“Umsebenzi Omkhulu”

SIKHATHI somhlangano oqakatheke khulu eJerusalema. Ikosi uDavida ibize iinduna, iimphathimandla zesigodlo kunye namadoda anamandla. Baqale phambili esimemezelweni esikhethekileko. UJehova uyale indodana kaDavida uSolomoni bona yakhe umakhiwo ozokujamela ukukhulekelwa kwakaZimu wamambala. Ikosi ekulu yakwa-Israyeli yabhudanga iplani yomakhiwo yalinikela uSolomoni. UDavida wathi, ‘Umsebenzi mkhulu,’ ‘ngombana umakhiwo lo akusiwo womuntu kodwana ngewakaJehova uZimu.’—1 Kron. 28:1, 2, 6, 11, 12; 29:1.

Ngokulandelako, uDavida wabuza naku umbuzo: “Nje-ke ngubani kinapha namhlanje ofuna ukuzahlukanisela uZimu ngokunikela ngehliziyo evumako na?” (1 Kron. 29:5) Akhesithi bowulapho, bowuyosabela njani? Bewuzowusekela na umsebenzi loyo? Ama-Israyeli khenge ariyade. Kwamambala, “bathokoza khulu ngokunikela kwabo. Iye, banikela ngokuvuma kwehliziyo kuZimu.”—1 Kron. 29:9.

Ngemva kwamakhulu weminyaka, uJehova wahlela omunye umsebenzi omkhulu ukudlula wethempeli. Wakha ithempeli elingokomfanekiso, okulilungiselelo lokobana abantu bakghone ukutjhidela kuye bamlotjhe ngomhlatjelo kaJesu. (Heb. 9:11, 12) UJehova ubasiza njani abantu namhlanjesi bona batjhidele, babenobuhlobo naye? Ngomsebenzethu wokufundisa abantu. (Mat. 28:19, 20) Ngebanga lomsebenzi lo, umnyaka ngamunye kuragwa iimfundo zeBhayibheli eziingidi bese kubhajadiswe iinkulungwana zabantu, kuthonywe namakhulu wamabandla.

Umphumela walokhu kukuthi kuba netlhogeko yokugadangiswa kweencwadi zeBhayibheli, ukwakhiwa nokutlhogonyelwa kwamaWolo womBuso, kunye nokufunwa kweendawo zokwakhiwa kwamaWolo wemihlangano. Awuvumi na ukuthi umsebenzethu wokurhatjha iindaba ezimnandi ephasini mazombe msebenzi othabisako?—Mat. 24:14.

Ukuthanda uJehova nabomakhelwana kunye nokurhaba komsebenzi wokutjhumayela ngomBuso, kwenza abantu bakaZimu ‘banikela ngokuvuma kwehliziyo kuJehova’ ngokuba ziinsebenzi ezingabhadelwako. Qala bona kuthabisa kangangani ‘ukuhlonipha uJehova ngomnonwakho,’ kunye nokubona ukusetjenziswa kwezinto nezakhiwo ngokuthembeka ukwenza umsebenzi omkhulu emlandweni wesintu!—IzA. 3:9.

Iindlela Ongakhipha Ngazo Umnikelo Womsebenzi Wephasi Loke

Inengi labantu namhlanjesi ‘libekela ngeqadi’ imadlana ethileko bona linikele ngayo ebhoksini elitlolwe “Umsebenzi Wephasi Loke.” (1 Kor. 16:2) Bese kuthi ibandla liyithumele egatjeni laboFakazi bakaJehova qobe nyanga. Abantu banganikela ngokunqophileko ehlanganweni engokomthetho yezamafa, esetjenziswa boFakazi bakaJehova enarheni abahlala kiyo. Newufuna ibizo lehlangano engokomthetho esetjenziswa boFakazi bakaJehova enarheni yangekhenu, sibawa uthintane ne-ofisi legatja langakwenu. Newufuna imininingwana yesiphande se-ofisi legatja ungaya kuzinzolwazi i-www.jw.org. Ngenzasi, kuneendlela ezihlukahlukeneko onganikela ngazo:

UMNIKELO

Lo-ke mnikelo onganikelwa nge-electronic bank transfer, nge-debit card namkha nge-credit card. Kwamanye amagatja unganikela nge-jw.org namkha ngezinzolwazi ehlelelwe lokho.
Unganikela ngemali, ubucwebe, njalonjalo. Sibawa utlole incwadi ekhambisana nomnikelwakho nengabe unikele ngezintwezi, utjho bona into leyo unikela ngayo khonokho.

