UJesu Utjhumayela Umlayezo WomBuso

Ngemva kokubhajadiswa kwakhe, uJesu wathoma ukutjhumayela wathi: ‘UmBuso kaZimu useduze.’ Abafundi bamlandela njengombana akhamba loke iGalile neJudiya. UJesu nakabuyela ekhabo eNazaretha, waya esinagogeni wafika wavula umsongo ka-Isaya, wawufunda ngokuzwakalako wathi: ‘Umoya ocwengileko kaJehova uphezu kwami bona ngitjhumayele iindaba ezimnandi.’ Bekatjho ukuthini ngalokho? Bekatjho ukuthi nanyana abantu bathatjiswa kumbona enza iimangaliso kodwana umnqopho wokuthola kwakhe umoya ocwengileko bekukutjhumayela iindaba ezimnandi. Ngemva kwalokho, watjela labo abamlaleleko ukuthi: ‘Namhlanjesi isiphorofidwesi sizalisekile.’

Ngokulandelako, uJesu waya eLwandle leGalile, okukulapho ahlangana khona nabafundi bakhe ebebabathiyi beemfesi, uPitrosi, u-Andrisi, uJakopo, noJwanisi. Wabamema wathi: ‘Ngilandelani, ngizonenza abathiyi babantu.’ Batjhiya ibhizinisi labo khonokho, bamlandela. Balikhamba loke iGalile, batjhumayela ngomBuso kaJehova. Bebatjhumayela emasinagogeni, eendaweni zokuthengisela, neendleleni. Bebalandelwa liwomakazi labantu nanyana kukuphi lapho baya khona. Iindaba ngoJesu zarhatjheka yoke indawo, bezayokufika neendaweni ezikude eSiriya.

Ngokukhamba kwesikhathi, uJesu wapha abanye babalandeli bakhe amandla wokulapha abantu nokuqotha amadimoni. Abanye bakhamba naye njengombana atjhumayela imizi nemizi, nemizana ngemizana. Abafazi abathembileko, okufaka hlangana uMariya Magdalina, uJwana, uSusana nabanye batlhogomela uJesu nabalandeli bakhe.

Ngemva kokubandula abafundi bakhe, uJesu wabathuma ukuthi bayokutjhumayela. Njengombana batjhumayela eGalile, kwaphenduka abantu abanengi baba bafundi, babhajadiswa. Ngendlela ebebabanengi ngayo abafuna ukuba bafundi, uJesu wabe wabafanisa nesimu elungele ukuvunwa. Wathi: ‘Thandazani kuJehova bona athumele iinsebenzi ezingeziweko esivunweni.’ Ngokukhamba kwesikhathi, wakhetha abama-70 ebafundini bakhe, wabathuma ngababili bona bayolitjhumayela loke iJudiya. Bafundisa yoke imihlobo yabantu ngomBuso. Kwathi abafundi nababuyako, bafuna ukutjela uJesu ngakho koke okwenzekileko. Akunalitho uDeveli ebekangalenza bona avimbe umsebenzi wokutjhumayela.

UJesu wenza isiqinisekiso sokuthi abafundi bakhe bazokuraga nomsebenzi oqakathekileko lo nalokha nasekabuyele ezulwini. Wathi kibo: ‘Tjhumayelani iindaba ezimnandezi kilo loke iphasi. Fundisani abantu ngeliZwi lakaZimu, nibabhabhadise.’