Isiluleko Esihlakaniphileko Malungana Nokutjhada Nokungatjhadi

“Lokhu ngikutjho kini, . . . ngifuna nenze okulungileko nokufaneleko emsebenzini weKosi ningatshwenywa lilitho.”—1 KOR. 7:35.

1, 2. Kubayini umuntu kufuze ahlole isiluleko seBhayibhili malungana nokutjhada nokungatjhadi?

KUNEZINTO ezimbalwa ekuphileni eziletha ithabo, ukutjharagana namtjhana ukutshwenyeka ngaphezu kokusebenzelana kwethu nabantu bobulili obuhlukileko. Ukuqalana namazizo anjalo ngokuphumelelako kutlhoga bona sifune isinqophiso sakaZimu, kodwana kunamanye amabanga wokwenza njalo. UmKrestu owanelisekileko ngokungatjhadi angazizwa ngasuthi umndenakhe namtjhana abangani bamgandelela bona atjhade. Omunye kungenzeka uyakufuna ukutjhada kodwana akakamfumani umlingani omfaneleko. Abanye batlhoga isinqophiso sokobana bangazilungiselela njani ukuthwala iimthwalo yokuba yindoda namtjhana umfazi. Kokubili amaKrestu atjhadileko nangakatjhadi aqalana neenlingo ezimalungana nokuziphatha ngokomseme.

² Ngaphandle kwethabo lethu mathupha, iindabezi zithinta ubuhlobo bethu noJehova uZimu. Esahlukweni-7 sencwadakhe yokuthoma ayitlolela beKorinte, uPowula wanikela isinqophiso malungana nokutjhada nokungatjhadi. Umqophwakhe bekukukhuthaza abafundi bayo bona ‘benze okulungileko nokufaneleko emsebenzini weKosi bangatshwenywa lilitho.’ (1 Kor. 7:35) Njengombana ucabangela isiluleko sakhe eendabeni eziqakathekilekwezi, linga ukuqala ubujamo bakho—ukutjhada namtjhana ukungatjhadi—njengendlela yokukhonza uJehova ngokuzeleko.

Isiqunto Somuntu Mathupha Esibudisi

3, 4. (a) Ngibuphi ubudisi obuphakamako ngezinye iinkhathi abantu nebatshwenyeke ngokudluleleko ngomngani nofana isihlobo esingakatjhadi? (b) Isiluleko sakaPowula kufuze simsize njani umuntu bona abe nombono olinganiselweko ngomtjhado?

³ Njengomphakathi wamaJuda wangekhulu lokuthoma leemnyaka, amasiko amanengi namhlanjesi aphakamisa ukutjhada njengento efiseleka khulu. Nengabe isokana namtjhana intombi idlula iimnyaka ethileko ingakatjhadi, abangani neenhlobo ezitshwenyekileko zingazizwa zikatelelekile bona zibanikele isiluleko esithileko. Engcocweni, bangaphakamisa bona isokana namtjhana intombi ibe majadu khudlwana ekufuneni umlingani. Bangakhuluma ngelunga elithileko elifanelekako lobulili obuhlukileko. Bangenza ngitjho namaqhinga wokobana abantu ababili abangakatjhadi bahlangane. Izenzwezi ngezinye iinkhathi zingaletha ihlazo, ziqede ubungani, zilimaze namazizo.

⁴ UPowula khenge agandelele abanye bona batjhade namtjhana bahlale bangakatjhadi. (1 Kor. 7:7) Bekanelisekile ngokukhonza uJehova anganamfazi, kodwana walihlonipha ilungelo labanye lokuthabela umtjhado. AmaKrestu angakatjhadi namhlanjesi nawo anelungelo lokuzikhethela bona ayatjhada namtjhana ahlala angakatjhadi. Abanye akukafuzi babakatelele bona bathathe ikambo yokutjhada namtjhana yokungatjhadi.

Ukwenza Ukungatjhadi Kube Ngokuzuzisako

5, 6. Kubayini uPowula anyula ukungatjhadi?

