UJehova Uvikela UJehotjhafathi

UJehotjhafathi, ikosi yakwaJuda wasusa woke ama-aldara kaBhali, wasusa neenthombe ebezilotjhwa enarheni. Bekafuna abantu bazi umthetho kaJehova. Ngalokho wathumela amakhosana namaLevi kiyo yoke indawo yakwaJuda bona bafundise abantu umthetho kaJehova.

Iintjhaba eziseduze bezisaba ukusahlela amaJuda ngombana bezazi kuhle ukuthi uJehova uyabavikela abantu bakhe. Iintjhabezo zabe zalethela nekosi uJehotjhafathi izipho. Kodwana bakwaMowabi, bakwa-Amoni nalabo abahlala esifundeni seSeyiri beza bazokulwa namaJuda. UJehotjhafathi bekazi ukuthi utlhoga isizo lakaJehova. Wabiza amadoda woke, abafazi nabantwana bona bahlangane ndawonye eJerusalema. Phambi kwabo boke wathandaza wathi: ‘Jehova, ngaphandle kwakho, angekhe sathumba. Ngiyabawa, sitjela ukuthi senzeni.’

UJehova wawuphendula umthandazwabo nakathi: ‘Ningasabi. Ngizonisiza. Nina jamani, nibone ukuthi ngizonisindisa njani.’ Wabasindisa njani uJehova?

Ngakusasa ekuseni, uJehotjhafathi wakhetha abavumi wabatjela ukuthi babhine begodu bakhambe phambi kwebutho. Bakhamba njalo basuka eJerusalema batjhinga endaweni yepi ebizwa ngokuthi yiTekhowa.

Njengombana abavumi bebabhina, badumisa uJehova ngethabo nangephimbo elikhulu, uJehova walwela abantu bakhe. Wararanisa ama-Amoni nabakwaMowabi ngendlela yokobana bathoma ukusahlelana bodwa begodu azange kusinde namunye. Kodwana uJehova wabavikela abantu bakwaJuda, amasotja kunye nabaphristi bakhona. Boke abantu beenarha eziseduze bezwa ngokwenziwa nguJehova, balemuka nokuthi uJehova usabavikela abantu bakhe. UJehova wabavikela njani abantu bakhe? Ngeendlela ezinengi. Akatlhogi ukusizwa mumuntu bona abavikele.