UJesu Uhlanza Ithempeli

Ngesilimela somnyaka ka-30  C.E., uJesu waya eJerusalema. Abantu abanengi bebeze edorobheni emnyanyeni wePhasika. Emnyaneni loyo bekwenziwa neminikelo ngeenlwana ethempelini. Abanye abantu bebeza nezabo iinlwana, abanye bazithenga eJerusalema.

UJesu nakafika, wathola abantu bathengisela iinlwana ngethempelini. Bebathengisela endaweni yokulotjha uJehova, imali abayitholako ibe ngeyabo. Kwamphatha njani lokho uJesu? Wenza isibebhu ngamarobho waqotha ngaso izimvu neenkomo ebezisethempelini. Nakaqedako waketula amatafula walabo abatjhentjha imali, warhatjha nemalabo leyo yazala phasi. UJesu watjela labo ebebathengisa amajuba wathi: ‘Susani izintwezi la! Ningenzi indlu kaBaba indawo yebhizinisi!’

Abantu ebebasethempelini kwabarara lokho okwenziwa nguJesu. Abafundi bakhe bakhumbula isiphorofido esikhuluma ngoMesiya esithi: ‘Ngizoyitjhisakalela indlu kaJehova.’

Ngokukhamba kwesikhathi, ngomnyaka ka-33 C.E. UJesu walihlanza kwesibili ithempeli. Bekangekhe avumele namunye bona adelele indlu kaBabakhe.