Fundisa Abantwabakho
Iinkhathi Ekufuze Sihlale Siphaphamile Ngazo
UNGAVUMA bona ukuhlala uphaphamile newusesikolweni kuqakathekile. Abanengi baphathwa buthongo nekufundwako eklasini, kodwana bona ufunde, kufuze uhlale uphaphamile. Mhlamunye uyaya emihlanganweni lapho ufunda khona iBhayibhili.
Ucabanga bona khuyini engakusiza bona uhlale uphaphamile?—a Okhunye okungakusiza kungalali ebusuku khulu. Mhlamunye nokulala kancani ngemva kwamadina kungakusiza. Khesibone bona khuyini esingayifunda kilokho okwenzeka komunye osesemutjha owalala isigiyani langelinye ebusuku uPowula nekanikela ikulumo. Qala eBhayibhilini kuZenzo isahluko 20, amavesi 7 ukuya ku-12, ubone bona kwenzekani.
UPowula bekavakatjhele ibandla elisesitjhaphululweni seenkepe edorobheni leTrowasi. IBhayibhili ithi uPowula “gade azakhamba ngakusasa” ngesikepe. Ngalokho “wasolo akhuluma bekwaba phakathi kobusuku.” Siyafunda: ‘Isokana, ibizo lalo elingu-Eyutikhusi, belihlezi ngefesidirini; Kwathi uPowula asakhuluma, u-Eyutikhusi wayenda bewalala.’ Kwenzekani ngokulandelako?—
U-Eyutikhusi wawela ngaphandle ngefesidiri ‘ekumbeni yesithathu ukuya phasi.’ UPowula nabanye bagijimela phasi msinyana ngendlela abangakghona ngayo behla ngeentebhisi. U-Eyutikhusi bekaphasi—afile! Ungacabanga na bona boke bebadane kangangani?— IBhayibhili ithi uPowula waguga u-Eyutikhusi wamgona. Msinyana uPowula warhuwelela ngethabo wathi: “Ningatshwenyeki, usaphila.” UZimu wamvusa u-Eyutikhusi!
Khuyini esingayifunda ngoZimu kilokho okwenzeka ku-Eyutikhusi?— Sifunda bona uJehova, uBabethu wezulwini, angabavusa abafileko kuhlanganise nabancani. UJehova uyakuzwisisa begodu ukuthanda ngitjho nangaphezu kwababelethi bakho. UJesu nasephasini, watjengisa bona uJehova unjani ngokuguga nokubusisa abantwana. Godu wavusa nabentwana, kuhlanganise nomntazana oneemnyaka eli-12.
Ukwazi bona uBabakho wezulwini uyakuthanda kukwenza uzizwe njani?— Kusenza bona simthande nathi uJehova begodu sifune ukulalela lokho akutjhoko. Uyazi bona singatjengisa njani bonyana siyamthanda?— Ngokuthi nathi sithi siyamthanda. UJesu wathi: “Ngiyamthanda uBaba.” Kodwana uJesu wenza okungaphezu kobana athi uyamthanda uZimu. Wakutjengisa ngezenzo.
UJesu walalela uZimu. UJesu wathi, “Ngenza njalo okumthokozisako.” Nesenza okufanako bona sithabise uJehova neNdodanakhe uJesu, sizokulinga ukuhlala siphaphamile nekufuze senze njalo.
Funda eBhayibhilinakho
IZenzo 20:7-12
[Umtlolo waphasi]
a Nengabe ufunda nomntwana, umuda ukukhumbuza bona kufuze ujame kancani begodu ukhuthaze umntwana bona aveze amazizwakhe.