Lutjha—Nizakwenzani Ngepilo Yenu?

NGIFUNA okubhedere khulu epilweni.” Kwatjho omunye umntazana omutjha. Akunakuzaza bona nawe ufuna okufanako. Kodwana ukukereya bunjani “okubhedere” epilweni? Zokurhatjha, abangani, mhlamunye nabothitjhere bakho, bangakutjela bonyana ukurhola imali enengi nokuberega umberego okulethela idumo kungakwenza ube nepumelelo!

Namtjhana kunjalo, iBhayibhili iyelelisa abantu abatjha bonyana ukulandelela izinto ezibonakalako kulilize “nokufuna umoya.” (Umtjhumayeli 4:4) Nokho, lidlanzana lolutjha elibukereyako uburego nedumo. Kuba nokudana okubuhlungu kilabo abakukereyako. Omutjha weBrithani ogade alandelela ifundo ekhethekileko wathi: “Kufana nebhoksi elinganalitho. Newuthi uqala ngaphakathi akunalitho.” Kuliqiniso bonyana umberego ngezinye iinkhathi ungakulethela uburego nokulinyukwa. Kodwana ngeze wakuzalisa ‘ukutlhaga [kwakho] emoyeni.’ (Matewu 5:3) Ngaphezu kwalokho, u1 KaJwanisi 2:17 iyelelisa bonyana “iphasi nakho koke abantu abakufunako kilo kuyadlula.” Namtjhana ubungayikereya ipumelelo ephasineli, bekuzakuba yinto yamalangana.

Nokho, Umtjhumayeli 12:1 utlhogomelisa ulutjha: “Khumbula uMdali wakho emihleni yobusha bakho.” Iye, indlela ebhedere yokuberegisa ipilweni kusekonzweni kaJehova uZimu. Kodwana kokuthoma, kufuneka ukulungele ukuba sekonzweni kaZimu. Ungakwenza njani lokhu? Begodu ihlanganisani ipilo ekonzweni kaZimu?

Ukulungela Ukuba NguFakazi KaJehova

Kokuthoma, kufuneka uhlawulele ikhanuko yokukhonza uZimu, begodu ikhanuko leyo ayizizeli ngokuzenzakalelako, ngitjho namtjhana ababelethi bakho bamaKrestu. Nguwe omdele uzakhele ubuhlobo bakho noJehova. Omunye umntazana omutjha uthi: “Umthandazo ukurhelebha bonyana ube nobuhlobo noJehova.”—AmaRhalani 62:8; KaJakobosi 4:8.

KwebeRoma 12:2 kuqakathekiswa elinye igadango okufuneka ulithathe. Ithi: ‘Nilemuke intando kaZimu, nikwazi okulungileko nokuhle okumthokozisako.’ Wakhe wazifumana uzaza ezinye zezinto owazifundiswako? Yeke landela isikhuthazo seBhayibhili, ‘nilemuke’ bonyana iintwezi ziliqiniso! Zenzele lakho irhubhululo. Funda iBhayibhili neencwadi ezisekelwe eBhayibhilini. Kodwana ukufunda ngoZimu asikuhlakanipha kwaphela. Newufuna bonyana izinto ozifundako zingene zitjhinge ehliziyweni yakho yiba nesikhathi sokuzindla ngazo. Lokho kuzokukhulisa ithando lakho ngoZimu.—AmaRhalani 1:2, 3.

Ngokulandelako, linga ukuhlanganyela izinto ozifundako nofunda nabo isikolo. Igadango elilandelako kutjhumayela umzi nomuzi. Ngezinye iinkhathi newutjhumayelako uzokuhlangana nofunda nabo isikolo, kungakuthusa lokho ekuthomeni. Kodwana iBhayibhili isikhuthaza bonyana ‘singabi namahloni ngevangeli.’ (KwebeRoma 1:16) Uletha umlayezo wokuphila nethemba! Kubayini uneenhloni ngawo?

Nje-ke, nangabe ababelethi bakho bamaKrestu, kungenzeka bonyana sele ukhamba nabo emberegweni lo. Kodwana ungakgona ukwenza okungaphezu kokumane ujame emnyango uthule namtjhana ukhambise abomagazini namaphetjhana? Uyakghona ukukhuluma uberegisa iBhayibhili ufundisa umninimuzi? Nekungasinjalo, kufuneka ukereye irhelebho ebabelethini bakho namtjhana elungwini lebandla elivuthiweko. Kwenze kube mnqopho wakho ukufanelekela ukuba mrhuweleli ongakabhabhadiswa weendaba ezihle!

