UJesu Uba NguMesiya

UJwanisi watjhumayela wathi: ‘Uyeza omkhulu kunami.’ Kwathi uJesu nakaba neminyaka ema-30 ubudala, wasuka eGalile waya emLanjeni weJordani, lapho uJwanisi ebekabhabhadisela khona. UJesu bekafuna uJwanisi ambhabhadise kodwana uJwanisi wathi: ‘Akukafaneli ngikubhabhadise. Wena kufuze ubhabhadise mina.’ Kodwana uJesu wathi kuye: ‘UJehova ufuna ngibhajadiswe nguwe.’ Nje-ke bangena ngemLanjeni weJordani, uJwanisi wacwilisa uJesu ngokupheleleko ngaphakathi kwamanzi.

Kuthe uJesu nakakhuphuka ngemanzini, wathandaza. Khonokho, izulu lavuleka, kwehla umoya ocwengileko kaZimu unjengejuba. Ngemva kwalokho uJehova wakhuluma asezulwini wathi: “UyiNdodanami engiyithandako; ngikwamukele.”

Kwathi umoya kaJehova nawungena kuJesu, waba nguKrestu namkha uMesiya. Nje, besekangathoma ngomsebenzi uJehova ebekamthume bona azowenza ephasini.

Nakaqeda ukubhajadiswa, uJesu waya emmangweni, wahlala lapho amalanga ama-40. Nakabuyako, waya kuJwanisi. Nakasondela kuye, uJwanisi wathi: ‘Le yiMvana kaZimu ezokususa isono ephasini.’ Ngokutjho kwakhe njalo, uJwanisi bekatjela abantu ukuthi uJesu unguMesiya. Uyazi bona kwenzekani kuJesu nakasemmangweni? Khesibone.