IMIBUZO YEBHAYIBHELI IYAPHENDULWA

Likhona ithemba ngabahlongakeleko?

Ukuhlongakala kunjengokulala ngomqondo wokobana abafileko abezwa begodu akunalitho abangalenza. Nokho, umBumbi wokuphila angakwazi ukubuyisela abantu abahlongakeleko ekuphileni ngokubavusa. Ubufakazi balokho, uZimu wanikela uJesu amandla wokuvusa abantu abanengi abahlongakeleko.​—Funda UmTjhumayeli 9:5; Jwanisi 11:11, 43, 44.

UZimu wathembisa bona abahlongakeleko abasemkhumbulwenakhe bazokuvuselwa ekuphileni ephasini elitjha elinokulunga. Labo abazokuvuswa bazokulinda emathuneni bekube kulapho uZimu abababuyisela godu ekuphileni. UZimu uMninimandla woke ululukela ukusebenzisa amandlakhe ukubabuyisela ekuphileni.​—Funda uJobho 14:14, 15.

Lizokuba njani ivuko?

UZimu nakavusa abantu abahlongakeleko, bazokghona ukuzibona, bakghone ukubona abangani nemindenabo. Ngitjho nanyana umzimba womuntu ubola, uZimu angamvusa umuntu loyo ngomzimba omutjha.​—Funda 1 Korinte 15:35, 38.

Abanye abambalwa bavuselwa ekuphileni kwezulwini. (IsAmbulo 20:6) Abanengi abavusiweko bazokubuyiselwa ekuphileni epharadesi elinziwe kabutjha ephasini. Laba bazokunikelwa isithomo esitjha banethemba lokuphila ngokungapheliko.​—Funda IRhubo 37:29; IzEnzo 24:15.