ISIFUNDO 20
Lihlelwe Njani Ibandla?
UJehova nguZimu ohlelekileko. (1 Korinte 14:33) Nje-ke kufuze silindele ukuthi nabantu bakhe bahleleke. Lihleleke njani ibandla lamaKrestu? Khuyini esingakwenza bona liphumelele?
1. Ngubani onqophisa ibandla?
‘UKrestu yihloko yebandla.’ (Efesu 5:23) Unqophisa imisebenzi yabantu bakaJehova ephasini loke asezulwini. UJesu ubeke “inceku ethembekileko nehlakaniphileko,” isiqhema esincani sabadala abavuthiweko ababizwa ngokuthi siHlopha esiBusako. (Funda uMatewu 24:45-47.) IsiHlopha esiBusako sifana nabapostoli bekadeni nabadala beJerusalema, sinikela isinqophiso emabandleni wephasini loke. (IzEnzo 15:2) Kodwana amadoda la akusiwo alawula ihlanganwethu. Afunda iBhayibheli bona afumane ukuthi uJehova ufuna enzeni begodu alandela isinqophiso sakaJesu.
2. Bobani abadala begodu uyini umsebenzabo?
Abadala madoda amaKrestu athembeke iminyaka eminengi bafundisa abantu bakaJehova basusela eBhayibhelini, bayabasiza begodu babakhuthaze. Ababhadelwa ngomsebenzi abawenzako. Balotjha “ngokuzithandela phambi kwakaZimu; ingasi ngethando lenzuzo yokungathembeki, kodwana ngokuzimisela.” (1 Pitrosi 5:1, 2) Iinceku ezisizako madoda asebandleni asizana nabadala, ngokukhamba kwesikhathi iinceku ezisizako zingafaneleka bona zibe badala.
IsiHlopha esiBusako sikhetha abanye abadala bona babe bajikelezi. Bavakatjhela amabandla ahlukahlukeneko bona bawanqophise begodu bawakhuthaze. Abajikelezi basebenzisa iinkambiso zeBhayibheli ukubona ukuthi umfowethu angaba yinceku esizako namkha umdala.—1 Thimothi 3:1-10, 12; Titosi 1:5-9.
3. Khuyini elindeleke kuFakazi kaJehova ngamunye?
Boke ebandleni ‘badumisa igama lakaJehova’ ngokuhlanganyela emihlanganweni yebandla nangokutjhumayela ngendlela abangakghona ngayo.—Funda iRhubo 148:12, 13.
FUNDA NGOKUNGENELELEKO
Funda ngokuthi uJesu bekamdosiphambili onjani, abadala bamlingisa njani nokuthi singamlalela njani uJesu begodu sisebenzisane nabadala.
4. UJesu mdosiphambili onomusa
UJesu uyasimema. Funda uMatewu 11: 28-30, bese nicoca ngombuzo lo:
UJesu mdosiphambili onjani begodu ufuna sizizwe njani?
Abadala basilingisa njani isibonelo sakaJesu? Dlala IVIDIYO.
IBhayibheli lifundisa abadala indlela ekufuze benze ngayo umsebenzabo.
Funda u-Isaya 32:2; neyoku-1 kaPitrosi 5:1-3, bese nicoca ngemibuzo le:
Kukwenza uzizwe njani ukwazi ukuthi abadala balingisa uJesu ngokuthi bakhuthaze abanye?
Ngiziphi ezinye iindlela abadala abalingisa ngazo uJesu?
5. Abadala bafundisa ngokuba sibonelo
UJesu ufuna abadala bawuqale njani umsebenzabo? Dlala IVIDIYO.
UJesu ubekela labo abadosa phambili ebandleni umtlhala. Funda uMatewu 23:8-12, bese nicoca ngombuzo lo:
Khuyini oyithandako ngomehluko okhona hlangana kweenkambiso zeBhayibheli ezinikelwa abadala nalokho okubonileko ngabarholi bekolo?
Abadala benza itjhebiswano labo noJehova lihlale liqinile begodu basiza nemindenabo bona yenze okufanako
Abadala batlhogomela boke ebandleni
Abadala batjhumayela qobe
Abadala bayafundisa. Bayasiza ngokuhlwengisa nangeminye imisebenzi
6. Singasebenzisana nabadala
IBhayibheli lisinikela ibanga eliqakathekileko lokusebenzisana nabadala. Funda amaHebheru 13:17, bese nicoca ngemibuzo le:
Kubayini iBhayibheli lithi kufuze silalele begodu sithobele labo abasinqophisako? Uzizwa njani ngalokho?
Funda uLukasi 16:10, bese nicoca ngombuzo lo:
Kubayini kufuze sihlale silalela abadala ngitjho neentweni ezibonakala zizincani?
ABANYE ABANTU BATHI: “Akutlhogeki ube sekolweni ehlelekileko.”
Ngiziphi iinzuzo ongazifumana ngokuba lilunga lebandla lakaZimu?
ISIRHUNYEZO
NguJesu onqophisa ibandla. Siyakuthabela ukubambisana nabadala abasebenza ngaphasi kwakhe ngombana bayasikhuthaza begodu basifundisa ngesibonelo sabo.
Buyekeza
Ngubani onqophisa ibandla?
Abadala balisiza njani ibandla?
Iyini indima yawo woke umuntu olotjha uJehova?
HLOLA OKUNGENZASI
Qala ubufakazi bokuthi isiHlopha esiBusako nabadala banendaba kangangani namaKrestu namhlanjesi.
Ukuqinisa Abafowethu Lapho Umsebenzethu Ukhandelwe Khona (4:22)
Funda ngomsebenzi owenziwa bajikelezi.
Funda ngendima yabafazi ebandleni.
“Inga-kghani AboFakazi BakaJehova Banabo Abafundisi Babomma?” (IsiThala, Septemba 1, 2012)
Akhubone indlela abadala abasebenza budisi ngayo bona bakhuthaze labo abalotjha nabo.
‘AbaDala AbamaKrestu BaziinSebenzi Ezikunye Nathi Bona SiThabe’ (IsiThala, Janabari 15, 2013)