Isidlo Santambama Samaswaphela KuJesu

Qobe mnyaka ngelanga le-14, enyangeni kaNisani, amaJuda bekagidinga iPhasika. Lokho bekusikhumbuzo sokuthi uJehova wawatjhaphulula ebugqileni eGibhide wawaletha eNarheni yesiThembiso. Ngomnyaka ka-33 C.E. uJesu nabapostoli bakhe bagidinga iPhasika akamerweni eliphezulu eJerusalema. Nabaqeda ukudla, uJesu wathi: ‘Munye hlangana nani uzongithengisa.’ Lokho kwabathusa abapostoli, babuza uJesu bathi: ‘Ngubani loyo?’ UJesu wathi: ‘Ngomunye ohlangana nani engimupha uburotho.’ Yeke wanikela uJudasi Iskariyodi uburotho. Ngemva kwalokho uJudasi wasikima wakhamba.

UJesu wathandaza, wagamula uburotho baba ziincucwana, wabunikela abapostoli bakhe ebekasele nabo. Wathi kibo: ‘Idlani uburothobu. Bujamele umzimbami ozokunikelwa ngebanga lenu.’ Ngemva kwalokho wathandazela iwayini walinikela abapostoli bakhe. Wathi: ‘Selani iwayini le. Ijamelele iingazi zami, engizokunikela ngazo bona izono zilitjalelwe. Ngiyanithembisa, nizokuba makhosi kunye nami ezulwini. Yenzani lokhu qobe mnyaka, ningikhumbule.’ Abalandeni bakaJesu basahlangana entambama ngalesi isikhathi somnyaka. Umhlangano loyo ubizwa ngesiDlo seKosi saNtambama.

Nasebadlile, abapostoli baphikisana ngokuthi ngubani kibo ebekaqakatheke khulu kuJesu. Kodwana uJesu wathi kibo: ‘Omkhulu kini noke ngiloyo ozibona amncani kini noke, ozibona angakaqakatheki okungako.’

‘Nibangani bami. Nginitjela koke uBaba athi nginitjele khona. Kungasi kade ngizokubuyela kuBaba ezulwini. Nina nizokusala begodu abantu bazokwazi ukuthi nibalandeli bami ngendlela enithandana ngayo. Nje-ke kufuze nithandane ngendlela enginithande ngayo.’

Ngemva kwalokho uJesu wathandaza, wabawa bona uJehova avikele abalandeli bakhe. Wabawa nokuthi abasize bakghone ukusebenza ndawonye ngokuthula. Wathandazela bona ibizo lakaJehova licwengiswe. Ngemva kwalokho uJesu nabapostoli bakhe babhina badumisa uJehova baphumela ngaphandle. Isikhathi sokuthi uJesu abotjhwe besele sisondele.