IMIBUZO YEBHAYIBHILI IYAPHENDULWA

Ngubani IBizo likaZimu?

Woke amalunga womndenethu anamabizo. Ngitjho neenlwana zinamabizo! Kuyafanaleka na ngoZimu bona abe nebizo? EBhayibhilini, uZimu uneziqu ezinengi, njengesithi Mninimandla woke, Kosi emBusi nesithi Mbumbi, kodwana naye unalo ibizo lakhe mathupha.—Funda u-Isaya 42:8.

Amatjhugululo amanengi weBhayibhili analo ibizo lakaZimu kuRhalani 83:18. Ngokwesibonelo, ku-New World Translation of the Holy Scriptures, iveselo lithi: “Wena ibizo lakho elinguJehova, wena wedwa ungoPhakemeko ephasini loke.”

Kubayini kufuze sisebenzise ibizo lakaZimu?

UZimu ufuna sisebenzise ibizo lakhe. Sisebenzisa amabizo wabantu mathupha nesikhuluma nalabo esibathandako, njengabangani esitjhidelene nabo—khulukhulu nabafuna senze njalo. Kufuze kube nomahluko na nakuziwa ekukhulumeni noZimu? Ngaphezu kwalokho, uJesu Krestu wakhuthaza ukusebenziswa kwebizo lakaZimu.—Funda uMatewu 6:9; Jwanisi 17:26.

Nokho, bona sibe bangani bakaZimu, kutlhogeka sazi okungeziweko ngaye ingasi ibizo lakhe kwaphela. Ngokwesibonelo, unjani uZimu? Kuyakghonakala na bona sitjhidele hlanu kwakaZimu? Ungafumana iimpendulo zemibuzo le eBhayibhilini.