Iimbuzo Evela Kubafundi
Khuyini okufuze ngiyenze nenginombuzo ngokuthileko engikufunde eBhayibhilini namtjhana nengifuna isiluleko malungana nomraro womuntu mathupha?
Iziyema 2:1-5 zikhuthaza ngamunye wethu bona “aragele phambili afunisisa” ukuzwisisa nelemuko njengalokha sifuna “amagugu afihliweko.” Lokhu kutjho bona kufuze sizinikele ekwenzeni irhubhululo eembuzweni yethu yeBhayibhili nekufumaneni iinsombululo eemrarweni yethu mathupha. Singakwenza bunjani lokhu?
Incwadi ethi Zuza Emfundweni YeSikole Senkonzo Esingokwasezulwini, amakhasi-33 kuya ku-38, ihlaziya ‘Indlela Yokwenza Irhubhululo’ ngokusebenzisa amathulusu esiwanikelwe ‘yinceku ethembekileko nehlakaniphileko.’ (Mat. 24:45) Ikhasi-36, lihlathulula indlela yokusebenzisa iWatch Tower Publications Index, igadangiso ngalinye layo elihlukaniswe ngeenkhombo zeehloko nezeemtlolo. Lokhu kwenza kukghoneke bona urhubhulule ngamabizo ayihloko namtjhana ngamavesi weBhayibhili, lapho uzokufumana irhelo leenkhombo ongaya kizo. Yiba nesineke newurhubhulula ngependulo ethileko namtjhana ngesinqophiso ositlhogako. Khumbula, ufuna “amagugu afihliweko,” lokho kuthatha isikhathi nomzamo.
Kuliqiniso, kunezinye iinhloko neemtlolo iincwadi zethu ezingakakhulumi ngayo ngokukhethekileko. Ngitjho nanyana sikhulume ngomtlolo weBhayibhili othileko, kungenzeka khange sidembe umbuzo onawo engqondweni. Godu, okhunye ukulandisa kweBhayibhili kuphakamisa iimbuzo ngombana akukavezwa yoke iimniningwana eMitlolweni. Ngalokho, ngeze sakghona ukufumana msinyana zoke iimpendulo zeembuzo ephakamako. Ebujamweni obunjalo, kufuze silise ukuraya ngezinto ezingeze zaphendulwa, ukukhandela ukuzibandakanya eempikiswaneni ‘ezingathuthukisi kilokho uZimu asifundisa khona nesikufumana ngokukholwa.’ (1 Thi. 1:4; 2 Thi. 2:23; Tit. 3:9) Ngitjho ne-ofisi legatja namtjhana umzimkhulu wephasi loke ngeze wakwazi ukuhlaziya nokuphendula yoke iimbuzo enjalo engakadenjwa eencwadini zethu. Singaneliswa kukobana iBhayibhili inikela iimniningwana eyaneleko ukusinqophisa ekuphileni kodwana itjhiye iminingwana ethileko ukwenzela bona sitjengise ikholo eliqinileko kuMtloli wayo wezulwini.—Qala amakhasi-185 kuya ku-187 wencwadi ethi Sondela KuJehova.
Kuthiwani nengabe wenze koke ongakwenza ukurhubhulula ngendaba ethinta wena mathupha kodwana awukafumani isinqophiso namtjhana isisombululo ositlhogako? Zizwe utjhaphulukile ukuya kokholwa naye ovuthiweko, mhlamunye omunye wabadala bebandla langekhenu. Banelwazi elithe tjha leBhayibhili nokuhlangabezanwe nakho ekuphileni kobuKrestu. Isizo labo elilinganiselako lizokufaneleka khulukhulu newutlhoga isiyeleliso malungana nomraro womuntu mathupha namtjhana isiqunto, ngombana bayakwazi begodu batjhidelene nawe nobujamo bakho. Ungalibali ukuthandaza kuJehova ngokukhethekileko ngalokho okukutshwenyako begodu umbawe bona anqophise iimcabango yakho ngomoyakhe ocwengileko, ‘ngombana uJehova ngokwakhe uphana ngokuhlakanipha . . . nelemuko.’—Iziy. 2:6; Luka 11:13.