Ngokukhamba kwesikhathi, uzokufuna ukuzinikela—ufunge kuZimu bonyana uzomkhonza ukuya phambili. (KwebeRoma 12:1) Namtjhana kunjalo, ukuzinikela akusiyo indaba yemsithelweni. UZimu ufuna bonyana boke ‘ngokuvuma baphuluswe.’ (KwebeRoma 10:10) Newubhabhadiswako, uthoma uvume ikholo lakho ngomlomo. Ngemva kwalokho kulandele ukubhabhadiswa ngemanzini. (Matewu 28:19, 20) Kuyavunywa, ukubhabhadiswa ligadango eliqakathekileko. Kodwana ungadoseli emva ngombana ucabanga bonyana mhlamunye ungabhalelwa. Nengabe uthembele emandleni kaZimu, uzokunikela “amandla amakhulu la” bonyana akurhelebhe uqine.—2 kwebeKorinte 4:7; 1 KaPitrosi 5:10.

Newubhabhadiswako uba ngomunye waBofakazi bakaJehova. (Isaya 43:10) Lokhu kufanele kube nendima ekulu endleleni ozokuberegisa ngayo ukuphila kwakho. Ukuzinikela kuhlanganisa ‘ukuzidela.’ (Matewu 16:24, NW) Ungadela eminye iminqopho yobuqu neemfiso begodu ‘ufune qangi umbuso kaZimu.’ (Matewu 6:33) Yeke ukuzinikela nokubhabhadiswa kuvula iinkhala ezinengi zokwenza njalo. Akhe siqale ezinye zazo.

Amathuba Wokuberegela UZimu Isikhathi Esizeleko

● Ukuphayona ngelinye ithuba. Iphayona mrhuweleli osibonelo omKrestu obhabhadisiweko, ohlele ukuberega ama-iri ayi 70 inyanga nenyanga ekutjhumayeleni iindaba ezihle. Ukuberega isikhathi esingezelelekileko kuzokurhelebha bonyana uragekisele phambili ikghono lakho lokutjhumayela nokufundisa. Amaphayona amanengi athabela ukurhelebha abantu afunda nabo iBhayibhili bonyana babe Bofakazi ababhabhadisiweko. Ngimuphi umberego ongaba ngothabisako begodu wanelise kangaka?

Ukutjheja iindleko zabo zokuphila, amaphayona amanengi abamba amatorhwana. Ukuhlelela isibophwesi kusengaphambili, abanengi bafundela umberego othileko esikolweni namtjhana kubabelethi babo. Nengabe wena nababelethi bakho nibona bonyana kuzokurhelebha ukufumana ukubandulwa okungezelelekileko ngemva kwefundo ephakamileko, qiniseka bona iinhloso zakho, akusikho ukukereya imali enengi, kodwana kusekela ikonzo yakho begodu mhlamunye ukhonze isikhathi esizeleko.

Nokho, umnqopho wokuphila kwephayona, akusiwo umberego walo wokuziphilisa, kunalokho yikonzo yalo yokurhelebha abanye bafumane ukuphila! Kubayini ungenzi ikonzo yokuphayona ibe mnqopho wakho? Ukuphayona kanengi kudosela kwamanye amalungelo. Isibonelo, amaphayona afudukela eendaweni ezinetlhogeko ekulu yabarhuweleli boMbuso. Abanye bafunda ilimi lamaphandle bakhonze nebandla langekhabo elikhuluma ilimelo namtjhana kwenye inarha. Iye, ukuphayona yindlela ezuzisako ekuphileni!

● IsiKolo seBhayibhili samaKrestu aTjhadileko ngomunye womnyango ovulekileko. Sinikela amaKrestu atjhadileko ibandulo elikhethekileko bona asetjenziswe nguJehova nehlanganwakhe ngokuzeleko. Inengi labafumene iziqu labelwa ukukhonza lapho kunetlhogeko ekulu khona enarheni yekhabo. Amanye anganikelwa isabelo kenye inarha nengabe azenza afumaneke. Abafumene iziqu bangakhonza njengamaphayona akhethekileko wesikhatjhana ukuthoma nokwandisa umsebenzi eenarheni ezikude.