⁵ Okuveleleko emezwini kaPowula awatlolela beKorinte mbonwakhe omuhle wokungatjhadi. (Funda 1 KwebeKorinte 7:8.) Nanyana uPowula bekangakatjhadi, khenge azibone angcono kunabatjhadileko, njengombana kwenza abafundisi abaziimpohlo beSingabukrestu. Kunalokho, umpostoli lo waveza inzuzo iinkhonzi ezinengi zeendaba ezimnandi ezingakatjhadi eziyithabelako. Ngiyiphi inzuzo leyo?

⁶ UmKrestu ongakatjhadi kanengi unekululeko yokwamukela izabelo ekonzweni kaJehova okungenzeka umuntu otjhadileko angakghoni ukuzifikelela. UPowula wamukela ilungelo elikhethekileko lokuba ‘mpostoli eentjhabeni.’ (Rom. 11:13) Funda iZenzo izahluko-13 kuya ku-20, ukhambisane naye neenthunywa zevangeli akunye nazo njengombana bavula amasimu begodu bathoma amabandla iindawo ngeendawo. Ekonzwenakhe uPowula wakghodlhelelela ubudisi abantu abambalwa abazokuqalana nabo namhlanjesi. (2 Kor. 11:23-27, 32, 33) Kodwana ithabo lakhe ekusizeni abanengi bona babe bafundi lenza ubudisobo baba ngobufaneleko. (1 Tes. 1:2-7, 9; 2:19) Bekazokukghona ukukwenza koke lokho ngathana bekatjhadile namtjhana anomndeni? Pheze bekangekhe.

7. Nikela isibonelo saboFakazi abangakatjhadi abasebenzisa ubujamo babo ukuthuthukisa iinkareko zoMbuso.

⁷ AmaKrestu angakatjhadi amanengi asebenzisa ubujamo babo ukwenza okunengi ngebanga loMbuso. USara noLimbania, amaphayona angakatjhadi weBolivia, athuthela endaweni yemakhaya lapho besele kuphele iimnyaka eminengi abantu bakhona bengatjhunyayezwa. Ucabanga bona ukutlhogakala kwegezi endaweni leyo bekuzoba mraro? Bathi: “Akunamrhatjho namtjhana i-TV, ngalokho abantu abathikaziswa entweni eyihloko abazilibazisa ngayo, ekufunda.” Ezinye izakhamuzi zatjengisa amaphayona la iincwadi zaboFakazi BakaJehova zakade ebezisazifunda kodwana ebezingasagadangiswa. Ngombana abodadaba bebafumana abantu abanekareko pheze komunye nomunye umuzi abangena kiwo, bebanobudisi bokuyihlanganisa yoke isimu leyo. Esinye isilukazi sabatjela bona: “Ukuphela kufuze bona sekutjhidele ngombana emaswapheleni aboFakazi BakaJehova bafikelele nakithi.” Abanye endaweni leyo msinyana bahlanganyela emihlanganweni yebandla.

8, 9. (a) Bekacabangani uPowula nekakhuluma kuhle ngokungatjhadi? (b) Ngiziphi iinzuzo amaKrestu angakatjhadi anazo?

⁸ Kwamambala amaKrestu atjhadileko nawo aneemphumela emihle ayifumana lokha nekatjhumayela iindaba ezimnandi emasimini alikhuni. Kodwana kunezinye izabelo ezivulekele amaphayona angakatjhadi ezingaba budisi kilabo abatjhadileko namtjhana abanabantwana. UPowula wacabanga ngethuba alibonako lokuthuthukisa iindaba ezimnandi hlangana namabandla wendawo. Bekafuna boke bathabe njengaye. Ngebangelo wakhuluma kuhle ngokukhonza uJehova njengomuntu ongakatjhadi.

