanobujamo obuhlukileko emsebenzini namtjhana esikolweni nakubomakhelwana.​—⁠Kwebe-Efesu 4:​29, 31; 5:⁠3.

[Iinthombe ekhasini 18, 19]

Iinceku zikaZimu kufuneka zihlanzeke ngazo zoke iindlela