Funda ELizwini LakaZimu
Umndenakho Ungalifumana Njani Ithabo?
Isihlokwesi siphakamisa iimbuzo okungenzeka ukhe wazibuza yona bese sitjengisa lapho ungafumana khona iimpendulo eBhayibhilinakho. AboFakazi BakaJehova bazokuthabela ukucoca nawe ngeempendulwezi.
1. Kubayini umtjhado uqakathekile bona umndeni uthabe?
UJehova uZimu othabileko, wathomisa umtjhado. Uqakathekile bona umndeni uthabe ngombana awakhi ubungani kwaphela kodwana godu unikela indawo evikelekileko ekukhuliseni abantwana. UZimu uwuqala njani umtjhado? Ufuna bona ube sibopho esihlala unomphela hlangana nendoda nomfazi begodu utloliswe ngokomthetho. (Luka 2:1-5) UZimu ufuna amadoda nabafazi bona bathembeke komunye nomunye. (KumaHebheru 13:4) UJehova uvumela amaKrestu bona atlhale begodu atjhade kwaphela nengabe umlingani womtjhado uphingile.—Funda uMatewu 19:3-6, 9.
2. Indoda nomfazi kufuze baphathane njani?
UJehova wabumba indoda nomfazi bona baphelelisane emtjhadweni. (Genesisi 2:18) Njengehloko yomndeni, indoda kufuze idose phambili ekutlhogomeleni umndenayo ngezinto eziphathekako nekuwufundiseni ngoZimu. Kufuze ibe nethando lokuzidela ngomkayo. Amadoda nabafazi kufuze bathandane begodu bahloniphane. Njengombana boke amadoda nabafazi bangakapheleli, ukufunda ukulibalelana yipengu yethabo lomtjhado.—Funda Kwebe-Efesu 4:31, 32; 5:22-25, 33; 1 KaPitrosi 3:7.
3. Nengabe awukathabi emtjhadwenakho, kufuze utjhiye umlinganakho?
Nengabe wena nomlinganakho niqalene nobudisi, sebenzelani ekuphathaneni ngethando. (1 KwebeKorinte 13:4, 5) ILizwi lakaZimu alikhuthazi ukuhlala ngokuhlukana njengendlela yokurarulula iimraro yomtjhado. Nokho, ebujamweni obubudisi khulu, umKrestu kufuze azikhethele bona kukuhlakanipha ukuhlala ngokuhlukana nofana awa.—Funda u-1 KwebeKorinte 7:10-13.
4. Bantwana, khuyini uZimu anifunela yona?
UJehova ufuna bona nithabe. Uninikela isiluleko esingcono khulu sendlela eningathabela ngayo ubutjha benu. Ufuna nizuze ekuhlakanipheni nokuhlangabezanwe nakho kwababelethi benu. (KwebeKholose 3:20) UJehova uthabela nanyana yini eniyenzako bona nimdumise.—Funda UMtjhumayeli 11:9–12:1; Matewu 19:13-15; 21:15, 16.
5. Babelethi, abantwabenu bangalifumana njani ithabo?
Kufuze nisebenze budisi ukutlhogomela abantwabenu ngokudla, indawo yokuhlala nezambatho. (1 KuThimothi 5:8) Kodwana bona abantwabenu bafumane ithabo, godu kufuze nibafundise ukuthanda uZimu bebafunde kuye. (Kwebe-Efesu 6:4) Isibonelo senu ekutjengiseni ithando ngoZimu singayithinta khulu ihliziyo yomntwanenu. Nesisekelwe eLizwini lakaZimu, isinqophiso senu singenza umntwanenu bona acabange ngendlela ehle.—Funda uDuteronomi 6:4-7; Iziyema 22:6.
Abantwana bayazuza newubakhuthazako begodu ubabuke. Godu batlhoga ukukhalinywa nokulaywa. Ukubandulwa okunjalo kubavikela emikghweni engabaqedela ithabo. (Iziyema 22:15) Nokho, ukulaya akutjho ukubakgharameja namtjhana ukuba nelunya.—Funda KwebeKholose 3:21.
AboFakazi BakaJehova bagadangisa iincwadi ezimbalwa ezitlolwe ngokukhethekileko ukusiza ababelethi nabantwana. Iincwadezi zisekelwe eBhayibhilini.—Funda IRhalani 19:7, 11.
Bona ufumane imininingwana engeziweko, qala isahluko 14 sencwadi le Khuyini Kwamambala Okufundiswa YiBhayibhili?, egadangiswa boFakazi BakaJehova.