UMosisi—INdoda YeKholo

LIYINI IKHOLO?

Njengombana lisetjenziswe eBhayibhilini, “ikholo” lihlanganisa ukukholwa okunganakuzaza okusekelwe ebufakazini obuqinileko. Umuntu onekholo kuZimu uyaqiniseka bona uZokuzalisa zoke iinthembiso Zakhe.

UMOSISI WALITJENGISA NJANI IKHOLO?

UMosisi wenza iinqunto ezitjengisa bona bekakholelwa eenthembisweni zakaZimu. (Genesisi 22:15-18) Bekanethuba lokuphila ukuphila okumnandi hlangana nomnono weGibhida, kodwana walilisa ithuba elinjalo, ‘wanyula khona ukutlhaga kanye nesitjhaba sakaZimu kunobanyana athabe isikhatjhana enza isono.’ (Hebheru 11:25) Inga-kghani leso bekusiqunto asenza angakacabangi, ebekazozisola ngaso ekugcineni? Awa, ngombana iBhayibhili ithi uMosisi “wanyamazela sengathi bekambona ngamehlo Loyo ongabonwako.” (Hebheru 11:27) UMosisi akhenge azisole ngeenqunto zekholo azenzako.

UMosisi wafuna ukuqinisa ikholo labanye. Ngokwesibonelo, cabangela lokho okwenzeka lokha nekubonakala sengathi ama-Israyeli avaleleke hlangana namabutho kaFaro neLwandle Elibomvu. Athuswe ngilokho okubonakala kuyihlekelele etjhidelako, ama-Israyeli alilela uJehova noMosisi. Bekazokusabela njani uMosisi?

Kungenzeka bona uMosisi bekangazi bonyana uZimu uzokuhlukanisa iLwandle Elibomvu, avulele ama-Israyeli indlela yokuphunyurha. Nokho, uMosisi bekaqiniseka bona uZimu kukhona azokwenza bona avikele abantu Bakhe. Begodu uMosisi bekafuna bona ama-Israyeli akunye naye abe nokuqiniseka okufanako. Siyafunda: “UMosisi wathi ebantwini: ‘Ningasabi. Jamani niqine nibone iphuluso kaJehova, azonenzela yona namhlanje.’” (Eksodosi 14:13) Inga-kghani uMosisi waphumelela ekuqiniseni ikholo lama-Israyeli akunye nawo? Kwamambala, ngombana iBhayibhili ithi, ingasi ngoMosisi yedwa kodwana ngawo woke ama-Israyeli: ‘Ngokukholwa ama-Israyeli ayama iLwandle EliBomvu sengathi akhamba equlwanini eyomileko.’ (Hebheru 11:29) Ikholo likaMosisi azange lizuzise yena kwaphela kodwana boke abafunda kilo.

NGIZIPHI IIMFUNDO ESINGAZIFUMANA?

Singalingisa uMosisi ngokwenza iinqunto ezitjengisa bona siyazikholelwa iinthembiso uZimu asithembise zona. Ngokwesibonelo, uZimu uthembise ukutlhogomela iintlhogo zethu nesibeka ukukhulekela kwakhe phambili emaphilwenethu. (Matewu 6:33) Liqiniso, singakufumana kubudisi ukubalekela ukubeka izinto eziphathekako phambili emaphilwenethu ngombana abantu abanengi namhlanje baphitjhekela zona. Kodwana singaqiniseka bona nesenza koke esingakwenza ukwenza amaphilwethu abe lula begodu sidzimelele ekukhulekeleni kwethu, uJehova uzosinikela koke esikutlhogako. Uyasiqinisekisa: “Angekhe ngakutjhiya wedwana; angekhe ngakulahla.”—Hebheru 13:5.

Begodu silwela ukusiza abanye bakhule ekholweni. Ngokwesibonelo, ababelethi abahlakaniphileko batjheja amathuba amanengi abanawo wokwakha ikholo labantwana babo. Njengombana bakhula, abantwana batlhoga ilwazi eliqakathekileko lokuthi uZimu ukhona begodu usinikele iinkambiso zokulungileko nokungakalungi. Ngaphezu kwalokho, batlhoga ukuqinisekiswa bona ukulandela iinkambiswezo yindlela engcono khulu yokuphila. (Isaya 48:17, 18) Ababelethi banikela abantwana babo isipho esiligugu nebabasiza babe nekholo bona uZimu “ukhona nokobanyana uyabavuza labo abamfunako.”—Hebheru 11:6, Holy Bible—Easy-to-Read Version.