UJehova Wenza USamsoni Waba Namandla

Inengi lama-Israyeli labuyela emikghweni emimbi yokulotjha iinthombe, yeke uJehova wavumela amaFilista bona alawule inarhanawo. Kodwana bebasesekhona abathanda uJehova kwa-Israyeli, njengendoda ekuthiwa nguManowarhi. Yena nomkakhe bebanganabo abantwana. Ngelinye ilanga uJehova wathumela ingilozakhe kumkaManowarhi. Ingilozi yathi kuye: ‘Uzokuba nendodana ezokusindisa ama-Israyeli esandleni samaFilista. Izokuba mNaziri.’ Uyazi ukuthi bekabobani amaNaziri? Bekubakhulekeli bakaJehova abakhethekileko. AmaNaziri bekangakavunyelwa ukuthi agude iinhluthu zawo.

Ngesikhathi esifaneleko uManowarhi wabelethelwa indodana, wayithiya bona nguSamsoni. Nakakhulako, uJehova wamenza waba namandla. USamsoni bekakwazi ukubulala ibhubezi ngezandla zakhe. Ngesinye isikhathi, uSamsoni wabulala amaFilista ama-30 ayedwa. AmaFilista gade amhloyile afuna neendlela zokumbulala. Kwathi ngobunye ubusuku uSamsoni alele eGaza, amaFilista amlinda ebusuku esangweni ledorobha, afuna ukumbulala ekuseni. Kodwana phakathi nobusuku, uSamsoni wavuka, waya esangweni, waliruthula lahlukana nomthangala. Wathwala isangwelo emahlombakhe watjhinga nalo entabeni iRhebroni!

Kamuva, amaFilista aya entombini kaSamsoni, uDelila, athi kuye: ‘Sizokubhadala iinkulungwana zesiliva nange ungathola ukuthi kubayini uSamsoni anamandla kangaka. Sifuna ukumbopha simvalele ejele.’ UDelila bakayifuna tle imali leyo, yeke wavuma. Ekuthomeni uSamsoni wala ukumtjela ukuthi uwathathaphi amandla angaka. Kodwana wambelesela bekwaba kulapho embula khona ifihlwakhe. Watjela uDelila wathi: ‘Akhenge khengirhunwe ihloko ngombana ngimNaziri. Naningarhunwa, ngizokuphelelwa mamandla.’ USamsoni wenza umtjhapho omkhulu ngokumtjela lokho, kghani akusinjalo?

UDelila warhaba watjela amaFilista wathi: ‘Ngiyayazi ifihlwakhe!’ Wenza uSamsoni bona alale phezu kweenyonga zakhe bese wamrhuna iinhluthu. UDelila warhuwelela wathi: ‘Samsoni, naka amaFilista!’ USamsoni wavuka kodwana bekangasenamandla. AmaFilista ambamba, amgobhodlha amehlo, amfaka ejele.

Ngelinye ilanga amaFilista aziinkulungwana ahlangana ethempelini lakazimabo uDagoni, arhuwelela athi: ‘Uzimethu usinikele uSamsoni! Mletheni ngapha, sikwazi ukumhleka!’ Bamjamisa hlangana namapilara amabili, bahlekisa ngaye. USamsoni wabiza uZimu wathi: ‘Jehova ngibawa ungiphe amandla kwamaswaphela.’ Ngesikhatheso iinhluthu zakaSamsoni besele zikhulile zizide godu. Wasunduza amapilara wethempeli ngawo woke amandlakhe. Umakhiwo woke wagirika, kwafa woke umuntu ongaphakathi ethempelini noSamsoni wafa kanye nabo.