U-Adamu No-Eva Azange Bamlalele UZimu

Ngelinye ilanga u-Eva bekahlezi yedwa, inyoka yeza yakhuluma naye. Yathi: ‘Kuliqiniso ukuthi uZimu uthe ningadli kiyo yoke imithi esesimini?’ U-Eva wathi: ‘Singazidla zoke iinthelo zemithi esesimini.’ Malungana nomuthi ophakathi nesimu uZimu uthe: ‘Ningadli kiwo begodu ningawuthinti ukuze ningafi.’ Inyoka yathi: ‘Awa angekhe nife. Ngombana uZimu uyazi ukuthi ngelanga enizokudla ngalo kiwo, amehlwenu azokuvuleka begodu nizokuba njengoZimu.’ Kghani lokho bekuliqiniso? Awa, bekumamala. Kodwana u-Eva wawakholwa amala lawo. Bekuthi lokha nakasiqala isithelweso, asikhanuke. Wasidla, wanikela no-Adamu naye wadla. U-Adamu bekazi bona bazokufa nabangamlaleliko uZimu kodwana wasidla kunjalo.

Kamva uJehova wakhuluma no-Adamu no-Eva ngelangelo. Wababuza bona kubayini bakhetha ukungamlaleli. U-Eva wathi yinyoka emenze wangalaleli, u-Adamu yena wathi ngu-Eva omenze wangalaleli. Ngebanga lokungalaleli kwabo, uJehova wabaqotha esimini. Nje-ke, ukwenzela bona bangabuyeli esimini, wabeka iingilozi nesabula evutha umlilo eyegeni yesimu.

UJehova godu wathi naloyo okhohlise u-Eva uzomjezisa. Kuhlekuhle bekungasiyo inyoka eyakhuluma no-Eva. UJehova azange enze iinyoka bona zikhulume. Bekuyingilozi embi eyakhulumisa inyoka leyo. Beyenzela ukukhohlisa u-Eva. Ingilozi le nguSathana uDeveli. Esikhathini esizako, uJehova uzokubhubhisa uSathana ukwenzela bona angasolo akhohlisa abantu ukuthi benze izinto ezimbi.