Fundisa Abantwabakho
Bebabizwa Bona ‘Madodana Womdumo’
NGESIKHATHI samawuruwuru, ungezwa ukuduma okukhulu. Kwakhe kwakuthusa lokho?—a UJesu ubiza abalandeli bakhe ababili bona ‘Madodana Womdumo.’ Akhe sibone bonyana kubayini ababiza njalo.
Abafundi bakaJesu ababilaba nguJakobosi noJwanisi. Mumuntu nomnakwabo, madodana kaZebediya nomkakhe uSalome. USalome kungenzeka bona ngudadwabo kamma kaJesu, uMariya. Ngalokho, uJesu, uJakobosi noJwanisi kungenzeka bebabomzala begodu bebabangani abakhulu nebasakhulako.
UZebediya mthiyi weemfesi, njengombana kunjalo ngoJakobosi noJwanisi. Ababilaba gade bahlangana nabokuthoma uJesu abakhetha bona babe balandeli bakhe. Nekabamemako, basuka khonokho balisa ibhizinisabo yokuthiya iimfesi bamlandela. Ngokukhamba kwesikhathi uJesu ukhetha abali-12 babalandeli bakhe bona babe bapostoli bakhe. UJakobosi noJwanisi ngababili babo.
Iinyanga ezimbalwa ngaphambi kokubulawa kwakaJesu, yena nabapostoli bakhe baratha inarha yeSamariya eneentaba. Kuyahlwa, begodu boke badinwe bafile. Kodwana amaSamariya athi akafuni bona uJesu nabapostoli bakhe bahlale ubusuku boke edorobheni lawo. Uyazi bona kubayini?— Akhe sibone.
UJesu nabapostoli bakhe maJuda, begodu amaJuda amanengi awaqalela phasi amaSamariya. Kodwana uJesu yena gade angasi njalo. Uwaphatha ngesineke, njengombana bekufuze kube njalo ngoJakobosi noJwanisi. Kodwana abapostoli ababilaba bayawakwatela amaSamariya angazange abamukele, begodu babuza uJesu bathi: “Ufuna bona sibize umlilo ezulwini wehle uzobarhayila na?” Ucabanga bona uJesu wathini?— Wathi abakalungi ngokutjho into embi kangaka! UJakobosi noJwanisi kufuze bafunde okunengi ngesirhawu.
Omunye umraro omkhulu uJakobosi noJwanisi abanawo kukobana bafuna ukuba ngebokuthoma, ukuba ngabaqakatheke khulu. Msinyana ngaphambi kokufa kwakaJesu, bathuma unina bona athi kuye: “Ngithembisa bona amadodana wami amabili la enye izahlala ngesigomeni sakho, enye ngesinxeleni sakho, mhlana ufika ebukhosini bakho.” Abanye abapostoli abalitjhumi nebezwa ngokwenziwe nguJakobosi noJwanisi, bayakwata. Nawe bewuzokukwata?—
Kungenzeka bewuzokukwata. Asithandi abanye nebafuna ukuba ngebokuthoma begodu balinga nokuba ngabaqakatheke khulu. Ngokukhamba kwesikhathi uJakobosi noJwanisi babona bona bebanganamusa kangangani begodu batjhuguluka. Baba bapostoli abanethando khulu nesineke. Singafundani kilokhu?—
Isifundo okufuze sisifunde kuJesu kukobana nathi kufuze sibe nomusa kwabanye. UJesu waphatha abantu kuhle, kuhlanganisa amadoda, abafazi nabantwana. Uzokulinga ngamandla ukukhumbula isibonelo sakhe bese uyasilandela ngaso soke isikhathi?—
Funda eBhayibhilinakho
Matewu 27:55, 56; Markosi 15:40, 41
Jwanisi 4:4-15, 21-26; Luka 9:51-55
Matewu 20:20-24; noMarkosi 10:35-37, 41
[Umtlolo waphasi]
a Nengabe ufunda nomntwana, umuda ukukhumbuza bona kufuze ujame kancani begodu ukhuthaze umntwana bona aveze amazizwakhe.