Singazithatha Njani Iinqunto Ezivuthiweko?

Soke sineenqunto okufuze sizithathe. Iinqunto ezinengi zingakuthinta khulu ukuphila kwethu nobuhlobo bethu noJehova. Ngokwesibonelo kungafuze sithathe isiqunto sokuthi sizokuhlalaphi, sizozitlhogomela njani, sizokutjhada namkha awa. Nasithatha iinqunto ezihle sizokuthaba begodu sithabise uJehova.

1. Ungalisebenzisa njani iBhayibheli bona likusize uthathe iinqunto ezivuthiweko?

Ngaphambi kokuthatha isiqunto thandaza kuJehova umbawe bona akusize begodu ufunde iBhayibheli ubone ukuthi uyiqala njani indaba leyo. (Funda IzAga 2:3-6.) Kobunye ubujamo, uJehova usinikela umthetho onqophileko. Nangabe kunjalo, isiqunto esihle ongasithatha kulalela umthetho loyo.

Alo kuthiwani-ke nangabe akunamthetho onqophileko oseBhayibhelini okutjela bona kufuze wenzeni? Nanyana kunjalo uJehova usazokunqophisa “endleleni ekufuze ukhambe kiyo.” (Isaya 48:17) Uzokunqophisa njani? Uzokunikela iinkambisolawulo ezizokusiza. Iinkambisolawulo zeBhayibheli maqiniso asisekelo aveza imizwa nemicabango kaZimu. Ngezinye iinkhathi singabona indlela uJehova azizwa ngayo lokha nasifunda ngendaba ethileko eBhayibhelini. Nasazi indlela uJehova azizwa ngayo, sizokuthatha iinqunto ezizomthabisa.

2. Ngiziphi izinto okufuze ucabange ngazo ngaphambi kokuthatha isiqunto?

IBhayibheli lithi: ‘Ohlakaniphileko ucabangisisa ngalokho azokwenza.’ (IzAga 14:15) Lokho kutjho ukuthi ngaphambi kokuthatha isiqunto kufuze siziphe isikhathi sokucabangisisa sibone ukuthi khuyini esingayikhetha. Nawusacabangisisa ngalokho ozokukhetha, zibuze: ‘Ngiziphi iinkambisolawulo zeBhayibheli engingazisebenzisa? Ngikuphi engingakukhetha okuzongenza ngibe nokuthula? Isiqunto engisithathako sizobathinta njani abanye? Okuqakatheke khulu, sizomthabisa na uJehova?’—Duteronomi 32:29.

UJehova unelungelo lokusitjela ukuthi khuyini elungileko nengakalungi. Nasiyazi kuhle imithethwakhe neenkambisolawulo zakhe begodu sizimisele ukuphila ngazo, sisuke sibandula abonembeza bethu. Unembeza ngilokho okusitjelako ukuthi into ilungile namkha ayikalungi. (Roma 2:14, 15) Unembeza obandulwe kuhle uzosisiza sithathe iinqunto ezivuthiweko.

FUNDA NGOKUNGENELELEKO

3. Vumela iBhayibheli likunqophise

IVIDIYO: Nqotjhiswa Ziinkambisolawulo ZeBhayibheli (5:54)

• Ngisiphi isipho esiligugu uJehova asiphe sona?

• Kubayini uJehova asivumela bona sizikhethele?

• Khuyini uJehova asiphe yona bona asisize sithathe iinqunto ezivuthiweko?

Nawufuna ukubona isibonelo sekambisolawulo eseBhayibhelini, funda kwebe-Efesu 5:15, 16. Ngemva kwalokho nicoce ngokuthi ‘ungasisebenzisa njani kuhle isikhathi sakho’ bona . . .

• ufunde iBhayibheli qobe

• ube mlingani womtjhado ongcono, umbelethi, indodana namkha indodakazi engcono

• uye esifundweni

4. Bandula unembezakho bona wenze iinqunto ezivuthiweko

IVIDIYO: “Hlala Unonembeza Omuhle” (5:13)

• Evidiyweni, ngimaphi amagadango athethwe ngudade bona abandule unembezakhe begodu athathe isiqunto esithabisa uJehova?

Kubayini kungakafuzi sibawe abanye bona basithathele iinqunto okufuze zithathwe ngithi? Funda amaHebheru 5:14, bese nicoca ngemibuzo le:

• Nanyana kungabonakala kulula ukubawa abanye bona basithathele iinqunto, khuyini okufuze sizihlukanisele yona?

• Khuyini engakusiza ubandule unembezakho begodu uthathe iinqunto ezivuthiweko?

5. Hlonipha abonembeza babanye

Abantu bahlukile, nje-ke neenqunto abazithathako zizokuhluka. Singabahlonipha njani abonembeza babanye? Cabanga ngananzi iimbonelo ezimbili:

Isibonelo soku-1: Udade othanda ukuphafa uthuthela ebandleni lapho abodade bakhona abanengi abangakuthandi ukuphafa.

Funda kwebeRoma 15:1 neyoku-1 kwebeKorinte 10:23, 24, bese nicoca ngombuzo lo:

• Ngokwamavesi la, udadwethu lo angaqunta ukwenzani? Ungawasebenzisa njani amavesi la nawunomuntu unembezakhe ongamvumeliko bona enze into ethileko kodwana wakho uyakuvumela?

Isibonelo sesi-2: Umfowethu uyazi ukuthi iBhayibheli alithi kumbi ukusela utjwala kodwana ukhetha ukungabuseli. Umfowethu lo umenyelwa esidlweni begodu ubona abanye abafowethu basela utjwala.

Funda uMtjhumayeli 7:16 nekwebeRoma 14:1, 10, bese nicoca ngombuzo lo:

• Ngokwamavesi la, umfowethu lo angaqunta ukwenzani? Ungawasebenzisa njani amavesi la lokha nawubona umuntu enza into unembezakho akutjela bona ayikalungi?

Khuyini engakusiza bona uthathe iinqunto ezivuthiweko?

1. Bawa uJehova akusize uqunte bona yini okufuze uyenze?—Jakopo 1:5.

2. Yenza irhubhululo eBhayibhelini neencwadini ezisekelwe kilo bona ufumane iinkambisolawulo ongazisebenzisa. Ungakhuluma namaKrestu anelemuko.

3. Cabanga ukuthi isiqunto osithathako sizomthinta njani unembezakho nabonembeza babanye.

ISIRHUNYEZO

Sithatha iinqunto ezihle lokha nasifunisisa ukuthi uJehova uzizwa njani ngendaba ethileko bese sicabange ngokuthi izenzo zethu zizobasiza abanye namkha zizobalimaza.

Buyekeza

• Ungazithatha njani iinqunto ezithabisa uJehova?

• Ungambandula njani unembezakho?

• Ungabahlonipha njani abonembeza babanye?

HLOLA OKUNGENZASI

Ungazithatha njani iinqunto ezizokuqinisa ubuhlobo bakho noZimu?

“Yenza Iinqunto Ezidumisa UZimu” (IsiThala, Apreli 15, 2011)

Funda okungeziweko okuzokusiza uzwisise ukuthi uJehova usinikela njani iseluleko.

UJehova Uyabanqophisa Abantu Bakhe (9:50)

Funda ngokuthi yini eyasiza enye indoda yathatha isiqunto esibudisi.

UJehova Usithembisa Okuhle Kwaphela (5:46)