⁹ Udade oliphayona elingakatjhadi we-United States watlola: “Abanye abantu bakholelwa bona umuntu ongakatjhadi ngeze alifumana ithabo. Kodwana ngibone bona ithabo elihlala isikhathi eside lisame ebuhlotjeni bomuntu noJehova. Nanyana ukungatjhadi kukuzidela, kusisipho esirarako newukusebenzisa kuhle.” Malungana nokufumana ithabo, watlola: “Ukungatjhadi kungaba yindlela yokufumana ithabo, ingasi isithiyo. Ngiyazi bona uJehova akakhethululi namunye, otjhadileko namtjhana ongakatjhadi, emsenakhe.” Kwanje ukhonza ngethabo enarheni enetlhogeko ekulu yabarhuweleli boMbuso. Nengabe awukatjhadi, ungasebenzisa ikululeko yakho ekuthuthukiseni indlela ohlanganyela ngayo ekufundiseni abanye iqiniso? Nawe ungafumana bona ukungatjhadi kusisipho esikhulu esivela kuJehova.

Abangakatjhadi Abafisa Ukutjhada

10, 11. UJehova ubasekela njani labo abanethemba lokutjhada kodwana abangakamfumani umlingani obafaneleko?

¹⁰ Ngemva kokuhlala isikhathi esithileko zingakatjhadi, iinceku zakaJehova ezinengi ezithembekileko zikhetha ukufuna umlingani womtjhado. Zitjheja bona zitlhoga isinqophiso, zibawa kuJehova isizo lokufumana umlingani ofaneleko.—Funda 1 KwebeKorinte 7:36.

¹¹ Newunethemba lokutjhada nomuntu onesifiso esifana nesakho sokukhonza uJehova ngehliziyo yoke, khuluma noZimu ngendaba le ngomthandazo. (Fil. 4:6, 7) Kungakhathaliseki bona kungatlhogeka ulinde isikhathi esingangani, ungalahli itewu. Thembela kuZimethu onethando njengoMsizi wakho, uzokusekela ngokwamazizo ngokuvumelana nalokho okutlhogako.—Heb. 13:6.

12. Kubayini umKrestu kufuze asicabangele kuhle isibawo somtjhado?

¹² UmKrestu ongakatjhadi onesifiso sokutjhada angatjhelwa mumuntu onengokomoya elizazisako namtjhana ngitjho ongakholwako. Nekwenzeka lokho kuwe, khumbula bona isizi elibangelwa kukhetha kumbi umlingani womtjhado lingabangela ubuhlungu obusidlula kude khulu isifiso umuntu anaso nangakatjhadi. Watjhada, kungakhathaliseki bona kuhle namtjhana kumbi, ubotjhelwe kumlinganakho ukuphila kwakho koke. (1 Kor. 7:27) Ngokuphelelwa lithemba ungenzi isiqunto sokutjhada ozozisola ngaso kamva.—Funda 1 KwebeKorinte 7:39.

Kulungiselele Ukuqalana Namaqiniso Womtjhado

13-15. Ngibuphi ubudisi emtjhadweni isibili ekufuze sicoce ngabo nesisathembiseneko?

¹³ Nanyana uPowula anyula ukukhonza uJehova njengomuntu ongakatjhadi, khenge abanyaze labo abakhetha ukutjhada. Kunalokho, isiluleko sakhe esiphefumulelweko sisiza abatjhadileko bona baqalane namaqiniso wokuphila kwemtjhadweni begodu benze isibopho sabo sihlale ngokungapheliko.

¹⁴ Abanye abasazokutjhada kufuze balungise lokho abakulindeleko ngengomuso. Njengombana basathembisene, abantu ababili bangaqala ithando labo njengelingamadanisekiko, elingakajayeleki, isiqinisekiso sokobana bazokuba nomtjhado othabisako. Bangena emtjhadweni banamabhudango begodu bakholelwa bona ayikho into engatjhabalalisa ithabo labo ndawonye. Ukucabanga okunjalo akusingokwamambala. Ukutjengisana ithando emtjhadweni kungaba yinto ethabisako, kodwana lokho kukodwa akuhlomiseli umakoti nomkhwenyana yoke iimraro eza nomtjhado.—Funda 1 KwebeKorinte 7:28.a

