UJehova “Akakhethi”

Khe waba ngungazimbi wokubandlululwa? Kghani isibawo sakho saliwa, wangenzelwa okuthileko namtjhana waqalelwa phasi ngebanga lebala lesikhumba, ihlanga lakho nofana ngebanga lalokho ongikho? Nengabe kunjalo, awusiwedwa. Nokho, nanzi iindaba ezimnandi: Ibandlululweli, nanyana liyinto ejayelekileko ephasini, alikho ezulwini. Umpostoli uPitrosi omKrestu watjho amezwi la ngokuqiniseka, “uZimu akakhethi.”—Funda IzEnzo 10:34, 35.

UPitrosi watjho amezwi la ebujamweni obungakajayeleki—emzini womuntu weenTjhaba obizwa bona nguKorneliyasi. UPitrosi, omJuda, waphila ngesikhathi lapho amaJuda ebekaqala abantu beenTjhaba njengabasilapheleko nabangakufanelekeli ukuzihlanganisa nabo kunanyana ngisiphi isenzo sokukhulekela. Nokho, kubayini uPitrosi bekasemzini kaKorneliyasi? Kungombana uJehova uZimu bekahlele umhlangano lowo. UPitrosi bekafumene umbono kuZimu lapho amtjela khona athi: “Lokho uZimu akuhlambululileko ungakubizi bona kusilaphele.” Phakathi nelanga, uPitrosi angazi, uKorneliyasi naye bekafumene umbono, lapho ingilozi yamtjengisa khona bona abize uPitrosi. (IzEnzo 10:1-15) UPitrosi nekalemuka bona uJehova ubandakanyekile endabeni le, khenge akghone ukuzibamba.

UPitrosi wathi: “Sekuyangikhanyela bona uZimu akakhethi ubuso.” (IzEnzo 10:34) Ibizo lesiGirigi elitjhugululwe ngokuthi “khetha” ngokwebizo nebizo litjho “ukuqala ubuso.” (The Kingdom Interlinear Translation of the Greek Scriptures) Malungana nebizweli, esinye isazi siyahlathulula: “Liqalisele kumahluleli oqala ubuso bomuntu bese akhipha isiqunto, ingasi ngokusekelwe ebufakazini obutholakeleko becalelo kodwana ngebanga lokuthi uyamthanda namkha akamthandi umuntu loyo.” UZimu akaqali ubuso bomuntu njengobungcono ngebanga lobutjhaba, ihlanga, lokho angikho namtjhana ngikuphi ukuqaleka kwangaphandle.

Kunalokho, uJehova ubona lokho okusehliziywenethu. (1 Samyela 16:7; IzAga 21:2) UPitrosi wathi: ‘Kodwana omesabako enze okulungileko nanyana angewasiphi isitjhaba uyamukeleka kuye.’ (IzEnzo 10:35) Ukusaba uZimu kutjho ukumhlonipha, ukumthemba, ukubalekela nanyana yini engamthabisiko. Ukwenza okulungileko kubandakanya ukuzimisela ukwenza okuhle kuZimu. UJehova uyathaba nekabona umuntu onehliziyo emsabako emtjhukumisela bona enze okulungileko.—Duteronomi 10:12, 13.

Nengabe khe wabandlululwa, unesizathu esizwakalako sokududuzwa mamezwi kaPitrosi awatjho ngoZimu. UJehova udosela abantu bazo zoke iintjhaba ekukhulekeleni kweqiniso. (Jwanisi 6:44; IzEnzo 17:26, 27) Uyayilalela begodu ayiphendule imithandazo yabakhulekeli bakhe kungakhathaliseki bona ngebaliphi ihlanga, isitjhaba namtjhana ubujamo bomuntu. (1 AmaKhosi 8:41-43) Singaqiniseka ngokuthi uJehova nekasiqalako asezulwini, ubona isitjhaba sinye—ihlanga labantu. Inga-kghani lokhu akukutjhukumiseli bona ufunde okungeziweko ngoZimu ongakhethi lo?