UMNIKELO OHLELWA KUSESENGAPHAMBILI

Lo-ke mnikelo wemali ongakghona ubukuyiselwa wona nasele uwutlhoga.
Tlola incwadi ehlathulula kuhle imibandela yomnikelwakho.

EZINYE IINDLELA ONGANIKELA NGAZO

Kuneendlela zokunikela nawufuna ukusekela umsebenzi wokutjhumayela ephasini loke. Yeke, ngaphambi kobana unikele akhuthinte i-ofisi legatja lenarha yangekhenu likuhlathululele bona ngiziphi iindlela zokunikela ezamukelekako endaweni yangekhenu. Njengombana iinarha zinemithetho yezomthelo engafaniko, kungaba kuhle newungathintana nomeluleki wezomthelo ngaphambi kobana ukhethe indlela ofuna ukunikela ngayo.

Itjhorensi: Lo-ke mnikelo womuntu onikela ngemali yetjhorensi namkha yephentjhenakhe. Angatlolisa umnikelwakhe ngeenhlangano eziphatha amafa waboFakazi bakaJehova.

I-Akhawundi Yebhanga: Kunganikelwa ngama-akhawundi webhanga, iintifiketi zokufaka imali, namkha iimali zephentjheni. Angahlathulula bona nakahlongakalako iimali zakhe zithathwe ngenye yeenhlangano ezingokomthetho eziphatha amafa waboFakazi bakaJehova, kwaphela lokho nekuvumelana nemithetho yamabhanga abandakanyekileko.

Ama-share Nama-bond: Ama-share nama-bond anganikelwa ehlanganweni engokomthetho yezamafa esetjenziswa boFakazi bakaJehova. Angatlola incwadi yesivumelwano sokuthi nange umuntu onikelako angahlongakala, umnikelo loyo udluliselwe ehlanganweni.

Imakhiwo Neendawo: Imakhiwo neendawo zinganikelwa ehlanganweni engokomthetho yezamafa esetjenziswa boFakazi bakaJehova, begodu zinganikelwa njengomnikelo onganamibandela. Umuntu loyo angahlala endlini ukuphila kwakhe koke, bese kuthi nakahlongakalako indlwakhe leyo inikelwe ehlanganweni.

Imali Esisipho Yaqobe Mnyaka: Umuntu anganikela ngemali namkha ngezinto ehlanganweni engokomthetho esetjenziswa boFakazi bakaJehova kwezamafa, bese enze isivumelwano sokuthi kube nemadlana namkha amakonyana azowafumana qobe mnyaka nakasaphila. Kungenzeka abhadeliswe imali yomthelo ngomnyaka anikele ngawo.

Ama-will Nama-trust fund: Umuntu angahlela bona indawakhe namkha imalakhe inikelwe ehlanganweni nakafako. Lokho angakwenza ngokuthi kutlolwe incwadi yokwaba ilifa namkha isivumelwano, bese sitlolwe ibizo lehlangano engokomthetho ephatha amafa waboFakazi bakaJehova. Angabhadeliswa umthelo ngokwenza njalo.

Njengoba kutjhiwo “ezinye iindlela onganikela ngazo,” iindlelezi zokunikela zitlhoga ukuhlela kuhle ngehlangothini lomuntu onikelako. Bonyana sikwazi ukusiza nanyana ngubani ofuna ukunikelela umsebenzi wephasi loke waboFakazi bakaJehova, kulungiselelwe incwajana enesihloko esithi Charitable Planning to Benefit Kingdom Service Worldwide. Incwajana le ifumaneka ngelimi lesiNgisi nangeSpanitjhi, iphethe imininingwana yokuthi iminikelo ehlukahlukeneko ingenziwa njani njengalokha umuntu nakafuna ukwenza umnikelo ngento ezokuthathwa lokha nakahlongakalako. Kungenzeka bonyana imininingwana esencwajaneni le ingasebenzi kuwe ngebanga lokungafani kwemithetho yemithelo yendawo ohlala kiyo. Ngokwenza iminikelo enjenga le abanengi basize khulu emsebenzini wokufundisa ngoZimu nalokha kuvele iinhlekelele ephasini mazombe begodu bakhulise neenzuzo zomthelo. Nange incwajana le ifumaneka enarheni yangekhenu ungayifumana ngokuyibawa kunobhala webandla langekhenu.

Bonyana ufumane ilwazi elingeziweko gandelela lapho kuthi “Nikelela Umsebenzi Wephasi Loke” efumaneka ekugcineni kwekhasi lokuthoma ku-jw.org, nanyana ungathintana ne-ofisi legatja langekhenu.