¹⁵ Abantu abanengi abaqeda ukutjhada bayarareka, bayadana, abalingani babo nebanombono ohlukileko kowabo eendabeni eziqakathekileko. Ababilaba bangazifumana bangavumelani endleleni ekufuze basebenzise ngayo imali, isikhathi sokuzithabisa, indawo abazokuhlala kiyo nokobana kufuze bazivakatjhele kanengi kangangani iinhlobo zabo. Ngamunye unobuthakathaka obungasilinga omunye. Nebasathembiseneko, bangacabanga bona akutlhogeki ukukhuluma ngeendaba ezinjalo, kodwana ngokukhamba kwesikhathi lokho kungawugandelela khulu umtjhado. Isibili senza kuhle ngokulungisa izinto ezisitshwenyako ngaphambi kobana sitjhade.

16. Kubayini isibili kufuze sivumelane ngendlela yokuqalana nobudisi bepilo yemtjhadweni?

¹⁶ Bona siphumelele begodu sithabe, isibili kufuze siqalane nobudisi ngobunye. Kufuze sivumelane ngendlela esizokuyala ngaso abantwana nangendlela esizokutlhogomela ngayo ababelethi baso abalupheleko. Ukugandeleleka okubangelwa budisi bemndenini akukafuzi kwenze ababilaba bahlukane. Ngokusebenzisa isiluleko seBhayibhili, bazokurarulula iimraro eemnengi, bakghodlhelele leyo eseleko, begodu bahlale ndawonye bathabile.—1 Kor. 7:10, 11.

17. Ngikuphi ukutshwenyeka ‘ngezinto zephasi’ isibili ekufuze sikulindele?

¹⁷ Encwadini yo-1 KwebeKorinte 7:32-34 uPowula waveza elinye iqiniso ngomtjhado. (Funda.) Abantu abatjhadileko banesibopho ‘sokutshwenyeka ngezinto zephasi,’ njengokudla, kokwembatha, indawo yokuhlala, nezinye izinto ezingasingezingokomoya. Kubayini kunjalo? Nekangakatjhadi, umzalwana kungenzeka bekenza okunengi ekonzweni. Kodwana njengombana sekayindoda yomuzi, ufumana bona kufuze asebenzise esinye sesikhatheso namandla ukutlhogomela umkakhe begodu athole ukwamukelwa nguye. Kungokufanako nangomfazi endodeni. Ngokuhlakanipha kwakhe, uJehova uyayibona itlhogeko le. Uyazi bona umtjhado ophumelelako kanengi ufuna esinye sesikhathi namandla indoda nomfazi egade basisebenzisa ekonzweni Yakhe nebangakatjhadi.

18. Ngikuphi ukulungisa kezokuzithabisa okungenzeka abanye kufuze bakwenze ngemva komtjhado?

¹⁸ Isifundo esisifumanako siragela phambili. Isibili nekufuze sithathe esinye isikhathi namandla ebesiwasebenzisa ekonzweni kaZimu bona sitlhogomelane, akukafaneli na senze okufanako nangesikhathi ebesisetjenziselwa ukuthabela ubudlelwana nabanye nesingakatjhadi? Umfazi angazizwa njani indodakwakhe neyilokhu izibandakanya khulu kezemidlalo nabangani bayo? Namtjhana indoda ingazizwa njani umkayo nekasebenzisa isikhathi esinengi ekuzithabiseni nabangani bakhe? Umlingani ongatjhejwako msinyana angazizwa anesizungu, angakathabi begodu angathandwa. Lokhu kungabalekelwa nengabe labo abatjhadileko benza koke abangakwenza ukuqinisa ubuhlobo babo njengendoda nomfazi.—Efe. 5:31.

UJehova Ufuna Ukuziphatha Okuhlwengileko

19, 20. (a) Kubayini abantu abatjhadileko bangakatjhaphuluki esilingweni sokuziphatha okumbi? (b) Ngiyiphi ingozi abantu abatjhadileko abazifaka kiyo nebazivumela bona bahlukane isikhathi eside?

