Ingcenye 18

UJesu Wenza Iimangaliso

Ngemangaliso zakhe uJesu utjengisa bona uzowaberegisa njani amandlakhe njengeKosi

UZIMU wanikela uJesu amandla wokwenza izinto abanye abantu abangekhe bakwazi ukuzenza. UJesu wenza iimangaliso ezinengi ezikulu—kanengi aphambi kwabofakazi bokuzibonela abanengi. Iimangaliswezo zatjengisa bona uJesu unamandla ngaphezu kwamanaba begodu nokususa iinthiyo abantu abanesono abangakhenge bakwazi ukuziqeda. Tjheja nanzi iimbonelo.

UJesu wenza isimangaliso sokudla neenselo. Isimangaliso sokuthoma sakaJesu gade sikutjhugulula amanzi abe liwayini. Kwezinye izehlakalo eembili, wasuthisa iinkulungwana zabantu ngoburotho obumbalwa neemfesi. Kizo zombili izehlakalwezi, bekunokudla okungaphezu kokwaneleko kwawo woke umuntu.

UJesu ulapha ukugula. UJesu walapha abantu “abebaphethwe malwelwe ahlukeneko nezifo.” (Matewu 4:23) Walapha iimphofu, abangezwako, ubulepheru, isithuthwana, begodu neenrhole. Abukho ubuhlobo bobulwelwe angakhenge akwazi ukubulapha.

UJesu ulawula ubujamo bezulu obuyingozi. Lokha uJesu nabafundi bakhe bakhamba ngesikepe baratha iLwandle leGalile, kwaba nesiwuruwuru esinamandla. Abafundi bangenwa mamanzi emadolweni. UJesu wavele waqala isiwuruwuru wathi: “Thula tse!” Ngemva kwalokho, kwaba nokuthula okukhulu. (Markosi 4:37-39) Kwesinye isehlakalo, wakhamba phezu kwamanzi kunesiwuruwuru esithusako.—Matewu 14:24-33.

UJesu ukhupha imimoya emimbi. Imimoya emimbi inamandla khulu ukudlula abantu. Abantu abanengi bahluleka ukuphunyurha ngaphasi kokulawulwa manaba kaZimu ayingozi la. Kanengi, lokha uJesu ayilayela bona iphume kibo, begodu ngemva kwalokho imimoya le, beyingasakwazi ukutshwenya abongazimbi bayo. Gade angayisabi. Ngokuhlukileko, beyiwazi amandlakhe begodu iimsaba.

UJesu wavusa abafileko. Bubizwa ngokufaneleko bona ‘linaba lamaphelelo,’ ukufa linaba umuntu angeze alihlula. (1 kwebeKorinte 15:26) Nokho, uJesu wavusa abafileko, phakathi kwabo kuhlanganisa indodana eseseyitja yomma omfelokazi nomntazana wababelethi egade basematlhuweni. Kwesinye isehlakalo esikarisako, uJesu wavusa umnganakhe othandekako uLazaru phambi kweenqubuthu ezililako, namtjhana indodaleyo gade pheze sele kumalanga amane ifile! Ngitjho namanaba kaJesu amakhulu, avuma bona wasenza isimangalisweso.—Jwanisi 11:38-48; 12:9-11.

UJesu wazenzelani zoke iimangaliswezo? Kuliqiniso bona boke abantu abavusako bafa godu, kodwana iimangaliso azenzako bezinemiphumela ehlala ngokungapheliko. Zatjengisa bona zoke iimphorofido ezikarisako ezimalungana nokubusa kweKosi enguMesiya zinobufakazi obuliqiniso. Asikho isizathu sokuzaza bona iKosi ekhethwe nguZimu izokuqeda indlala, ukugula, ubujamo bezulu obuyingozi, imimoya emimbi, ngitjho nokufa ngokwakho. Selatjengisile bona uZimu umnikele woke amandla bona enze lokho.

—Isekelwe encwadini kaMatewu, Markosi, Luka, noJwanisi.

◼ UJesu uwabonakalise bunjani amandlakhe phezu kwendlala? ukugula? ubujamo bezulu obuyingozi? imimoya emimbi? ukufa?

◼ Iimangaliso zakaJesu zitjengisani malungana nokubusa kwakhe ephasini esikhathini esizako?

[Itjhadi ekhasini 21]

Genesisi

Eksodosi

Lefitikosi

Numeri

Duteronomi

Joshuwa

Abahluleli

Rude

Jona

Mika

Nahumi

Habakuki

Zefaniya

Hagayi

Zakariya

Malaki

Matewu ●

Markosi ●

Luka ●

Jwanisi ●

IZenzo

KwebeRoma

1 KwebeKorinte

2 KwebeKorinte

KwebeGalatiya

Kwebe-Efesu

KwebeFilipi

KwebeKholose

1 KwebeTesalonika

2 KwebeTesalonika

1 kuThimothi

2 kuThimothi

KuTitosi

KuFilimoni

KumaHebheru

KaJakobosi

1 KaPitrosi

2 KaPitrosi

1 KaJwanisi

2 KaJwanisi

3 KaJwanisi

KaJuda

ISambulo