Ukwethula ISithalasokulinda SesiNgisi Esenziwe Bulula
SIYATHABA ukunazisa bona isikhathi esingangomnyaka kuzokulingwa ISithalasokulinda sesiNgisi esenziwe bulula esizokuphuma qobe nyanga njengomagazini ofundwako ukuthoma ngaso lesi. Sizokuba neenhloko ezifundwako, nekunesikhala esiseleko, kuzokufakwa nezinye iinhloko. Sikholelwa bona lokhu kuzokwanelisa itlhogo engokomoya eqakathekileko yaboFakazi BakaJehova abanengi. Kubayini kunjalo?
IsiNgisi lilimi elijayelekileko elikhulunywa banakwethu eenarheni ezinjenge-Fiji, eGhana, eKenya, eLiberia, eNigeria, ePapua New Guinea, neSolomon Islands. Nanyana abanakwethu eenarhenezi bangakhuluma ezinye iinlimi zendawo namtjhana zendabuko, kanengi basebenzisa isiNgisi nebakhulumako emihlanganweni yebandla nekonzweni yesimini. Nokho, isiNgisi abasikhulumako silula kunalesi esitlolwe eencwadini zethu. Godu, kunabanye babantu bakaJehova abafudukele eenarheni lapho kufuze bakhulume khona isiNgisi ngitjho nanyana ilwazi labo ngelimelo lilinganiselwe. Ngaphezu kwalokho, abakghoni ukuya eemhlanganweni yebandla eragwa ngelimi labo.
Iinhloko esizifunda qobe veke eSifundweni seSithalasokulinda ziyindlela eyihloko yokusondla ngokudla okungomoya okufika ngesikhathi. Ngalokho-ke, ukusiza boke abeze emhlanganweni bona bazuze ngokuzeleko kizo, ISithalasokulinda sesiNgisi esenziwe bulula sitlolwe ngamezwi abulula. Ihlelo elitjheli lizokuba nekhava ehlukileko. Iinhlokwana, iingaba, iimbuzo yokubuyekeza, neenthombe eziseenhlokweni ezifundwako zizokukhambisana nezeSithalasokulinda esijayelekileko. Ngalokho-ke, woke umuntu uzokukhambisana kuhle begodu ahlanganyele eSifundweni seSithalasokulinda kungakhathaliseki bona uphethe siphi. Ukutjengisa umehluko hlangana kwamahlelo amabili la, qala isibonelo esisenzasi esithethwe esigabeni-2 sesihloko sokuthoma esifundwako sakamagazini lo.
Sithemba bona ilungiselelweli lizokuphendula imithandazo yabanengi abathe kuJehova: “Ngenza ngizwisise, bona ngizokwazi ukufunda iimlayo yakho.” (Rha. 119:73) Siyaqiniseka bona labo abanelwazi elilinganiselweko lesiNgisi, kuhlanganise nabantwana abakhuluma isiNgisi, bazokukghona ukusilungiselela ngcono iSifundo seSithalasokulinda saqobe veke. Sithokoza uJehova bona ‘ngokuthanda abazalwana,’ usebenzise ‘inceku ethembekileko nehlakaniphileko’ ukunikela inala yokudla okungokomoya.—1 Pit. 2:17; Mat. 24:45.
ISihlopha Esibusako SaboFakazi BakaJehova