Asithabeni Ndawonye!

KUYA kuba budisi khulu ukufumana ithabo. Kwabanengi, kubonakala pheze kungeze kwakghoneka ukuhlanganyela iimbono emihle nabanye. Ukuphila kwagadesi, khulukhulu emadorobheni amakhulu, kubangela abantu bona bazihlukanise, babe yikomo edla yodwa.

U-Alberto Oliverio uPhrofesa Wokusebenza Komkhumbulo wathi, “Isizungu bujamo obujayeleke khulu, akunakuzaza nokobana ukuphila kwemadorobheni amakhulu kubanga ukuhlukana.” Ebujamweni obunengi, kwenza singakunaki ukuphila komuntu esisebenza naye e-ofisini, umakhelwana, namtjhana umuntu esibhadala kuye esitolo.” Ngokujayelekileko ukuzihlukanisa okunjalo kubangela ukugandeleleka.

Nokho, ubujamo nomoya wamaKrestu esikunye nawo uhlukile. Umpostoli uPowula watlola: ‘Nihlale nithabile.’ (1 Tes. 5:16) Sinamabanga amanengi wokuthaba nokuthaba ndawonye. Sikhulekela uZimu oPhezukoke, uJehova; siyawuzwisisa umlayezo weqiniso leBhayibhili; sinethemba lephuluso nelokuphila okungapheliko; singasiza nabanye bona bafumane iimbusiso ezifanako.—Rha. 106:4, 5; Jer. 15:16; Rom. 12:12.

Ukuthaba nokuthaba nabanye matshwayo wamaKrestu weqiniso. Ngalokho akurari bona uPowula watlolela beFilipi: “Ngithabile, begodu ngithaba nani noke. Ngesizatho lesi thabani nani kanye nami.” (Fil. 2:17, 18) Emezwini ambalwa la, uPowula wakhuluma kabili ngokuthaba nangokuthaba nabanye.

Kwamambala, amaKrestu kufuze atjheje ukubalekela nanyana ngikuphi ukutjhigamela kokuzihlukanisa. Akukho namunye ozihlukanisako ongathaba namakholwa akunye nawo. Alo singasilandela njani isikhuthazo sakaPowula ‘sokuragela phambili sithaba eKosini’ nabanakwethu?—Fil. 3:1.

Thaba Namakholwa Okunye Nawo

UPowula nekatlolela beFilipi incwadakhe, pheze bekasibotjhwa eRoma ngebanga lomsebenzi wokutjhumayela. (Fil. 1:7; 4:22) Nanyana kunjalo, ukubotjhwa kwakhe khenge kunciphise itjiseko yakhe ngekonzo. Ngokuphambeneko, wakuthabela ukukhonza uJehova ngezinga elipheleleko ‘nokuthululwa njengomnikelo oselwako.’ (Fil. 2:17, NW.) Indlela kaPowula yokucabanga itjengisa bona ithabo aliyi ngokobana umuntu usebujamweni obunjani. Naphezu kokubotjhwa wathi: “Ngizasolo ngihlala ngithabile.”—Fil. 1:18.

UPowula wathoma ibandla leFilipi begodu wazizwa abathanda khulu abanakwabo lapho. Bekazi bona ukuhlanganyela nabo ithando alifumana ekukhonzeni uJehova bekuzokuba sikhuthazo nakibo. Ngalokho watlola: “Ngithanda bona nazi, bazalwane, bona izinto ezenzekileko kimi zaba lisizo kwamambala, ekurageleni ivangeli phambili. Ngalokho-ke, woke amabutho aqale isigodlo nabanye lapha, bazi bona ngisibotjhwa ngombana ngiyinceku kaKrestu.” (Fil. 1:12, 13) Ukuhlanganyela kwakaPowula okuhlangabezanwe nakho okusikhuthazokhu bekuyindlela yokuthaba nokuthaba nabanakwabo. Kufuze bona beFilipi bathaba noPowula. Nokho, ukwenza kwabo njalo, bekufuze kubenze bangadaniswa ngilokho okwenzakalela uPowula. Kunalokho, bekufuze balingise isibonelo sakhe. (Fil. 1:14; 3:17) Ngaphezu kwalokho, beFilipi bebangaragela phambili bafaka uPowula emithandazweni yabo bamnikele nananyana ngiliphi isizo nesekelo ngendlela abangakghona ngayo.—Fil. 1:19; 4:14-16.

