Isifundo 11
Iinkolelo Nama Siko Angamthabisi UZimu
Ngiziphi iinkolelo namasiko amambi? (1)
AmaKrestu kufuneka akholelwe bonyana uZimu nguZiquntathu? (2)
Kubayini amaKrestu wamambala angagidingi uKresimusi, iPhasika, namalanga wokubelethwa? (3, 4)
Abafileko bangabalimaza abaphilako? (5)
UJesu wafela esiphambanweni? (6)
Kuqakatheke kangangani ukuthabisa uZimu? (7)
1. Akusizo zoke iinkolelo namasiko amambi. Kodwana uZimu akazamukeli nazivela ekolweni yamanga namtjhana zingavumelani nefundiso yeBhayibhili.—Matewu 15:6.
2. UZiquntanthu: UJehova nguZiquntathu—abantu abathathu kuZimu oyedwa? Awa! UJehova, uBaba, “nguZimu isibili.” (Jwanisi 17:3; Markosi 12:29) UJesu yiNdodana Yakhe eyizibulo, ezibeke ngaphasi kwakaZimu. (1 kwebeKorinte 11:3) UBaba mkhulu kuneNdodana. (Jwanisi 14:28) Umoya ocwengekileko awusuye umuntu; mamandla kaZimu asebenzako.—Genesisi 1:2; Izenzo 2:18.
3. Ukresimusi nePhasika: UJesu khenge abelethwe ngo December 25. Wabelethwa ngabo October 1, ngesikhathi sonyaka lapho abalusi balusa imihlambi yabo ebusuku. (Luka 2:8-12) UJesu khenge atjele amaKrestu bonyana agidinge ilanga lokubelethwa kwakhe. Kunalokho, watjela abafundi bakhe bonyana bakhumbule ukufa kwakhe. (Luka 22:19, 20) Ukresimusi namasikwakhe kuvela ekolweni yamanga yekadeni. Kungokufanako nangesiko lePhasika , njengokuberegisa amaqanda nemiqasana. AmaKrestu wokuthoma khenge agidinge uKresimusi nePhasika, njengoba kunjalo nangamaKrestu wanamhlanje.
4. Amalanga wokubelethwa: Okuwukuphela kwamalanga wokubelethwa iBhayibhili elikhuluma ngawo, agidingwa babantu ababili abangamkhulekeli uJehova. (Genesisi 40:20-22; Markosi 6:21, 22, 24-27) AmaKrestu wokuthoma khenge agidinge amalanga wokubelethwa. Isiko lokugidingwa kwamalanga wokubelethwa livela ekolweni yamanga yekadeni. Phakathi nonyaka amaKrestu wamambala aba neenkhathi ezimnandi ndawonye begodu aphane nezipho.
5. Ukusaba Abafileko: Abahlongakeleko akunanto abangayizwa namtjhana abangayenza. Ngeze sabarhelebha, begodu nabo ngeze basilimaza. (AmaRhalani 146:4; Umtjhumayeli 9:5, 10) Umphefumulo uyafa; awurageli phambili ngemva kokufa. (Ezekiyeli 18:4) Ngezinye iinkathi iingilozi ezimbi, ezibizwa ngokuthi madimoni, zizenza imimoya yabafileko. Noma ngimaphi amasiko ahlangene nokukhulekela namatjhana ukwesaba abafileko akakalungi.—Isaya 8:19.
6. Isiphambano: UJesu ngekhe afele esiphambanweni. Wafela epaleni. Ibizo lesiGriki elitjhugulula “ isiphambano” eemBhayibhilini ezinengi belitjho isigodo esisodwa. Itshwayo lesiphambano livela ekolweni yamanga yekadeni. Isiphambano besingasetjenziswa namatjhana sikhulekelwe maKrestu wokuthoma. Ngebanga lalokho, ucabanga bonyana kulungile ukusebenzisa isiphambano ekukhulekeleni?—Duteronomi 7:26; 1 kwebeKorinte 10:14.
7. Kungaba budisi khulu ukutjhiya ezinye zeenkolelo lezi namasiko. Iinhlobo nabangani bangalinga ukukwenza ungatjhintjhi iinkolelo zakho. Kodwana ukuthabisa uZimu kuqakatheke khulu kunokuthabisa abantu.—Iziyema 29:25; Matewu 10:36, 37.
[Isithombe ekhasini 22]
UZimu akasuye uZiquntathu
[Isithombe ekhasini 23]
UKresimusi nePhasika kuvela ekolweni yamanga
[Isithombe ekhasini 23]
Asinabanga lokukhulekela abafileko nokubasaba