● IsiKolo seBhayibhili sabaZalwana abangakaTjhadi sahlonyelwa ukubandula abadala neenceku ezikhonzako ezifanelekako ezingakathathi. Ifundiso le ethatha iimveke ezibunane ihlanganisa iimbandela enjengomthwalo wefanelo wabadala neenceku ezikhonzako, ukuhlela, nokukhuluma enengini. Abanye babelwa ukukhonza enarheni yekhabo. Abanye banikelwa izabelo zeenarha zangaphandle.

● Ikonzo yeBhetheli ihlanganisa ukukhonza njengesiberegi sokuzithandela kelinye lamagaja waBofakazi bakaJehova. Amanye amulungu womndeni weBhetheli aberega bunqopha ekukhiqizeni iincwadi zeBhayibhili. Abanye banikelwa izabelo ezisekelako ezinjengokutjheja umakhiwo, iinhlabagelo, namtjhana ukutjheja ipilo yomndeni weBhetheli. Zoke izabelo zimalungelo acwengekileko wekonzo eya kuJehova. Ukungezelela kilokho, boke abaseBhetheli bathatjiswa kukwazi bona nanyana yini abayenzako, izuzisa boke abanakwabo ephasini zombelele.

Ngezinye iinkhathi abanakwethu abanamakghono akhethekileko bayamenywa bonyana bazokukhonza eBhetheli. Nokho, inengi lifumana ibandulo nelifika eBhetheli. Labo abaseBhetheli abakhonzeli ukufumana izinto ezibonakalako kodwana baneliswa malungiselelo abawenzelwako anjengokudla, indawo yokuhlala, nobuncani ababufumanako bokutjheja iintlhogo zabo zobuqu. Elinye ilungu elitjha lomndeni weBhetheli lihlathulula ikonzo yalo bunje: “Ikarisa ngokurarako! Ikambiso yakhona iphosela iselele, kodwana zinengi iimbusiso engizifumene ngokukhonza eBhetheli.”

● Ikonzo yephasi loke ikunikela ithuba lokuhlanganyela ekwakhiweni kwamagaja namaWolo woMbuso. Iimberegi zephasi loke, njengombana zibizwa njalo, zikhambela iinarha zangaphandle zirhelebha emberegweni wokwakha. Le, yikonzo ecwengekileko, efana nomberego walabo egade bakha itempeli lakaSolomoni. (1 Amakhosi 8:13-18) Amalungiselelo wokutjheja iimberegi zephasi loke, ayafana nawokutjheja umndeni weBhetheli. Kulilungelo elingangani kubanakwethu nabodadwethu abenza umberego lo bonyana kudunyiswe uJehova!

Khonza UJehova Ngomphefumulo Woke

Ukukhonza uJehova kuyindlela ebhedere khulu yokuberegisa ukuphila kwakho. Kubayini ungazenzeli umnqopho wokukhonza uZimu isikhathi esizeleko? Coca ngekonzo yesikhathi esizeleko nababelethi bakho, abadala bebandla lekhenu, umkhambeli wesifunda. Nengabe uthabela ukuba seBhetheli, esiKolweni seBhayibhili saBazalwana abangakaTjhadi namtjhana isiKolo seBhayibhili samaKrestu aTjhadileko, yiba khona emhlanganweni walabo abafuna ukwenza iimbawo ebanjwa emihlanganweni yesifunda neyesigodi.

Kuyavunywa, akusibo boke abantu abangakwazi ukukhonza isikhathi esizeleko. Ngezinye iinkhathi ipilo engasiyihle, ubujamo beemali, iimbopho zomndeni zingalinganisa lokho umuntu angakwenza. Nanyana kunjalo, woke amaKrestu azinikeleko kufuneka alalele umlayo weBhayibhili: “Thanda iKosi [uJehova] uZimu wakho ngehliziyo yakho yoke, nangomphefumulo wakho woke, nangomkhumbulo wakho woke.” (Matewu 22:37) UJehova ufuna bonyana wenze okubhedere khulu ngokuvumelana nobujamo bakho. Nanyana ukubuphi ubujamo, yenza ukukhonza uJehova kube mnqopho epilwenakho. Zibekele iminqopho ongayifikela yezinto zomoya. Iye, “Khumbula uMdali wakho emihleni yobusha bakho”—begodu uzokubusiswa ngokungapheliko ngokwenza njalo!

Ngaphandle kobanyana kutjengiswe ngenye indlela, imitlolo yesiHebheru (iTestamende eLidala) eberegiswe ephetjhaneneli, ithethwe eBhayibhilini ejayelekileko yesiZulu, imitlolo yesiGirigi (iTestamende eLitjha) ithethwe eBhayibhilini yesiNdebele.