Sitjengisa umoya wethabo ofanako njengombana kwenza uPowula? Silwela ukubona izinto ezihle ebujamweni esiqalana nabo ekuphileni nekonzweni yethu yobuKrestu? Nesizihlanganisa nabanakwethu, kuhle ukuthaba ngomsebenzi wokufakaza. Bona sithabe akukafuzi silinde bona sibe nokuhlangabezanwe nakho okuvusa amadlharuma. Mhlamunye sikghonile ukuvusa ikareko ngesigijimi soMbuso sisebenzisa isingeniso esithileko esiphumelelako nofana indlela yokubonisana. Mhlamunye khesaba nengcoco emnandi nomninimuzi ngevesi elithileko leBhayibhili. Namtjhana kungenzeka siyaziwa esimini yethu njengaboFakazi bakaJehova, begodu lokhu kukodwa kube bufakazi obuhle. Ukucoca ngokuhlangabezanwe nakho okunjalo yindlela yokuthaba ndawonye.

Abantu bakaJehova abanengi bazidela begodu basazidela ekwenzeni umsebenzi wokutjhumayela. Amaphayona, ababonisi abakhambako, iinkhonzi zeBethel, iinthunywa zevangeli, neensebenzi zokwakha zephasi loke bazinikele ekonzweni yesikhathi esizeleko begodu bayathaba ngokwenza njalo. Siyathaba kunye nabo na? Yeke asitjengiseni ukuthokoza kwethu ngabathandekakwaba ‘abasebenzela umbuso kaZimu kunye nathi.’ (Khol. 4:11) Nesinabo emihlanganweni yebandla namtjhana emihlanganweni yobuKrestu emkhulu, singabakhuthaza. Godu singalingisa nesibonelo sabo setjiseko. Singakha “ithuba” lokulalela okuhlangabezanwe nakho kwabo namezwi wabo akhako ngokungenisa iinkhambi, mhlamunye sihlanganyele isidlo nabo.—Fil. 4:10.

Thaba Nalabo Abaqalene Neenlingo

Ukukghodlhelelela itjhutjhiso nokuhlula iinlingo kwaqinisa ukuzimisela kwakaPowula ukuhlala athembekile kuJehova. (Khol. 1:24; Jak. 1:2, 3) Ukwazi bona abazalwana eFilipi kungenzeka bebaqalane neenlingo ezifanako begodu bebazokukhuthazeka ngokukghodlhelela kwakhe kwamnikela ibanga lokuthaba nokuthaba kunye nabo. Ngalokho, watlola: “Nina niphiwe ilungelo lokulotjha uKrestu, ingasi ngokukholwa kwaphela, kodwana nangokutlayiseka ngebanga lakhe. Nani nilwa indwa efanako enibone ngiyilwa esikhathini esidlulileko, nenisayizwako ngendumela nagadesi.”—Fil. 1:29, 30.

Ngokufanako namhlanjesi, amaKrestu aqalana nokuphikiswa ngebanga lokufakaza kwawo. Ngezinye iinkhathi ukuphikisokhu kuba nenturhu, kodwana kanengi kufihlekile. Kungafika ngokumangalelwa ngamala ziinhlubuki, ukuphikiswa okuvela emalungwini womndeni, ukuhlekwa ngosebenza nabo nofana ofunda nabo esikolweni. UJesu wayelelisa bona iinlingwezi akukafuzi zisirare namtjhana zisidanise. Kunalokho, zimabanga wokuthaba. Wathi:“Ninetjhudu lokha banithukako, banizuma, banirhwayela, bakhuluma koke okumbi ngani ngebanga lami. Thabani nithokoze, ngombana umvuzo wenu nibekelwe ezulwini. Nabaporofidi ababakhona ngaphambi kwenu babazuma ngayo indlela le.”—Mat. 5:11, 12.

Akukafuzi sisabe namtjhana sithuthumele nesizwa bona abanakwethu eenarheni ezithileko baqalene netjhutjhiso elinelunya. Kunalokho, kufuze sithabe ngokukghodlhelela kwabo. Singabathandazela, sibawe uJehova bona asekele ikholo nokukghodlhelela kwabo. (Fil. 1:3, 4) Njengombana kungaba kuncani esingakwenzela abanakwethu abathandekakwabo, singasiza nalabo abasebandleni lethu abaqalene neenlingo. Singaba nekareko kibo begodu sibasekele. Singakha amathuba wokuthaba nabo ngokubamema bona babe nathi ekuKhulekeleni kwethu Komndeni kwebusuku, ngokuhlanganyela nabo emsebenzini wokutjhumayela nangokusebenzisa isikhathi sethu sinabo kezokuzithabisa.

Sinamabanga amanengi wokuthaba ndawonye! Asilwisane nomoya wephasi wokuzihlukanisa, siragele phambili sihlanganyele ithabo lethu nabanakwethu. Ngokwenza njalo, angeze sinikele ethandweni nebunyeni bebandla kwaphela kodwana sizokuthabela ubudlelwana bobuKrestu ngokuzeleko. (Fil. 2:1, 2) Kwamambala, ‘asithabeni njalo eKosini,’ ngombana uPowula wasikhuthaza wathi: “Ngiyabuyelela godu njalo ngithi: Thabani!”—Fil. 4:4.

[Umthombo wesithombe ekhasini 6]

Globe: Courtesy of Replogle Globes