¹⁹ Iinceku zakaJehova zizimisele ukuhlala zihlwengile ngokokuziphatha. Abanye bakhetha ukutjhada bona babalekele ukuziphatha okumbi. Nokho, umtjhado awunikeli isivikelo ngokuzenzakalelako ekuziphatheni kumbi ngokomseme. Ngeenkhathi zeBhayibhili, idorobho elinamaboda amakhulu naqinileko gade livikela abantu kwaphela nebahlala ngaphakathi kwalo. Nekwenzeka umuntu aphumela ngaphandle kweyege ngesikhathi iinlelesi nabaphangi abatjhagala ngaso, bekazokuphangwa namtjhana abulawe. Ngokufanako, abantu abatjhadileko bazokuvikeleka ekuziphatheni okumbi kwaphela nebangeqi imikhawulo yezokuziphatha ngokomseme abayibekelwe Mthomi womtjhado.

²⁰ UPowula wahlathulula iimkhawulo leyo kwe-1 Korinte 7:2-5. Ubuhlobo bomseme nendoda buba lilungelo lomkayo kwaphela; nendoda inelungelo elifanako kumkayo. Ngamunye ulindeleke bona anikele omunye ‘okumfaneleko’ komtjhado namtjhana ubuhlobo bomseme umuntu otjhadileko anelungelo lokubufumana. Nokho, amanye amadoda nabafazi bathatha isikhathi eside bahlukene—baye eendaweni zokuphumula ngokuhlukana namtjhana babe kude komunye nomunye ngebanga lomsebenzi wokuziphilisa, ngokwenza njalo badimana ‘okubafaneleko.’ Cabanga ngobuhlungu obungabangelwa ‘kubhalelwa kuzibamba,’ uvumele igandelelo lobusathana begodu uphinge. UJehova ubusisa iinhloko zomndeni ezitlhogomela iimndenazo ngaphandle kokufaka iimtjhadwazo engozini.—Rha. 37:25.

Iinzuzo Zokulalela Isiluleko SeBhayibhili

21. (a) Kubayini iinqunto ezibandakanya ukutjhada nokungatjhadi zibudisi ukuzenza? (b) Kubayini isiluleko esikwe-1 Korinte isahluko-7 silisizo?

²¹ Iinqunto ezibandakanya ukungatjhadi nokutjhada zihlangana kwezinto ezibudisi umuntu angazenza. Ukungapheleli, okumthombo weemraro eemnengi ebuhlotjeni babantu, kukhona kibo boke abantu. Ngalokho ngitjho nalabo abathandwa begodu ababusiswa nguJehova ngeze bakubalekela ngokuzeleko ukudana, kungakhathaliseki bona batjhadile namtjhana abakatjhadi. Newusebenzisa isiluleko esihlakaniphileko esifumaneka kwe-1 Korinte isahluko-7, ungakghona ukuphungula iimraro enjalo. ‘Uzokwenza kuhle’ emehlweni kaJehova kungakhathaliseki bona utjhadile namtjhana awukatjhadi. (Funda 1 KwebeKorinte 7:37, 38.) Ukwamukelwa nguZimu mqopho omkhulu ongawufikelela. Ngomusakhe, uzokuragela phambili uthuthukela ekuphileni ephasini lakhe elitjha. Lapho, ubuhlobo hlangana kwamadoda nabafazi buzobe bunganalo igandeleleko elijayelekileko namhlanjesi.

[Umtlolo waphasi]

Ungaphendula?

• Kubayini kungakafuzi bona omunye akatelele omunye bona atjhade?

• Ungasisebenzisa njani kuhle isikhathi sakho njengenceku kaJehova engakatjhadi?

• Isibili esisathembiseneko singabulungiselela njani ubudisi bemtjhadweni?

• Kubayini umtjhado unganikeli isivikelo ngokuzenzakalelako ekuziphatheni kumbi ngokomseme?

[Iinthombe ekhasini 14]

Ithabo lifunyanwa maKrestu angakatjhadi asebenzisa isikhathi sawo ukuthuthukisa ikonzo yawo

[Isithombe ekhasini 16]

Ngikuphi ukulungisa abanye okungenzeka kufuze bakwenze ngemva komtjhado?